အာဏာလုစစ်ကောင်စီလုပ်မည့် ရွေးကောက်ပွဲဝင်ခြင်းမှာ ဓားပြဆီက ဝေစုတောင်းခြင်းပင်ဖြစ်ဟု ဦးမင်းကိုနိုင်ပြော

ပြည်သူလူထု အာဏာကိုလုယူခဲ့သည့် စစ်ကောင်စီက ကျင်းပမည့် ရွေးကောက်ပွဲဝင်ရန် စိတ်ကူးခြင်းမှာ ဓားပြဆီက ဝေစုတောင်းသည့် ပုံစံနှင့် အတူတူပင်ဖြစ်ကြောင်း ၈၈မျိုးဆက်ကျောင်းသားခေါင်းဆောင် ဦးမင်းကိုနိုင်က ပြောသည်။

အမျိုးသားညီညွတ်ရေးအစိုးရ၏ PVTV သတင်းဌာနနှင့် တွေ့ဆုံမေးမြန်းဆွေးနွေးခန်း၌ ဦးမင်းကိုနိုင်က ထိုသို့ ပြောဆိုခဲ့ခြင်းဖြစ်သည်။

ရွေးကောက်ပွဲ ရလဒ်ထွက်ပြီးသားကို စစ်ကောင်စီတပ်က ဖျက်ဆီးခဲ့ခြင်းကို မမေ့ရန် ဦးမင်းကိုနိုင်က သတိပေးသည်။

“ဖက်စစ်က ရွေးကောက်ပွဲ လုပ်တယ်ဆိုတာဒါကကိုယ်အရေးကြုံတော့မှ သေခါနီးတော့မှ ထပြီးတော့မှကယောင်ကတမ်းနဲ့ရွတ်တဲ့ဂါထာမျိုးပဲ အဲဒါထက်မပိုဘူး” ဟု ၎င်းက ဆက်​ပြောသည်။

Public Service Announcement

ထို့ပြင် စစ်ကောင်စီသည် ပြည်သူလူထု အာဏာကိုလုခဲ့သည့် ဓားပြများဖြစ်ပြီး ယင်းဓားပြများက ရွေးကောက်ပွဲ ကျင်းပပြီးဝေစုခွဲပေးမည်ဟု ပြောခြင်းနှင့်အတူတူပင်ဖြစ်ကြောင်း ဦးမင်းကိုနိုင်က ပြောသည်။

“အဲဒီရွေးကောက်ပွဲသွားဝင်မယ်လို့စိတ်ကူးမိတာက ဓားပြဆီက ဝေစုတောင်းမယ်ဆိုတာနဲ့အတူတူပဲ” ဟု ဦးမင်းကိုနိုင်က ပြောသည်။

လက်ရှိတွင် စစ်ကောင်စီတပ်သည် ချောင်ပိတ်မိနေပြီဖြစ်ပြီး ၎င်းတို့ အနေဖြင့် မည်ကဲ့သို့ အရေခွံလဲသည်ဖြစ်စေ၊ လှည့်စားသည်ဖြစ်စေ ဘက်ပေါင်းစုံ၌ ရှုံးနိမ့်နေပြီဖြစ်သည်ဟု ဦးမင်းကိုနိုင်က ပြောသည်။

ထို့ကြောင့် ပြည်သူလူထုအနေဖြင့်မည်သည့်နည်း၊မည်သည့်အကြောင်းနှင့်မျှ အားလျှော့ခြင်း၊ တွေဝေခြင်း ပြု၍မရကြောင်း ၎င်းက ပြောသည်။

“ပွဲကိုအကြာခံလို့မရဘူးဒါပါပဲ အရေးကြီးဆုံးက” ဟု ဦးမင်းကိုနိုင်က ပြောသည်။