နေအိမ် ၁၅၀ခန့် မီးရှို့ဖျက်ဆီးခံရပြီး အမျိုးသမီးတစ်ဦးအား အဓမ္မပြုကျင့်သွားဟုဆို
စစ်ကိုင်းတိုင်း၊ ယင်းမာပင်မြို့နယ်၊ မြောက်နုံးကျေးရွာတွင် စစ်ကောင်စီတပ်က ဒေသခံပြည်သူနှစ်ဦးအားသတ်ဖြတ်ကာ အမျိုးသမီးတစ်ဦးအား အဓမ္မပြုကျင့်မှုပြုလုပ်ခဲ့ကြောင်း ဒေသတွင်းသတင်းရင်းမြစ်များက ပြောသည်။
ထို့အပြင် နေအိမ် ၁၅၀ခန့်ကိုလည်း မီးရှို့ဖျက်ဆီးသွားကြောင်း ၎င်းတို့က ပြောသည်။
မတ်လ ၃ရက် မွန်းလွဲ ၁နာရီခန့်က မြောက်နုံးကျေးရွာကို စစ်အုပ်စုက သေနတ်ပစ်ဖောက် ဝင်ရောက်ခဲ့ပြီး ညအိပ်နေထိုင်တပ်စွဲခဲ့ကာ မြောက်နုံးကျေးရွာရှိ နေအိမ် ၁၅၀ခန့်ကို မီးရှို့ဖျက်ဆီးခဲ့ကြောင်း၊ ထို့နောက် စိတ်ကျန်းမာရေးမကောင်းသည့် အသက်(၅၀)အရွယ်ခန့် ဦးဖိုးနီဆိုအားသတ်ဖြတ်ခဲ့ကြောင်း ဒေသခံများက ပြောသည်။
ထို့နောက် မီးရှို့ခံထားရသည့် ရုပ်အလောင်း တစ်လောင်းလည်း ထပ်မံတွေ့ရှိခဲ့ရကြောင်း၊ ထို့အပြင် မြောက်နုံးကျေးရွာရှိ အမျိုးသမီးတစ်ဦးကိုလည်း အဓမ္မပြုကျင့်သွားခဲ့ကြောင်း ယင်းမာပင်မြို့နယ်သတင်းမှန်ပြန်ကြားရေးအဖွဲ့က အသိပေးသည်။
Public Service Announcement
“အဓမ္မပြုကျင့်ခံရတဲ့ အမျိုးသမီးက အသက်(၂၅) ဝန်းကျင်ပါ။ သူအခု ပျောက်နေပါတယ်။ ရန်သူ စကစကောင်တွေ သုံးသွားတဲ့ ကွန်ဒုံးပါတွေ့တယ်”ဟု ယင်းမာပင်အခြေစိုက် မြောက်ယမားပြည်သူ့ကာကွယ်ရေးတပ်ဖွဲ့၏ တာဝန်ခံတစ်ဦးက ပြောသည်။
ထို့အပြင် စစ်အုပ်စုသည် ယမန်နေ့ နံနက် ၁၀နာရီခွဲခန့်တွင် သပြေအေးကျေးရွာသို့ ဆက်လက်စစ်ကြောင်းထိုးသွားပြီး ဝါးစိမ်းတောင်ပေါ်၌ ညအိပ်တပ်စွဲခဲ့ကြောင်း သိရသည်။
စစ်ကောင်စီတပ်သည် ဖေဖော်ဝါရီ ၂၂ရက်မှစ၍ ယနေ့အထိ ယင်းမာပင်မြို့နယ်အတွင်း စစ်ကြောင်းထိုးလှည့်လည်ကာ မီးရှို့ဖျက်ဆီးခြင်း၊ ပြည်သူ များအား သတ်ဖြတ်ခြင်းများ ပြုလုပ်နေပြီး မီးဘေးသင့်နှင့် စစ်ရှောင်ပြည်သူများ အကူအညီအများအပြားလိုအပ်နေကြောင်း သိရသည်။
