PDF တပ်ဖွဲ့ထံ ဆေးဝါးထောက်ပံ့တယ်ဆိုပြီး ပြီးခဲ့တဲ့ ရက်သတ္တပတ် ၂ ပတ်ကျော်က မန္တလေးမှာ ဖမ်းခံရတဲ့ CDM သူနာပြု မပိုးသန္တာအောင်ဟာ စစ်ကောင်စီတပ်ရဲ့စစ်ကြောရေးမှာ ကျဆုံးသွားတယ်လို့သတင်းထွက်လာပါတယ်။
ပြီးခဲ့တဲ့ အောက်တိုဘာလအတွင်းက ပုလဲ − ဂန့်ဂေါလမ်းပိုင်းမှာ ဆေးပစ္စည်းတွေတင်ထားတဲ့ ၆ ဘီးကား ဖမ်းဆီးခံရတာနဲ့ဆက်စပ်ပြီး မန္တလေးမြို့က CDM အထူးကုဆရာဝန်ကြီးတွေပါအဝင် CDM ကျန်းမာရေးဝန်ထမ်း ၃၀ နီးပါး ဖမ်းဆီးခံခဲ့ရပါတယ်။
အောက်တိုဘာလ ၂၉ ရက် အစောဆုံးဖမ်းခံသူရ ၄ ဦးထဲမှာ မန္တလေး ဗဟိုအမျိုးသမီး ဆေးရုံက သူနာပြုမ ပိုးသန္တာအောင် လည်းပါပါတယ်။
သူနာပြု ဆရာမ မပိုးသန္တာအောင်တို့ကို ဖမ်းမိတာကိုလည်း စစ်ကောင်စီက ဓာတ်ပုံနဲ့တကွ ထုတ်ပြန်ခဲ့ပါတယ်။
ဖမ်းခံရပြီးနောက် မပိုးသန္တာအောင် စစ်ကြောရေးမှာ ကျဆုံးသွားတဲ့သတင်းဟာ မနေ့ကညပိုင်းကစတင်ပြီး ကျယ်ကျယ်ပြန့်ပြန့်ထွက်လာပါတယ်။
Public Service Announcement
အထက်မြန်မာပြည်ဗဟိုဝန်ထမ်းတက္ကသိုလ် ( ဇီးပင်ကြီး ) မှာလူမျိုးရေး ၊ဘာသာရေးမှိုင်းတိုက်သင်ကြားတာကို ဖွင့်ချခဲ့တဲ့ CDM ဆရာဝန် ဒေါက်တာစိုးသူရဇော်ကလည်း သူနာပြု ဆရာမ မပိုးသန္တာအောင် စစ်ကြောရေးမှာကျဆုံးသွားတဲ့သတင်းကြားရတယ်လို့ လူမှုကွန်ရက်မှာရေးသားလာပါတယ်။
မန္တလေး CDM ကျန်းမာရေးဝန်ထမ်းအသိုင်းအဝိုင်းထဲမှာ ဒီသတင်းပြန့်နှံနေပြီး အတည်ပြုနိုင်ဖို့ ခက်ခဲနေတယ်လို့သိရပါတယ်။
စစ်တပ်အာဏာသိမ်းပြီးနောက် နိုင်ငံတဝှမ်းက ကျန်းမာရေးဝန်ထမ်းတွေကို ဖမ်းဆီးသတ်ဖြတ်ရာမှာ ၁၈ လကျော်ကာလအတွင်း ကျန်းမာရေးဝန်ထမ်း ၆၀ နီးပါး သေဆုံးခဲ့ရတယ်လို့ NUG ကျန်းမာရေးဝန်ကြီးဌာနက ထုတ်ပြန်ထားပါတယ်။
