ချင်းပြည်နယ်၊ ဟားခါးမြို့တွင် စစ်ကောင်စီတပ်၏စစ်ခုံရုံးက ဒေသခံပြည်သူ ၃ ဦးကို ထောင်ဒဏ် တစ်သက်တစ်ကျွန်းအပါအဝင် ပြင်းထန်သည့် ထောင်ဒဏ်များ ချမှတ်ခဲ့ကြောင်း ဒေသခံများကပြောသည်။
ထိုထဲတွင် အသက် ၄၀ကျော် အမျိုးသမီးတစ်ဦးပါဝင်ပြီး ကျန်နှစ်ဦးမှာ အမျိုးသားနှစ်ဖြစ်ကာ ၎င်းတို့ကို စက်တင်ဘာ ၂၉ ရက် စစ်ကောင်စီ၏ စစ်ခုံရုံးက မတရားပစ်ဒဏ်များချမှတ်ခဲ့ခြင်းဖြစ်သည်ဟု ဟားခါးမြို့ခံများကပြောသည်။
“ဟားခါးစစ်ခုံရုံးက အမှုတွေကို ဆက်တိုက် ပြစ်ဒဏ်ချနေတာ ဒီထဲမှာ သူတို့လဲပါတာ”ဟု ဟားခါးမြို့မှ စစ်ကောင်စီနှင့်နီးစပ်သူတစ်ဦးကပြောသည်။
ဟားခါးမြို့တွင် နေထိုင်သည့် အသက် ၄၀ကျော် မဗျက်မွှေဆုန်ကို CDFများကို ငွေကြေးထောက်ပံ့သည်ဟုဆိုကာ အကြမ်းဖက်မှုတိုက်ဖျက်ရေးဥပဒေ ၅၀ (ည)ဖြင့် ထောင်ဒဏ်တစ်သက်တစ်ကျွန်း စစ်ကောင်စီက မတရားချမှတ်ခဲ့ခြင်းဖြစ်သည်။
Public Service Announcement
ဒေါ်ဗျက်မွှေဆုန်သည် ဟားခါးမြို့ရှိ NGOတစ်ခုတွင် လုပ်ကိုင်ခဲ့သူဖြစ်ပြီး စစ်ကောင်စီစစ်ဆေးဂိတ်က ယမန်နှစ်တွင် မတရားဖမ်းဆီးခဲ့ခြင်းဖြစ်သည်။
ထိုပြင် ဟားခါးမြို့တွင် နေထိုင်သည့်ကိုဗန်ဗျက်ကျန်အိုကိုလည်း PDFများကို နေအိမ်တွင်တည်းခိုစေခြင်းနှင့် မီဇိုရမ်ပြည်နယ်ကိုသွားရောက်ရန်လမ်းပြပေးသည်ဟု စွပ်စွဲကာအကြမ်းဖက်မှုတိုက်ဖျက်ရေးဥပဒေပုဒ်မ ၅၂(က)ဖြင့် စစ်ကောင်စီက အလုပ်ကြမ်းနှင့် ထောင်ဒဏ် ၇ နှစ်ချခဲ့သည်။
ဟားခါးမြို့တွင် နေထိုင်သည့် ကိုမောင်ငယ်ကိုလည်း စစ်ကောင်စီက ဟားခါးတက္ကသိုလ်အတွင်းဝင်ရောက်သည် ဟု စွပ်စွဲက စစ်ကောင်စီစစ်ခုံရုံးက ပြည်သူပိုင်ပစ္စည်းကာကွယ်ရေးအက်ဥပဒေအရ အလုပ်ကြမ်းနှင့် ထောင်ဒဏ် ၇နှစ်ချမှတ်ခဲ့သည်။
(စစ်ကောင်စီ က မတရားသဖြင့် ထောင်ဒဏ် အပြင်းအထန်ချမှတ်ခဲ့သောမဗျက်မွှေဆုန် ၊ကိုဗန်ဗျက်ကျန်အိုနှင့်ကိုမောင်ငယ်တို့သုံးဦး။ဓါတ်ပုံ-စစ်ကောင်စီဝါဒဖြန့်တယ်လီဂရန်)
