▪︎အချိန်ပိုင်းအလိုက်ထုတ်ပြန်ပေးမည့်မုန်တိုင်းခန့်မှန်ချက်များကို ဂရုပြုနားထောင်ပြီးလိုအပ်သည့် ကြိုတင်ပြင်ဆင်မှုများ ပြုလုပ်ထားရန်တိုက်တွန်း
ဘင်္ဂလားပင်လယ်အော်တွင်မေ ၁၁ရက်ပတ်ဝန်းကျင်၌ မုန်တိုင်းဖြစ်လာနိုင်ပြီး မုန်တိုင်းဦးတည်တိုက်ခတ်မည့်လမ်းကြောင်းကို မိုးလေဝသအေဂျင်စီနှစ်ခုတွက်ချက်ခန့်မှန်းထားရာ တစ်ခုကဧရာဝတီတိုင်းနှင့်ရန်ကုန်တိုင်းကြားဖြတ်သန်းမည်ခန့်မှန်းပြီး၊အခြားတစ်ခုက မောင်တော(မြန်မာ)နှင့်စစ်တကောင်း(ဘဂ်လာဒေရှ်)ကြားဖြတ်သန်းမည်ဟုခန့်မှန်းထားကြောင်းNUG ကထုတ်ပြန်သည်။
ဘင်္ဂလားပင်လယ်အော်တွင် မေလ ၈ရက်ခန့်မှစ၍ လေဖိအားနည်းရပ်ဝန်းဖြစ်လာနိုင်ပြီး မေ ၁၁ရက် ဝန်းကျင်တွင် ဆိုင်ကလုန်းမုန်တိုင်းအဆင့်အထိ အားကောင်းလာနိုင်သည်ဟုအမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေး ဝန်ကြီးဌာန(MOHADM)က မေလ ၅ရက်ညတွင် ထုတ်ပြန်ထားသည်။
မိုးလေဝသအေဂျင်စီနှစ်ခုဖြစ်သောအာရှဒေသဆိုင်ရာမိုးလေဝသခန့်မှန်းရေးဗဟိုဌာန( GFS Model )နှင့်ဥရောပကာလလတ် မိုးလေဝသခန့်မှန်းရေးဗဟိုဌာန( ECMWF Model )တို့၏ မုန်တိုင်းလမ်ကြောင်း ခန့်မှန်းချက်မတူညီမှုကို NUG ကနှိုင်းယှဥ်ဖော်ပြသည်။ မုန်တိုင်းဦးတည်ရာ မတူညီသော်လည်း တစ်ခုမှာမြန်မာနိုင်ငံဦးတည်ပြီး၊ ကျန်တစ်ခုမှာ မြန်မာနှင့် ဘင်္ဂလားဒေရှ်နိုင်ငံကြားဦးတည်နေခြင်းဖြစ်၍ မည်သည့်ခန့်မှန်းချက်အတိုင်းမှန်သည်ဖြစ်စေ မုန်တိုင်းသက်ရောက်မှု အနည်းနှင့်အများကြုံရတော့မည်ဟုခန်းမှန်းတွက်ချက်မှုများအရသိရသည်။
အာရှဒေသဆိုင်ရာ မိုးလေဝသခန့်မှန်းရေးဗဟိုဌာန (GFS Model) ၏ ခန့်မှန်းချက်အရ လေဖိအားနည်းရပ်ဝန်းသည် မေလ ၁၁ ရက်နေ့တွင် မုန်တိုင်းအဆင့်ရောက်ရှိပြီး မေလ ၁၂ ရက်နေ့တွင် ရခိုင်ကမ်းရိုးတန်းနှင့်အပြိုင် မြောက်ဘက်သို့ဆက်တက်နိုင်ကြောင်းတွက်ချက်ထားသည်။ထိုနောက်မေလ ၁၃ ရက်နေ့တွင်မုန်တိုင်းအဆင့်ဖြင့် မြန်မာ(မောင်တော)နှင့် ဘင်္ဂလားဒေရှ့်(စစ်တကောင်း) ကြားသို့ ဖြတ်ကျော်နိုင်ကြောင်းခန့်မှန်းထားသည်။ မေလ ၁၄ ရက်နေ့တွင် ကမ်းသို့ဖြတ်ကျော်ပြီး မုန်တိုင်း ပျက်ပြယ်သွားမည်ဟုတွက်ချက်ခန့်မှန်းထားသည်။
