ကချင်ပြည်နယ် ရွှေကူမြို့ပေါ်ရှိ စစ်ကောင်စီတပ်စွဲရာနေရာကို ကချင်လွတ်လပ်ရေးတပ်မတော် (KIA) တပ်ရင်း(၁၂) ရဲဘော်များက ယမန်နေ့ညပိုင်းတွင် လာရောက်တိုက်ခိုက်ခဲ့ဟု ဒေသခံက ပြောသည်။
“ညတုန်းက ရွှေကူမြို့ထဲကို ဝင်ထုတယ်။ ပြောတယ်။ အထိအခိုက်တော့ မကြားသေးဘူး။ အခုက မီးရှို့တဲ့ စစ်တပ်က မံဝိန်းမှာတဲ့။ ညက ဟာကျတော့ KIA ရင်း (၁၂)က လာထုတာတဲ့ မြို့ထဲကို”ဟု ဒေသခံက ပြောသည်။
ယမန်နေ့ညပိုင်းက ပစ်ခတ်မှုသည် ရွှေကူရဲစခန်းအနီးဖြစ်သည်ဟု ဒေသခံအချို့က လူမှုကွန်ရက်တွင် အသိပေးထားသည်။
စစ်ကောင်စီတပ်က ရွှေကူမြို့နယ်ရှိ ကျေးရွာများကို စစ်ကြောင်းထိုး ဝင်ရောက်ပြီး မီးရှို့ဖျက်ဆီးမှုများ လုပ်ဆောင်လျက်ရှိသည်ဟု ဒေသခံက ပြောသည်။ အဆိုပါ စစ်ကောင်စီတပ် စစ်ကြောင်းများကို ဒေသခံကာကွယ်ရေးတပ်နှင့် KIA ပူးပေါင်းတပ်များက ခုခံတိုက်ခိုက်လျက်ရှိရာ ရွှေကူမြို့နယ်အတွင်း တိုက်ပွဲများဖြစ်ပွားနေသည်ဟု ဆိုသည်။
Public Service Announcement
မတ်လ ၃၀ရက်က စစ်ကောင်စီတပ်က ရွှေကူမြို့နယ် မံဝိန်းရွာ ကို လေကြောင်းမှ ဗုံးကြဲတိုက်ခိုက်ခဲ့၍ ပြည်သူလူထု နေအိမ် နှစ်လုံးမီးလောင်ပျက်စီး ခဲ့သည်ဟု ရွှေကူ PDFက အသိပေးသည်။
ထို့ပြင် စစ်ကောင်စီ၏ တပ်မ(၈၈)လက်အောက်ခံ စစ်ကြောင်းများက မံဝိန်းရွာကို မီးရှို့ဖျက်ဆီးခဲ့ကြောင်း ဖော်ပြသည်။
ယမန်နေ့ လေကြောင်း တိုက်ခိုက်မှုတွင် တော်လှန်ရေးရဲဘော်များ ကြီးမားသည့် ထိခိုက်မှုတစုံတရာမရှိဘဲ ဆက်လက်တိုက်ပွဲဝင်လျက်ရှိကြောင်း၊ အကြမ်းဖက် လမ်းစဉ်မျိုးစုံသုံးကာ ပြည်သူ့ အသက်အိုးအိမ်များကို ဖျက်ဆီးနှောက်ယှက်နေသော စစ်အုပ်စုကို ယခုထက်ပိုပြင်းထန်စွာ တိုက်ခိုက်ချေမှုန်းသွားမည်ဖြစ်ကြောင်း ရွှေကူ PDFက ထုတ်ပြန်ထားသည်။
ရွှေကူနယ်တွင် မတ်လ ၂၀ရက်နောက်ပိုင်း စစ်ကောင်စီတပ်က စစ်ကြောင်းထိုး ဝင်ရောက်လာ၍ တိုက်ပွဲပြင်းထန်နေရာ စစ်ကောင်စီတပ်က အထိနာခဲ့ကြောင်း၊ စစ်ကောင်စီဘက်က သေဆုံးသူများအနက် ဗိုလ်မှူးအဆင့်ရှိ ဒုစစ်ကြောင်းမှူးတစ်ဦး ပါဝင်သည်ဟု သိရကြောင်း ဒေသခံတစ်ဦးက ပြောကြားထားသည်။
