ကလေးမြို့တွင်ပြည်သူ့ကာကွယ်ရေးတပ်ဖွဲ့များအားကြောက်လန့်ပြီး ထွက်ပြေးသွားသည့် စစ်ကောင်စီတပ်ထံမှသေနတ်တစ်လက်နှင့်ကျည်ဆန်များသိမ်းဆည်းရရှိကြောင်း CDF – KKG က သတင်းထုတ်ပြန်သည်။
ယနေ့( ဒီဇင်ဘာ ၂၄ရက်)နံနက် ၁ဝ နာရီခွဲခန့်တွင် ကလေးမြို့တာဟန်းမီးပွိုင့်ဂိတ်ကိုချင်းဒေသကာကွယ်ရေးတပ်( ကလေး၊ကဘော်၊ဂန့်ဂေါ) CDF – KKGမှ တပ်ဖွဲ့ဝင်များက တိုက်ခိုက်ရန် ချဥ်းကပ်စဥ် စစ်ကောင်စီတပ်ဖွဲ့ဝင်များက လက်နက်ကိုထားခဲ့ကာ ထွက်ပြေးသွားခြင်းဖြစ်သည်။
“တာဟန်းမီးပွိုင့်ဂိတ်အား စီးနင်းပစ်ခတ်ရန် ချဉ်းကပ်လာသည့် မိမိတို့ CDF – KKG တပ်ဖွဲ့အား မူးယစ်သောက်စားနေကြသည့် စကစတပ်သားများ မြင်တွေ့ပြီးနောက် ကြောက်လန့် ထွက်ပြေးသွားကြသဖြင့် ၎င်းတို့ ကျန်ရှိခဲ့သည့် M.A.2. အားလွယ်လင့်တကူ သိမ်းဆည်းနိုင်ခဲ့သည်”ဟု CDF – KKGကထုတ်ပြန်သည်။
စစ်ကောင်စီတပ်ဖွဲ့ထံမှ MA 2 တစ်လက်၊ကျည်ဘောက် တစ်ခုနှင့် ၅.၅၆ ကျည်တောင့် ၆ဝခန့် သိမ်းဆည်းရမိခဲ့သည်ဟုသိရသည်။
Public Service Announcement
ပြည်သူ့ကာကွယ်ရေးရဲဘော်များ အဆိုပါနေရာမှ ဆုတ်ခွာပြီးနောက် စစ်ကောက်စီအင်းအား ၃၀ခန့် ရောက်ရှိလာပြီး သေနတ်ဖြင့် ရမ်းပစ်၍ ပြည်သူတစ်ဦးသေဆုံးခဲ့သည်ဟုလည်းသိရသဖြင့် များစွာစိတ်မကောင်းကြောင်းလည်းCDF – KKGကအသိပေးသည်။ ပြည်သူ့ကာကွယ်ရေးတပ်ဖွဲ့ဝင်များမှာ အောင်မြင်စွာ ဆုတ်ခွာနိုင်ခဲ့ကြောင်းလည်းအသိပေးထားသည်။
အလားတူမန္တလေးတိုင်း ညောင်ဦးခရိုင်၊ ငါ့သရောက်မြို့နယ်တွင်လည်းဒီဇင်ဘာလ ၂၃ရက်က ငါ့သရောက်မြို့နယ် လျှပ်စစ်မီတာရုံးကို ပြည်သူ့ကာကွယ်ရေးမဟာမိတ်များ ကဝင်ရောက်စီးနင်းစဥ်စစ်ကောင်စီ ဝန်ထမ်းများက ပြန်မခုခံဘဲ အန္တရာယ် မပြုရန် တောင်းပန်သဖြင့် လက်နက်ကိုသိမ်းယူကာ ဝန်ထမ်းများ CDM လုပ်ရန် သတိပေးခဲ့ကြောင်း ညောင်ဦး ခရိုင် PDF တပ်ရင်း(၅) က MFP သတင်းဌာနကထုတ်ပြန်သည်။
(စစ်ကောင်စီတပ်ထံမှ သိမ်းဆည်းရမိသောသေနတ်နှင့် ကျည်များကိုပြသနောCDF(KKG)တပ်ဖွဲ့ဝင်များ။ ဓါတ်ပုံ-CDF)