Public Service Announcement
ဥရောပကာလလတ် မိုးလေဝသခန့်မှန်းရေးဗဟိုဌာန (ECMWF Model) ၏ ခန့်မှန်းချက်တွင်မူ မေလ ၁၁ ရက်နေ့၌ လေဖိအားနည်းစတင်ဖြစ်ပေါ်၍ မေလ ၁၂ ရက်နေ့တွင် ကပ္ပလီကျွန်းစုအနီး၌ မုန်တိုင်းငယ်အဆင့်သို့ရောက်ရှိမည်ဖြစ်ပြီး မြစ်ဝကျွန်းပေါ်သို့ ဦးတည်နိုင်ကြောင်းခန့်မှန်း သည်။ မေလ ၁၃ ရက်နေ့တွင် ဧရာဝတီတိုင်း လပွတ္တာခရိုင်၊ ကိုင်းသောင်ကျွန်းအနီးမှ အရှေ့မြောက်သို့ဆက်ရွေ့ပြီး ဧရာဝတီတိုင်းနှင့် ရန်ကုန်တိုင်းကြားသို့ ဖြတ်ကျော်နိုင်ကြောင်း တွက်ချက်ဖာ်ပြထားသည်။ မေလ ၁၄ ရက်နေ့တွင် ဧရာဝတီတိုင်းနှင့်ရန်ကုန်တိုင်းကြားသို့ ဖြတ်ကျော်နေဆဲဖြစ်ကြောင်း ခန့်မှန်းထားသည်။
အဆိုပါမုန်တိုင်းဖြစ်ပေါ်လာပါက မုန်တိုင်းရွေ့လျားမည့်လမ်းကြောင်း ပြောင်းလဲမှုနှင့်ခန့်မှန်းချက်များကိုဆက်လက်ထုတ်ပြန်ပေးသွားမည်ဟုလည်းNUG ၏ MOHADM (ဖေစ်ဘွခ်စာမျက်နှာ
https://www.facebook.com/mohadmNUG?mibextid=ZbWKwL
တွင်အသိပေးထားသည်။
လတ်တလောခန့်မှန်းလမ်းကြောင်းများတွင်နေထိုင်ကြသည့်ရခိုင်ကမ်းရိုးတန်း ၊ဧရာဝတီကမ်းရိုးတန်း၊မြစ်ဝကျွန်းပေါ်နှင့်ရန်ကုန်တိုင်းမှဒေသခံပြည်သူများအနေဖြင့် သတိဖြင့်နေထိုင်ကြရန်၊အချိန်ပိုင်းအလိုက်ထုတ်ပြန်ပေးနေသည့် မိုးလေဝသခန့်မှန်းချက်များကို ဂရုပြုနားထောင်ပြီး လိုအပ်သည့် ကြိုတင်ပြင်ဆင်မှုများ ပြုလုပ်ထားရန်လည်းတိုက်တွန်းထားသည်။
သို့သော်မုန်တိုင်းသတင်းနှင့်ပတ်သက်၍ လူထုကြားတွင် ကောလာဟလများလည်းပျံ့နှံ့နေပြီး မုန်တိုင်းသည် ရန်ကုန်သို့ အင်အားပြင်းပြင်း ဝင်ရောက်မည်ဟူသော ကောလဟလများလည်းထွက်နေသည်။
အဆိုပါမုန်တိုင်းသည် ဖြစ်လာနိုင်ချေများသော်လည်း ဝင်ရောက်မည့်လမ်းကြောင်းကို မခန့်မှန်းနိုင်သေးကြောင်း၊ စိုးရိမ်မှုလွန်ကဲပြီး သတင်းအမှားများကို အမှန်ဟုယူဆပြီး လူမှုကွန်ရက်၌ ဖြန့်ဝေခြင်းများ မပြုလုပ်ရန် ရာသီဥတုအရေး လေ့လာသူတစ်ဦးက မေတ္တာရပ်ခံသည်။
” တခြားအရေးကြီးတဲ့ သတင်းတွေကို မုန်တိုင်းသတင်းအမှားက ဖုံးနေပြီ။ မုန်တိုင်းတောင် မဖြစ်သေးတာကို သတင်းအမှားနဲ့ဂျင်းထည့်နေပြီ”ဟုမိုးဇလရုံးမှ CDM ဝန်ထမ်းတစ်ဦးက ပြောသည်။
