ပြည်သူ ၃၆ဦးသေဆုံးခဲ့ပြီး ၅၀ကျော် ဒဏ်ရာရ၊ ကျောင်း၊ ဆေးရုံးနှင့် နေအိမ်များစွာ ပျက်စီးခဲ့
အာဏာသိမ်းပြီးနောက်ရက်ပေါင်း(၇၅၁) ရက်အတွင်း အာဏာသိမ်းအကြမ်းဖက်စစ်ကောင်စီတပ်များက ကရင်အမျိုးသားအစည်းအရုံး(KNU) နယ်မြေရှိ အပြစ်မဲ့အရပ်သား ပြည်သူများကို ပစ်မှတ်ထားပြီးလေကြောင်း တိုက်ခိုက်မှုအကြိမ် ၃၀၀ ကျော်ပြုလုပ်ခဲ့သည်ဟု KNU ဗဟိုက ယနေ့ထုတ်ပြန်သည်။
KNU ကော်သူးလေအုပ်ချုပ်နယ်မြေခရိုင် (၇) ခရိုင်အတွင်း နေထိုင်သောအပြစ်မဲ့အရပ်သား ပြည်သူများအားပစ်မှတ်ထားပြီး လေကြောင်းတိုက်ခိုက်မှု စုစုပေါင်း (၃၀၇)ကြိမ်ခန့်ပြုလုပ်ခဲ့သည်ဟု ဆိုသည်။
ယခုထုတ်ပြန်သည့်အရေအတွက်သည် အရပ်သားပြည်သူများအား ပစ်မှတ်ထားပြီးတိုက်ခိုက်ခဲ့သော လေကြောင်းတိုက်ခိုက်မှုများသာဖြစ်ပြီး တပ်ပိုင်းဆိုင်ရာသို့ လာရောက် တိုက်ခဲ့သော လေကြောင်းတိုက်ခိုက်မှုများအား ထည့်သွင်းရေတွက်ထားခြင်းမရှိကြောင်း အသိပေးထားသည်။
ထိုသို့ လေကြောင်းတိုက်ခိုက်ခံရ၍ အပြစ်မဲ့အရပ်သားပြည်သူ ၅၇ဦးထိခိုက်ဒဏ်ရာရရှိခဲ့ပြီး (၃၆) ဦး သေဆုံးခဲ့ရကြောင်း ဖော်ပြသည်။
Public Service Announcement
ထို့ပြင် နေအိမ် (၂၅၈)လုံး၊ စာသင်ကျောင်း (၁၂) ကျောင်း၊ ဆေးရုံ (၆) လုံး၊ ပြည်သူပိုင်အဆောက် အဦး (၃၅) လုံး၊ ဘုန်းကြီးကျောင်း (၄) ကျောင်း၊ သီလရှင်ကျောင်း (၁) ကျောင်း၊ ခရစ္စယာန်ဘုရားကျောင်း (၈)ကျောင်းတို့ ထိခိုက်ပျက်စီးခဲ့ကြောင်း KNUက ထုတ်ပြန်သည်။
ယခုကဲ့သို့ စစ်ကောင်စီ၏ လေကြောင်းတိုက်ခိုက်မှု အသေးစိတ်အချက်အလက်များကို KNUမှ မကြာခင် ထုတ်ဝေမည့် လူ့အခွင့်အရေးအစီရင်ခံစာတွင် အသေးစိတ်ထည့်သွင်းဖော်ပြ သွားမည်ဟု အသိပေးထားသည်။
