ရှမ်းမြောက် ကိုးကန့်ဒေသ လောက်ကိုင်မြို့အနီးရှိ စစ်ကောင်စီတပ်စခန်း အချို့ကို ယနေ့ တိုက်ခိုက် သိမ်းပိုက်နိုင်ခဲ့သည်ဟု ကိုးကန့်တပ်မတော်(MNDAA) ပြောရေးဆိုခွင့်ရှိသူ လီကျာဝင်းက ပြောသည်။
၁၀၂၇ စစ်ဆင်ရေး ၃၈ရက်မြောက်နေ့ ဒီဇင်ဘာ ၃ရက် တိုက်ပွဲသတင်းများကို မေးမြန်းရာ ယခုကဲ့သို့ အသိပေးခြင်းဖြစ်သည်။
“ဒီနေ့ လောက်ကိုင် တုန်ချိန်တဝိုက်မှာပဲ တိုက်ပွဲတွေဖြစ်ပါတယ်။ အဲဒီနားတဝိုက် စစ်ကောင်စီတို့ ယာယီလာချထားတဲ့ တပ်စခန်းတွေ ရှင်းလင်းနိုင်ခဲ့တယ်”ဟု MNDAA ပြောရေးဆိုခွင့်ရှိသူက ပြောသည်။
ယနေ့ တိုက်ပွဲဖြစ်ပွားရာသည် လောက်ကိုင်မြို့ အနီး၌သာဖြစ်ပြီး မြို့တွင်း မဟုတ်ကြောင်း ပြောပြသည်။
Public Service Announcement
လောက်ကိုင်မြို့သိမ်းတိုက်ပွဲကို သင့်တော်သည့် အချိန်တွင် ပြုလုပ်မည်ဟု MNDAAက ကြေညာထားရာ ယင်းနှင့်ပတ်သက်ပြီး MNDAA ပြောရေးဆိုခွင့်ရှိသူက “ကျနော်အပါအဝင် အခြေအနေကို စောင့်ကြည့်နေဆဲ အနေအထားမှာပဲရှိပါသေးတယ်”ဟု မြို့သိမ်းတိုက်ပွဲကိစ္စနှင့်ပတ်သက်ပြီး ပြောပြသည်။
MNDAAနှင့် မဟာမိတ်တပ်များ ပူးပေါင်းပြီး ၁၀၂၇ စစ်ဆင်ရေးကို အောက်တိုဘာ ၂၇ရက်က စတင်ဆောင်ရွက်ခဲ့ရာ ယခုဒီဇင်ဘာလဆန်းအထိ စစ်ကောင်စီတပ်စခန်း ၂၃၀ကျော်ကို တိုက်ခိုက် သိမ်းပိုက်ထားပြီးဖြစ်သည်။
