စစ်ကိုင်းတိုင်း ဆားလင်းကြီးမြို့နယ်၊ ညောင်ပင်ကြီးရဲစခန်းမှ စစ်ကောင်စီတပ်ဖွဲ့ဝင် ခြောက်ဦးအား ယနေ့နံနက်ပိုင်းတွင် ပစ်ခတ်တိုက်ခိုက်ခဲ့ရာ ငါးဦးသေဆုံးပြီး သေနတ်တစ်လက်နှင့် ကျည်ဆန်များ သိမ်းယူနိုင်ခဲ့သည်ဟု ယင်းမာပင်ခရိုင်တပ်ရင်း -၂၈ ( ဓါးမဆိုင်းတပ်မတော်) တာဝန်ခံက ဗိုလ်စွမ်းသူမောင်က ပြောသည်။
ညောင်ပင်ကြီးရဲစခန်းမှ စစ်ကောင်စီတပ်ဖွဲ့ဝင် ခြောက်ဦးသည် အရပ်ဝတ်ဖြင့် ချင်းတွင်းမြစ်ဆိပ်သို့ ထွက်ခွာလာစဉ် ယနေ့(အောက်တိုဘာ ၂၆ ရက်) နံနက် ၆နာရီခွဲခန့်တွင် ဓါးမဆိုင်းတပ်မတော်မှ ပြည်သူ့ကာကွယ်ရေးရဲဘော်များက တိုက်ခိုက်ခဲ့ခြင်း ဖြစ်သည်။
” လှေဆိပ်က ပြည်သူတွေဆီ ငွေတောင်းမလို့ ဆင်းလာတာ။ ဝါးတရိုက်အကွာလောက်ဆီကနေ လူခွဲပြီး ဆင်းလာတာကို သုံးမိနစ်အတွင်း ပွဲပြီးအောင် မစ်ရှင်ဖော်တာ”ဟု ဗိုလ်စွမ်းသူမောင်က ပြောသည်။
ပစ်ခတ်မှုအတွင်း သုံးဦးမှာ အပစ်ခံရသည့်နေရာ၌ လဲကျသေဆုံးပြီး နှစ်ဦးမှာ ထွက်ပြေးစဉ် လဲကျသေဆုံးကြောင်း၊ တစ်ဦးမှာ သစ်ပင်ပုန်းကွယ်နေ၍ ပစ်ခွင့်မသာခဲ့ဟု ၎င်းက ပြောသည်။
” အရပ်ဝတ်တွေနဲ့ ဆင်းလာတာ။ ဘောင်းဘီတိုတွေပါတယ်။ မန်ယူအကျီတွေပါတယ်။ ရဲဘော် တွေက ပစ်တော့ သုံးယောက်က ပွဲချင်းပြီး။ မန်ယူအကျီနဲ့ကောင်က နောက်ပြန်ထွက်ပြေးရင်း ဝမ်းလျားမှောက် လဲကျသွားတာ”ဟု ဗိုလ်စွမ်းသူမောင်က ပြောသည်။
Public Service Announcement
ပစ်ခတ်မှုအတွင်း စစ်ကောင်စီထံမှ G3 သေနတ် တစ်လက်နှင့် ကျည် ခုနစ်တောင့် သိမ်းဆည်းနိုင်ခဲ့ပြီး စစ်ကောင်စီတပ် ပြန်လည်ပစ်ခတ်မည်စိုးရိမ်၍ ကျန်သေနတ်များကို ကောက်ယူနိုင်ခြင်းမရှိခဲ့ဟု ဆိုသည်။
ညောင်ပင်ကြီးရဲစခန်းသည် ဆားလင်းကြီးမြစ်ဆိပ်နှင့် ကိုက်အနည်းသာဝေးသည်။ ရဲစခန်းနှင့် မြစ်ဆိပ်ကြားကို စစ်ကောင်စီက လုံခြုံရေးအရ ရှင်းလင်းထားသည်။
ထို့ကြောင့် စစ်ဆင်ရေးအား ၃မိနစ်ဖြင့်အပြီး ဖော်ဆောင်ခဲ့ခြင်းဟု ကာကွယ်ရေးအဖွဲ့က ပြောသည်။
ညောင်ပင်ကြီးရဲစခန်းကို ပြီးခဲ့သည့် ဇွန်လ ၉ရက် ညတွင် ပြည်သူ့ကာကွယ်ရေးပူးပေါင်းတပ်ဖွဲ့များက စီးနင်းတိုက်ခိုက်ခဲ့ဖူးသည်။ အဆိုပါ တိုက်ပွဲတွင် စစ်ကောင်စီဘက်မှ ၁၀ဦးထက်မနည်း သေဆုံးပြီး ကာကွယ်ရေးရဲဘော်တစ်ဦး ကျဆုံးခဲ့သည်။
ထို့အပြင် ၂၀၂၂ ဇန်နဝါရီကလည်း အဆိုပါ ရဲစခန်းအား ဒေသကာကွယ်ရေးတပ်များက တိုက်ခိုက်ခဲ့သေးသည်။
ယနေ့ စစ်ဆင်ရေးဖော်ဆောင်ခဲ့သည့် ဆားလင်းကြီးမြို့အခြေစိုက် ဓါးမဆိုင်းတပ်မတော်သည် အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာနမှ ယင်းမာပင်ခရိုင်တပ်ရင်း (၂၈)အဖြစ် ရပ်တည်နေသည်။
