ကိုးကန့်ဒေသတိုက်ပွဲများတွင် စစ်ကောင်စီတပ်မှာ လေကြောင်းအားသာချက်ကို သုံး၍တန်ပြန်တိုက်ခိုက်သည်မှလွဲ၍ အခြားသောမြေပြင်မှစစ်ကူများ ကိုးကန့်ဒေသတွင်းသို့ မတိုးချဲ့နိုင်တော့ကြောင်း MNDAA က ယမန်နေ့က ထုတ်ပြန်သည်။
၁၀၂၇ စစ်ဆင်ရေးသတင်းများနှင့် ပတ်သက်၍ ကိုးကန့်ဒေသစစ်ရေးအခြေအနေကို MNDAA က ထုတ်ပြန်ရာ၌ ယင်းကဲ့သို့အသိပေးထားခြင်းဖြစ်သည်။
“MNDAA၏စစ်ကြောင်းအသီးသီးတို့သည် စစ်ရေးကော်မတီ၏ညွှန်ကြားမှုဖြင့် တိုက်ပွဲများကို ဆက်လက် ထိထိရောက်ရောက် ဆင်နွှဲနိုင်ခဲ့ပါသည်”ဟု ထုတ်ပြန်အသိပေးထားသည်။
မြေပြင်တိုက်ပွဲအခြေအနေနှင့်ပတ်သက်၍ ဒီဇင်ဘာလ ၃ ရက်နေ့ နံနက် ၁၀နာရီခန့်တွင် MNDAAသည် လောက်ကိုင်မြို့၊ တုန်းချိန်အပြင်ဘက် လေးမျက်နှာစေတီကုန်းတွင် အခိုင်အမာ တပ်စွဲထားသော စစ်ကောင်စီတပ်စခန်းကို တိုက်ခိုက်ရာ နှစ်ဖက် တိုက်ပွဲစတင် ဖြစ်ပွားခဲ့ပြီး တိုက်ပွဲသည် နံနက်မှ ညနေ အချိန်ထိတစ်နေကုန်ပြင်းပြင်းထန်ထန်ဖြစ်ပွားခဲ့သည်ဟုဆိုသည်။ ညနေ ၆ နာရီခန့်တွင် MNDAA၏ စစ်ညွှန်ကြားရေးမှူးက ထိုးစစ်ဆင်မှုများကိုရပ်တန့်ခဲ့ကာ စစ်နည်းပရိယာယ် ပြန်လည်ပြုပြင်ပြီးဒီဇင်ဘာ ၄ ရက်တွင်ထပ်မံ ထိုးစစ်တိုက်ခိုက်ရန်ညွှန်ကြားခဲ့ပြီးနှစ်ဖက် တိုက်ပွဲများပြင်းထန်နေဆဲဟု အသိပေးထားသည်။
Public Service Announcement
ထို့အပြင် လောက်ကိုင်မြို့နယ်၊ ကုန်းကြမ်းမြို့တွင် ယခင်ရက်က တိုက်ပွဲများအတွင်း ထွက်ပြေးသွားသောစစ်ကောင်စီတပ်ဖွဲ့ဝင်များကို လိုက်လံတိုက်ခိုက်နေကြောင်း MNDAA က သတင်းထုတ်ပြန်ထားသည်။
လောက်ကိုင်မြို့တွင် ယနေ့နံနက်မှ ညအထိတိုက်ပွဲများပြင်းထန်နေသည်ဟု ဒေသခံများကပြောသည်။
