သတင်း

ရေဘေးကြုံစစ်ဘေးရှောင်များ၏စပါးခင်းများကို PDFများကူညီရိပ်သိမ်းပြီး ပို့ဆောင်ပေး

အောက်တိုဘာလ ဒုတိယပတ်ကစ၍ နေ့စဥ်မိုးရက်ဆက်ရွာသွန်းမှုနှင့်အတူ ဘီးလူးချောင်းရေ မြင့်တက်လာပြီးနောက် မိုးဗြဲရေကာတာ သည် သတ် မှတ်ပမာဏထက် ပိုနေသောကြောင့် ဆည်ရေ လွှတ်ခဲ့သည်။

Published

အောက်တိုဘာ 23, 2023

(စစ်ရှောင်ပြည်သူများ၏ စပါးခင်းများကို PDF များကကူညီရိတ်သိမ်းပေးနေစဥ်။ဓာတ်ပုံ -Moebye Local PDF)

စစ်ဘေးအပြင် ရေဘေးကြောင့် ထပ်မံပြောင်းရွှေ့ရသည့် ပြည်သူများ၏ စပါးခင်းများကို PDF များက ရိတ်သိမ်းပေးကာ ပိုင်ရှင်များထံ ပို့ဆောင်ပေးခဲ့ကြောင်း Moebye Local PDF က ယနေ့ထုတ်ပြန်သည်။

မိုးဗြဲမြို့နယ်တွင် မိုးသည်းထန်စွာရွာသွန်းပြီးရေကြီးသည့် အတွက်ကြောင့် နေရာထိုင်ခင်ထပ်မံရွေ့ပြောင်းနေရသော စစ်ဘေးရှောင်ပြည်သူများမှာ ၎င်းတို့၏ ရိတ်သိမ်းရမည့်စပါးခင်းတစ်ချို့ကို ရိတ်သိမ်းနိုင်ခြင်းမရှိခဲ့ဟု သိရသည်။

ထိုကြောင့် PDF များက စပါးခင်းအချို့ကိုရိတ်သိမ်းသယ်ယူပေးပြီး ပိုင်ရှင်စစ်ဘေးရှောင်ပြည်သူထံသို့ပြန်လည်ပို့‌ဆောင်ပေးခဲ့ကြောင်း အသိပေးသည်။

“မိုးဗြဲမြို့တွင်းဆို ဘီးလူးချောင်းနဲ့နီးတဲ့ ညောင်ဝိုင်းရပ် ကွက်ထဲတော့ ရေဝင်နေတုန်းပဲ။အခုထိ ရေဘေးကြောင့် ရွှေ့ပြောင်းရတဲ့ စစ်ဘေးရှောင်က ၂၀၀ ကျော်လောက် ရှိသေးတော့ သူတို့ မသိမ်းနိုင်တဲ့ စပါးတွေကို ကျွန်တော်တို့ ရိတ်သိမ်းတာပါ”ဟု Moebye Local PDF တာဝန်ရှိသူက လူထုနွေဦးသတင်းဌာနသို့ပြောကြားသည်။

လက်ရှိ ရွှေ့ပြောင်းနေရသည့် စစ်ဘေးရှောင်ပြည်သူ များတွင်အခက်အခဲ များစွာရှိနေပြီး စားနပ်ရိက္ခာ၊ကျန်းမာရေး အကူအညီများအဓိကလိုအပ်နေကြောင်း ၎င်းက ဆက်ပြောသည်။