စစ်အာဏာရှင်စနစ်အမြစ်ပြတ်ချေမှုန်း နိုင်ရေးအတွက် နိုင်ငံရေး၊ စစ်ရေး ကိစ္စရပ်များတွင် အတူတကွ ပူးပေါင်းဆောင်ရွက် တိုက်ပွဲဝင်ရန် ဆန္ဒပြင်းပြစွာရှိပါကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်က ကိုးကန့်တပ် MNDAAထံ သဝဏ်လွှာပေးပို့လိုက်သည်။
ယနေ့ကျရောက်သည့် မြန်မာအမျိုးသားဒီမိုကရက်တစ် မဟာမိတ်တပ်မတော် (MNDAA) တည်ထောင်ခြင်း (၃၄)နှစ်မြောက်နေ့သို့ ကာကွယ် ရေးဝန်ကြီးက သဝဏ်လွှာပေးပို့ခဲ့ခြင်းဖြစ်သည်။
၁၉၈၉ မှ စတင်တည်ထောင်ခဲ့သည့် MNDAA အနေဖြင့် တော်လှန်ရေး သက်တမ်း (၃၄)နှစ်အတွင်း အခက်အခဲများစွာအကြား မားမားမတ်မတ် ရပ်တည်နိုင်ခဲ့၍ လေးစားတန်ဖိုးထားကြောင်း NUG ကာကွယ်ရေးဝန်ကြီးက ဆိုသည်။
အဆိုပါကာလအတွင်း ကိုးကန့်ဒေသနှင့်ကိုးကန့် လူထုအတွက် အသက်ပေးလှူ သွားခဲ့ကြသည့် မိတ်ဆွေ ရဲဘော်ရဲဘက်များနှင့် ၎င်းတို့၏ ဂုဏ်ရောင်ပြောင်စွာ ကြိုးပမ်းဆောင်ရွက်ခဲ့မှုများကိုလည်း ဂုဏ်ပြုဦးညွှတ်သည်ဟု ဖော်ပြထားသည်။
Public Service Announcement
ထိုကဲ့သို့ မြင့်မြတ်စွာ အသက်ပေးလှူခဲ့ကြသည့် ကိုးကန့် ရဲဘော်ရဲဘက်များနှင့် ပြည်ထောင်စု တဝှမ်းမှ ရဲဘော်ရဲဘက်များ၏ မျှော်ရည်ချက်များ ဖြစ်သော အမျိုးသား တန်းတူရေး၊ ကိုယ်ပိုင်ပြဋ္ဌာန်းခွင့်ရရှိရေးနှင့်ဒီမိုကရေစီရေး တို့မှာလည်း စစ်အာဏာရှင် အစဉ်အဆက်နှင့် စစ်အာဏာရှင်စနစ်တို့ကြောင့် ယနေ့ထက်တိုင် ပိုင်ဆိုင်နိုင်ခွင့် မရရှိသေးကြောင်း သဝဏ်လွှာ၌ ပါရှိသည်။
ထို့ကြောင့် အမျိုးသားညီညွတ်ရေးအစိုးရအနေဖြင့် စစ်အာဏာရှင်စနစ်အပါအဝင် အာဏာရှင်စနစ်မှန်သမျှကို အမြစ်ပြုတ် တိုက်ဖျက်နိုင်ပြီး ဒီမိုကရေစီရေး၊ အမျိုးသား တန်းတူရေးနှင့်ကိုယ်ပိုင်ပြဋ္ဌာန်းခွင့် အခွင့်အရေးများကို အပြည့်အဝ အာမခံနိုင်သော ခိုင်မာသည့် ဖက်ဒရယ်ဒီမိုကရေစီ ပြည်ထောင်စုကို ထူထောင်နိုင်ရန် အစဉ်တစိုက် ကြိုးပမ်းလျက် ရှိပြီး MNDAA နှင့် လက်တွဲဆောင်ရွက်လိုကြောင်း အသိပေးထားသည်။
