ရန်ကုန်တိုင်း၊ မှော်ဘီမြို့နယ် လိပ်ပုတ်ကျေးရွာအုပ်စု၊ အမှတ် (၄)လမ်းမကြီးရှိ Grand Royal အရက်ချက်စက်ရုံသည် ယနေ့ ညနေ ၃နာရီကျော်က စတင်လောင်ကျွမ်းခဲ့ရာ ည ၈နာရီခွဲကျော်မှသာ မီးထိန်းနိုင်ခဲ့ကြောင်း မြန်မာနိုင်ငံမီးသတ်တပ်ဖွဲ့က ထုတ်ပြန်သည်။
အဆိုပါ မီးလောင်ကျွမ်းမှုမှာ အချိန် ၅ နာရီကျော် ကြာမြင့်ခဲ့ပြီး အရက်ချက်စက်ရုံအတွင်းရှိ အရက်ပေပါအချို့ ပေါက်ကွဲမှုကြောင့် မီးသတ်တပ်ဖွဲ့ဝင်နှင့် လူမှုကူညီရေးအဖွဲ့ဝင် စုစုပေါင်း ၁၀ ဦးကျော် ထိခိုက်ဒဏ်ရာရရှိခဲ့ကြောင်း ဒေသခံပရဟိတအဖွဲ့က ဆိုသည်။
” အရက်ချက်စက်ရုံ အတွင်းပိုင်းက ပေါက်ကွဲမှုကြောင့်ရော၊ မီးခိုးမွှန်ပြီး အသက်ရှုကြပ်တာတွေ ကြောင့် ၁၀ ဦးကျော်လောက် ထိခိုက်ဒဏ်ရာရရှိခဲ့ပါတယ်။ မီးသတ်တပ်ဖွဲ့ဝင်တွေ များပါတယ်။ သူတို့ အားလုံးကို ဆေးရုံကိုပို့ပြီး ကုသမှုခံယူနေကြပါတယ်။ ဒဏ်ရာအခြေအနေကိုတော့ သေချာမသိရသေးပါဘူး “ဟု ၎င်းက ပြောသည်။
Grand Royal အရက်ချက်စက်ရုံ မီးလောင်ကျွမ်းနေရာ မီးငြှိမ်းသတ်မှု အဆင့်(၃) သတ်မှတ်ခဲ့ရပြီး ည ၈နာရီ ၃၇ မိနစ်အချိန်တွင် မီးထိန်းနိုင်ခဲ့ကြောင်း မြန်မာနိုင်ငံမီးသတ်တပ်ဖွဲ့က ထုတ်ပြန်ထားသည်။
Public Service Announcement
လက်ရှိတွင် မီးလောင်ကျွမ်းမှု စတင်ဖြစ်ပွားသည့် အကြောင်းအရင်းကိုမူ ထုတ်ပြန်ထားခြင်း မရှိသေးပေ။
