▪︎ကွမ်းလုံမြို့အား အလုံးစုံထိန်းချုပ်နိုင်ရေး ဆက်လက် စစ်ဆင်နေဟု ပြော
ရှမ်းပြည်နယ်မြောက်ပိုင်း ကိုးကန့်ဒေသရှိ စစ်ကောင်စီတပ်စခန်း ၃ခုကို ယနေ့ ထပ်မံ သိမ်းပိုက်ရရှိခဲ့ကြောင်း ကိုးကန့်တပ်မတော်(MNDAA) ပြောရေးဆိုခွင့်ရှိသူ လီကျာဝင်းက ပြောပြသည်။
၁၀၂၇ စစ်ဆင်ရေး ၁၁ရက်မြောက်နေ့ နိုဝင်ဘာ ၆ရက် စစ်ရေးအခြေအနေနှင့်ပတ်သက်ပြီး MNDAA ပြောရေးဆိုခွင့်ရှိသူက ယခုကဲ့သို့ အသိပေး ပြောပြခြင်းဖြစ်သည်။
“ဒီနေ့ အခြေအနေကတော့ အခုအချိန်ထိတပ်စခန်း ၃ခုကိုထပ်မံ သိမ်းထားပါတယ်။ တုန်းရှမ်းဒေသမှာ ၁ခု၊ ရှင်းဝမ်ဒေသက ၂ခု ပေါ့နော်။ အကုန်လုံးက ကိုးကန့်ခရိုင်ထဲမှာ” ဟု ၎င်းက ပြောသည်။
ထို့ပြင် ကွမ်းလုံမြို့ကို အလုံးစုံထိန်းချုပ်နိုင်ရေး ဆောင်ရွက်နေကြောင်း ပြောသည်။ လက်ရှိတွင် MNDAAနှင့် မဟာမိတ်တပ်များသည် ချင်းရွှေဟော်၊ ပန်ဆိုင်း၊ ဖောင်းဆိုင်၊ သိန္နီမြို့များကို အလုံးစုံထိန်းချုပ်ထားနိုင်ပြီး နမ့်ခမ်းနှင့် ကွမ်းလုံမြို့ကိုလည်း စီးနင်းတိုက်ခိုက်လျက်ရှိသည်။
Public Service Announcement
“မနေ့က ညနေအချိန်ထိ ကွမ်းလုံမြို့ရဲ့ သံလွင်မြစ် အရှေ့ဘက်ခြမ်းပေါ့နော် အဲဒီဘက်အခြမ်းကို ကျနော်တို့ ထိန်းချုပ်ထားနိုင်တယ်။ ဒီနေ့ကတော့ အနောက်ဘက်ခြမ်းကို ဆက်လက် စစ်ဆင်ရေးတွေ ဖော်ဆောင်နေတယ်။ ယခုအချိန်ထိ တိုက်ပွဲများ ဆက်လက်ပြင်းထန်နေတာပါ” ဟု MNDAA ပြောရေးဆိုခွင့်ရှိသူက ပြောသည်။
MNDAAနှင့် ရက္ခိုင့်တပ်တော်(AA) တို့ပူးပေါင်းပြီးစစ်ကောင်စီတပ်စခန်း ၁၁၂ ခုကို တိုက်ခိုက်သိမ်းပိုက်ထားပြီးဖြစ်ပြီး စစ်ဆင်ရေး၌ ပါဝင်သော တအာင်းတပ်မတော်(TNLA)က စစ်ကောင်စီတပ်စခန်း ၃၂ခုကို သိမ်းပိုက်ထားသည်။ ထို့ကြောင့် စစ်ဆင်ရေး ၁၁ရက်အတွင်း စစ်ကောင်စီတပ်စခန်း ၁၄၄ ခု ညီနောင်မဟာမိတ်တပ်များက သိမ်းပိုက်ထားနိုင်ပြီဖြစ်သည်။
