သရုပ်ဆောင်ဒေါင်း ပါဝင်ထားတဲ့ ကျောက်ဖရားမှ ဧရာဝတီသို့ ရုပ်သံဇာတ်လမ်းတွဲဟာ Nine Entertainment Awards 2023 အတွက် ဆုနှစ်ဆုဆန်ခါတင်ရွေးချယ်ခံထားသလို ထိုင်းနိုင်ငံ ရွှေရုပ်မြင်သံကြားဆုအတွက်လည်း အကောင်းဆုံး ဇာတ်ပို့ဆုအတွက် ဆန်ခါတင်ရွေးချယ်ခံထားရပါတယ်။
Nine Entertainment Awards 2023 မှာ Creative team of the year နဲ့ Drama of the year ဆု နှစ်ခုအတွက် ဆန်ခါတင်ရွေးချယ်ခံထားရတာဖြစ်ပြီး ဆုရရှိသူတွေကို ဒီနေ့ (မေ ၂၅) ည ကြေညာမှာဖြစ်ပါတယ်။
ရွှေရုပ်မြင်သံကြားက ဇာတ်ပို့ဆုအတွက်တော့ ဇွန်လ ၁၀ ရက်မှာ ကြေညာမှာပါ။
ဒီဇာတ်ကားမှာ ဒေါင်းက မြဝတီမင်းကြီးဦးစ အဖြစ်ပါဝင်သရုပ်ဆောင်ထားပြီး ထိုင်းနိုင်ငံက ပရိသတ်တွေရဲ့ အားပေးမှုရရှိထားပါတယ်။
Public Service Announcement
“မြန်မာတယောက်အနေနဲ့ leading role မှာ ပါဝင်သရုပ်ဆောင်ထားတဲ့ ဇာတ်ကားအနေနဲ့ Nomination ဝင်တာ ဒါပထမဆုံးလို့ပြောလို့ရပါတယ်။” လို့ ဒေါင်းရဲ့ အမာခံပရိသတ်တစ်ဦးကပြောပါတယ်။
သရုပ်ဆောင်ဒေါင်းက အာဏာသိမ်းခံရတဲ့ အချိန်ကတည်းက ထိုင်းနိုင်ငံမှာရောက်ရှိနေတာဖြစ်ပြီး နွေဦးတော်လှန်ရေးမှာ ပြည်သူတွေဘက်က ရပ်တည်တဲ့ အနုပညာရှင်တစ်ယောက်ပါ။
တော်လှန်ရေးအတွက် သူနဲ့ပတ်သက်တဲ့ အမှတ်တရ ပစ္စည်းတွေရောင်းချပြီး လိုအပ်တဲ့နေရာတွေကို လှူဒါန်းပေးနေသလို တော်လှန်ရုပ်ရှင်တွေမှာလည်း ပါဝင်သရုပ်ဆောင်ထားပါတယ်။
ဒါရိုက်တာလင်းလင်း ရိုက်ကူးပြီး ဒေါင်းနဲ့ ချစ်သုဝေ တို့ပါဝင်သရုပ်ဆောင်ထားတဲ့ စမှတ် ဇာတ်လမ်းတိုရုပ်ရှင်က နိုင်ငံတကာ ရုပ်ရှင်ပွဲတော်တွေမှာဆုတွေရရှိထားပါတယ်။
