လောင်းလုံးမြို့နယ်ရှိ ကျေးရွာနှစ်ရွာအား စစ်တပ်က မီးရှို့ဖျက်ဆီး

လူငယ်တစ်ဦး ပစ်သတ်ခံရပြီး ငါးဦးဖမ်းဆီးခံရဟုဆို

တနင်္သာရီတိုင်း ထားဝယ်ခရိုင် လောင်းလုံးမြို့နယ်တွင် စစ်ကောင်စီတပ်က ကျေးရွာနှစ်ရွာအား မီးရှို့ဖျက်ဆီးခဲ့ခြင်းကြောင့် နေအိမ် ၁၅၀ခန့် မီးလောင်ဆုံးရှုံးသွားကြောင်း လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့(LLPDF)က People’s Spring သတင်းဌာနသို့ ပြောသည်။

အင်အား (၅၀)ခန့်ပါ စစ်ကောင်စီတပ်စစ်ကြောင်းသည် မတ် ၂၁ ရက် နေ့လယ်ပိုင်းက ကျောက်မတ်တပ်ကျေးရွာဘက်မှ ရောက်ရှိလာပြီး ညောပြင်ကျေးရွာသို့ဝင်ရောက်ကာ နေအိမ် ၁၀၀ခန့်အား မီးရှို့ဖျက်ဆီးသွားသည်ဟု ဆိုသည်။

ယင်းနောက် စစ်ကောင်စီတပ်များ ညောပြင်ရွာမှအပြန်တွင် အောက်ကျောက်ဝပ်ကျေးရွာသို့ဝင်ရောက်ကာ နေအိမ် ၅၀ခန့်အား မီးရှို့ဖျက်ဆီးသည့်အပြင် လူ ငယ်တစ်ဦးအား ဖမ်းဆီးသတ်ဖြတ်ခဲ့ကြောင်း ဒေသခံများက ပြောသည်။

အလားတူ မတ်လ ၂၂ ရက်တွင်လည်ူ စစ်ကောင်စီတပ်များက လောင်းလုံးနယ် နခံတောရွာမှ ဒေသခံပြည်သူငါးဦးကို ဖမ်းဆီးသွားပြီး မည်သည့်အတွက် ယခုလိုဖမ်းဆီးသွားသည်ကို မသိရသေးပေ။

Public Service Announcement

မတ်လ ၄ ရက်ကလည်း ကျောက်နီမှော်ဘက်မှလာသော စစ်ကောင်စီတပ်က အောက်ကျောက်ဝပ်ရွာမှ ဒေသခံပြည်သူခြောက်ဦးအား ဖမ်းဆီးနှိပ်စက်ကာ ငါးဦးကို ရက်ရက်စက်စက်သတ်ဖြတ်ခဲ့သေးသည်။