စစ်ကောင်စီတပ်၏ နှစ်ရက်ဆက်တိုက် လေကြောင်းပစ်ခတ်မှုကိုခံထားရသည့် အရာတော်မြို့နယ်တောင်ပိုင်းတွင် ဒေသခံပြည်သူ ၅,၀၀၀ဦးကျော် အိုးအိမ်စွန့်ခွာထွက်ပြေးနေကြရကြောင်း အရာတော်မြို့နယ်ပြည်သူ့ကာကွယ်ရေးအဖွဲ့(ပကဖ)က People’s Spring သတင်းဌာနသို့ ပြောသည်။
ဖေဖော်ဝါရီ ၂၂ ရက်နှင့် ၂၃ရက်တို့တွင် စစ်ကောင်စီတပ်က စစ်ဘက်သုံးရဟတ်ယာဥ် Mi35 များအသုံးပြု၍ အရာတော်မြို့နယ်တောင်ပိုင်းရှိ ကျေးရွာများအား လေကြောင်းပစ်ခတ်မှုများ လုပ်ဆောင်ခဲ့ခြင်းကြောင့် မင်းရွာကြီး၊ မလဲသာ၊ ကန်ရင်း၊ ညောင်ပင် စသည့်ကျေး ရွာများမှ ဒေသခံပြည်သူများ ထွက်ပြေးတိမ်းရှောင်နေရခြင်း ဖြစ်သည်။
“လက်ရှိအချိန်ထိတော့ ပြည်သူထိခိုက်မှု မရှိသေးဘူးဗျ။ မလဲသာကို မနေ့က Mi17 ရဟတ်ယာဥ်နဲ့ လေးခေါက်ချထားတယ်။ စုစုပေါင်း တပ်ရင်းတစ်ရင်းစာလောက်အင်အားရှိတယ်။ အခုလောလောဆယ် မလဲသာ၊ ကန်ရင်း၊ ညောင်ပင်ပေါ့နော် အဲဒီရွာတွေက ကပ်နေတာပေါ့နော်။ အဲဒီရွာတွေထဲမှာ သူတို့ နေရာယူထားတယ်ဗျ။ ပြီးတော့ မင်းရွာကြီးဘက်မှာ စစ်ကြောင်းတစ်ခုရှိတယ်ဆိုတော့ အားလုံးစစ်ကြောင်းနှစ်ခု”ဟု အရာတော်(ပကဖ) မှ တာဝန်ရှိသူတစ်ဦးက People’s Spring သို့ ပြော သည်။
အဆိုပါ အရာတော်တောင်ပိုင်းသို့ ရောက်ရှိနေသည့်စစ်ကြောင်းနှစ်ခုတွင် မလဲသာ၊ ကန်ရင်းစသည့်ကျေးရွာများ၌ အထိုင်ချထားသည့်စစ်ကြောင်းသည် ရဟတ်ယာဥ်ဖြင့် လေးကြိမ်ချပေးခဲ့သော အင်အား ၁၂၀ခန့်ပါ စစ်ကြောင်းနှင့် မင်းရွာကြီး၌ အထိုင်ချထားသော စစ်ကြောင်းမှာ အင်အား ၇၀ကျော်ရှိနိုင်သည်ဟု ၎င်း ပ.က.ဖ တာဝန်ရှိသူက ဆက်ပြောသည်။
Public Service Announcement
စစ်ကောင်စီတပ်များ အရာတော်တောင်ပိုင်းသို့ စတင်စစ်ကြောင်းထိုးသည့် ဖေဖော်ဝါရီ ၂၁ ရက်ကတည်းက ဒေသအခြေစိုက် တော်လှန်ရေးပူးပေါင်းတပ်များနှင့် ထိတွေ့တိုက်ပွဲများ ဆက်တိုက်ဖြစ်ပွားလျှက်ရှိရာ ယနေ့(ဖေဖော်ဝါရီ ၂၄) အထိ စစ်ကောင်စီတပ်မှ ၁၅ဦးခန့် သေဆုံးပြီး တော်လှန်ရေးတပ်ဖွဲ့များဘက်မှလည်း ထိခိုက် ကျဆုံးမှုအချို့ရှိနေကြောင်း အရာတော်(ပကဖ) က ရှင်းပြသည်။
“သူတို့ဘက်က ထိခိုက်ကျဆုံးမှု များတယ်ဗျ။ များလို့ပဲ လေကြောင်းပစ်ကူတွေ ယူတာပေါ့။ ပုံမှန်အခြေအနေမှာ စစ်ကြောင်းထိုးတယ်ဆိုရင် လေကြောင်းကပစ်တာ မရှိခဲ့ဘူး”ဟု အရာတော် (ပကဖ)မှ တာဝန်ရှိသူတစ်ဦးက သုံး သပ်သည်။
လက်ရှိအခြေအနေတွင် စစ်ကောင်စီတပ်နှင့် ဒေသတော် လှန်ရေးပူးပေါင်းတပ်ဖွဲ့များကြား တိုက်ပွဲများဆက်တိုက်ဖြစ်ပွားလျှက်ရှိရာ တော်လှန်ရေးတပ်များတွင် ကျည်နှင့် လက်နက်ခဲယမ်း လိုအပ်ချက်ရှိနေပြီး ဘေးလွတ်ရာထွက်ပြေးနေကြရသော ဒေသခံပြည်သူများမှာလည်း စားဝတ်နေရေး လိုအပ်ချက်များရှိနေကြောင်း စုံစမ်းသိရသည်။
