အနက်ရောင်စစ်ဆင်ရေး အရှိန်မြှင့်နေ၍ ညနေ ၅ နာရီနောက်ပိုင်း အပြင်မထွက်ကြရန် မုံရွာအခြေစိုက် PDFအဖွဲ့များ သတိပေး
စစ်ကိုင်းတိုင်း၊ မုံရွာမြို့ နည်းပညာကောလိပ် (GTC) ကျောင်းဝင်ပေါက်ရှိ ကင်းစောင့် စစ်ကောင်စီတပ်ဂိတ်ကို ပစ်ခတ်တိုက်ခိုက်ရာ ၅ဦးသေဆုံးကြောင်း Area 71 PDF Monywa One Local People Defence Forceအဖွဲ့ သတင်းနှင့် ပြန်ကြားရေးတာဝန်ခံက ပြောသည်။
ယနေ့ (မတ်လ ၁၃ရက်)နံနက် ၁၁ နာရီခန့်က မုံရွာမြို့၊ GTCကျောင်း ဝင်ပေါက်တွင် ကင်းချထားသော စစ်ကောင်စီတပ်ဖွဲ့ဝင်များကို ညီနောင် ငါးဖွဲ့က ကားပေါ်မှပစ်ခတ်တိုက်ခိုက်ခဲ့ကြောင်းArea 71 PDF Monywa One Local People Defence Force အဖွဲ့က အသိပေးသည်။
ကင်းစောင့်နေသော စစ်ကောင်စီတပ်သားများမှာ ပြန်လည်ပစ်ခတ်ချိန်မရဘဲ ငါးဦးမှာ နေရာပင် ပွဲခြင်းပြီး သေဆုံးသည်ကို တွေ့ရှိခဲ့ကြောင်း Area 71 PDF အဖွဲ့က ပြောသည်။
ပစ်ခတ်တိုက်ခိုက်အပြီးတွင် မုံရွာမြို့ အနောက်မြောက်တိုင်း စစ်ဌာနချုပ်(နမခ)မှ သံပြားကာ နှစ်စီး အင်အားအပြည့်ဖြင့် မုံရွာမြို့ တောင်ဘက် ထွက်ရှိလာ၍ စစ်ဆင်ရေးရဲဘော်များဆုတ်ခွာခဲ့ရာ အထိအခိုက်မရှိဘဲ လုံခြုံသည့်နေရာသို့ ရောက်ရှိနေပြီဖြစ်ကြောင်း Area 71 PDF အဖွဲ့က အသိပေးသည်။
Public Service Announcement
ဖြစ်စဥ်နှင့်ပတ်သက်၍ Area 71 PDF အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
စစ်ကောင်စီတပ်၏ ထိခိုက်သေဆုံးမှုကိုလည်း ထပ်မံအတည်ပြုနိုင်ခြင်း မရှိသေးပေ။
“ မနက်က ဝင်ပစ်သွားတယ်ကြားတယ်။ ပစ်တာကတော့နေ့တိုင်းလိုလိုပဲ။ အခုနေ့လယ်ပိုင်းကို စီးပွားရေးဘဏ်နား တစ်ချက်ဖောက်တာကြားလိုက်တယ်။” ဟု မုံရွာမြို့ခံတစ်ဦးက ပြောသည်။
အဆိုပါစစ်ဆင်ရေးကို Area71PDF Monywa One Local People Defence Force၊ Burma Independence Army၊ Ronin Thirteen People’s Force၊ Yuoth Revolation Attack Force၊Monywa People’s Liberation Force အဖွဲ့(၆)ဖွဲ့ ပူးပေါင်းတိုက်ခိုက်ခဲ့ကြောင်း အသိပေးထားသည်။
မုံရွာမြို့တွင် အနက်ရောင်စစ်ဆင်ရေးအရှိန်တိုးမြှင့်နေ၍ ညနေ၅ နာရီနောက်ပိုင်း အပြင်မထွက်ကြရန် မုံရွာအခြေစိုက် PDFအဖွဲ့များက သတိပေးကြေညာသည်။
မတ်လ ၉ ရက် နံနက်ပိုင်းကလည်း မုံရွာမြို့စက်မှုဇုန်လမ်းခွဲတွင် ကင်းပုန်းဝပ်နေသော စစ်ကောင်စီတပ်ဖွဲ့ဝင် သုံးဦးအား သွားရောက်ပစ်ခတ်တိုက်ခိုက်ရာ နှစ်ဦးသေဆုံးပြီး တစ်ဦးခြေထောက်ထိမှန်သွားကြောင်းGolden Eagle Force အဖွဲ့က ထုတ်ပြန်ထားသည်။
