တန့်ယန်းမှ လားရှိုးမြို့သို့ စစ်ကူလာသည့် ကားရှစ်စီးပါ စစ်ကောင်စီယာဉ်တန်းကို ကိုးကန့်တပ်မတော်( MNDAA) ၊ BPLA နှင့် ပူးပေါင်းတပ်များက ကြားဖြတ်တိုက်ခိုက်ခဲ့ရာ ယာဉ်တန်းတစ်ခုလုံးမီးလောင် ပျက်စီးသွားပြီး စစ်ကောင်စီတပ်ဘက်မှ ၃၀ ကျော်သေဆုံးကာ ၅၀ ထက်မနည်း ဒဏ်ရာရသွားကြောသည်။
အဆိုပါ စစ်ကောင်စီယာဉ်တန်းကို လားရှိုးမြို့နယ် မန်ပန်နှင့် ဟိုနားကျေးရွာကြားတွင် MNDAA နှင့် BPLA ပူးပေါင်းတပ်က ယမန်နေ့ (ဇူလိုင်လ ၃၀ ရက်) နံနက် သုံးနာရီခန့်တွင် တိုက်ခိုက်ခြင်းဟု စစ်ရေးသတင်းရင်းမြစ်တစ်ဦးကပြောသည်။
Public Service Announcement
“တန့်ယန်းကနေ လားရှိုးကို စစ်ကူသွားတဲ့ စစ်ခွေးတွေ MNDAA နဲ့ BPLA က လမ်းတဝက်မှာစောင့်ပြီး တီးထည့်လိုက်တာ။ ၃၀ ကျော်သေ ၅၀ကျော်ဒဏ်ရာရ။ကား၈စီး စလုံးပြာကျတယ်”ဟု အဆိုပါ စစ်ရေးသတင်းရင်းမြစ်ကပြောသည်။
People’s Spring က ရရှိသည့် ဓာတ်ပုံမှတ်တမ်းများတွင် ပျက်စီးနေသည့် စစ်ကားများပေါ်၌ ကိုးရို့ကားယားသေဆုံးနေသောစစ်ကောက်စီတပ်ဖွဲ့ဝင်အချို့ကို တွေ့ရသည်။
“တိုက်ခိုက်ခံရပြီး ယာဉ်တန်းတစ်တန်းလို့ ပြတ်တောက်သွားတာမှန်ပါတယ် “ဟု အခြားစစ်ရေးသတင်းရင်းမြစ်တစ်ဦးကလည်း ပြောသည်။
တန့်ယန်းမြို့ကို ဝ တပ်ဖွဲ့ UWSA က တပ်စွဲထားသလို စစ်ကောင်စီကလည်း တပ်စွဲထားသည်။ ယခုတိုက်ခိုက်ခံရသည့် ယာဉ်တန်းသည် တန့်ယန်းမြို့မှ ထွက်လာသည့် ယာဉ်တန်းဖြစ်သည်။
ပြီးခဲ့သည့် ဇူလိုက်လ ၂၀ရက်ပတ်ဝန်းကျင်ကလည်း TNLA ထိန်းချုပ်ထားသည့် ကျောက်မဲမြို့ကို စစ်ကူလာသည့် စစ်ကောင်စီတပ်စစ်ကြောင်း တိုက်ခိုက်ခံရပြီး အများအပြားသေဆုံးကာစစ်ကြောင်းပျက်ကာ ပြန်လည်ထွက်ပြေးသွားခဲ့ရသည်။
လားရှိုးမြို့ ရှိစစ်ကောင်စီတပ်စခန်း များကို MNDAA ဦးဆောင်သောပူးပေါင်းတပ်များက ဆက်တိုက် ထိုးစစ်ဆင်သိမ်းပိုက်နေသည်။ စစ်ကောင်စီတပ်စခန်းနှင့် တပ်ရင်းပေါင်း ၂၀ ခန့်ကိုသိမ်းပိုက်ပြီးဖြစ်သည်။ထိုနောက်စစ်ကောင်စီက တန့်ယန်းမှ တဆင့်စစ်ကူပို့ရန် ကြိုးစားလာခြင်းဖြစ်သည်။
မိတ္ထီလာ- တောင်ကြီး -ကျေးသီး -တန့်ယန်းလမ်းအတိုင်း စစ်ကောင်စီတပ်ကစစ်ကူပို့ရန်ကြိုးပမ်းလာပြီး ပူပေါင်းတပ်များက ဖြတ်တောက်တိုက်ခိုက်ခဲ့ခြင်းဖြစ်သည်။
