ဟန်နွေ/People’s Spring
ကချင်ပြည်နယ် ဖားကန့်မြို့ရှိ တပ်မကုန်း ကာကွယ်ရန် စစ်ကောင်စီတပ်က မြို့တွင်းစစ်ရေးလှုပ်ရှားမှုနေရာယူ စစ်အင်အားဖြည့်တင်းမှုများပြုလုပ်လျက်ရှိကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနက ဖော်ပြသည်။
KIA တပ်မဟာ(၉) ပူးပေါင်းတပ်ဖွဲ့များက ဖားကန့်မြို့ စစ်ကောင်စီ၏ စခန်းလုံခြုံရေးအတွက် အရေးပါသည့် လမောင်ကုန်းနှင့်တောမော် စစ်ကောင်စီတပ်စခန်းများကို ဩဂုတ် ၁၅ရက်ကသိမ်းပိုက်ခဲ့ပြီးနောက် စစ်ကောင်စီက မြို့အတွင်း စစ်ရေးလှုပ်ရှားလာခဲ့သည်ဟု ဆိုသည်။
Public Service Announcement
ဖားကန့်မြို့အတွင်းရှိ စစ်ကောင်စီတပ်သည် မနမှော်ကျေးရွာရှိ ကျောက်စိမ်းကုမ္ပဏီ လုပ်ကွက် များ၌ နေရာယူ စစ်အင်အားဖြည့်တင်းနေ သကဲ့သို့ ဘုန်းကြီးကျောင်းအချို့တွင်လည်း နေရာယူ တပ်စွဲထားဟု KIAက အသိပေးသည်။
ထိုသို့ စစ်ကောင်စီတပ်ဘက်က စစ်အင်အားဖြည့်တင်းလာ၍ ပြည်သူများက တိုက်ပွဲဖြစ်ပွားမည်ကို စိုးရိမ်ကာ လုံခြုံရာသို့ထွက်ပြေးမှုများရှိနေကြောင်း၊ ဖားကန့်မြို့အတွင်း စစ်ကောင်စီတပ် လှုပ်ရှားလာခြင်းသည် ဖားကန့် တပ်မကုန်းကို ကာကွယ်သည့်သဘောဖြစ်သည်ဟု သိရကြောင်း KIA သတင်းပြန်ကြားရေးဌာနက ဖော်ပြသည်။
KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ဖားကန့်မြို့၌ တိုက်ပွဲဆက်ဖြစ်မည်၊ မဖြစ်မည်ကို မပြောနိုင်သော်လည်း KIA ပူးပေါင်းတပ်က သိမ်းရထားသည့် လမောင်ကုန်းနှင့် တောမော်စခန်းများသည် ဖားကန့်ရှိ စစ်ကောင်စီတပ်စခန်းများ လုံခြုံရေးအတွက် အရေးပါသည့် စခန်းများဖြစ်ကြောင်း ယမန်နေ့(ဩဂုတ် ၁၆ရက်)တွင် ပြောထားသည်။
အဆိုပါ တပ်စခန်းများသိမ်းပိုက်စဉ် စစ်သုံ့ပမ်း ဖမ်းဆီးရရှိမှု ရှိခဲ့သည်ဟုလည်းအတည်ပြုသည်။
စစ်ကောင်စီ ဝါဒဖြန်သူအချို့ကလည်း ဖားကန့်တွင် ခံစစ်စခန်း ၂ခု ကျသွားပြီဖြစ်၍ ခံစစ်စခန်း ၇ခုသာ ကျန်တော့သည်ဟု လူမှုကွန်ရက်၌ ရေးသားထားသည်ကို တွေ့ရသည်။
