ဆိုင်းမင်း/People’s Spring
ရှမ်းပြည်နယ်တောင်ပိုင်းက တောင်ကြီးမြို့နယ်နဲ့ လွိုင်လင်ခရိုင် တို့မှာ ယာဂီမုန်တိုင်းအရှိန်ကြောင့် ရေကြီးရေလျှံမှု ဖြစ်ပွားရာ သေဆုံးသူ ၁၄၀ ဦီးထိ ရှိပြီး လူ ၁၀၀ ကျော် ပျောက်ဆုံးနေဆဲလို့ ပအိုဝ်းလူငယ်အစည်းအရုံး(PYO) က အသိပေးပါတယ်။
တောင်ကြီး ၊ ပင်လုံ၊ လွိုင်လင် ၊ မိုင်းပွန် ၊ဗန်းမက် ၊မောက်မယ် မြို့တို့မှာ ကျေးရွာပေါင်း ၁၅၀ ကျော်က ဒေသခံပြည်သူ အနည်းဆုံး တစ်သိန်းကျော်ရေဘေးသင့်ခဲ့တယ်လို့သိရပါတယ်။
Public Service Announcement
စက်တင်ဘာလ ၁၀ ရက်စပြီး မိုးအဆက်မပြတ်ရွာသွန်းတာကြောင့် ရှမ်းပြည်တောင်ပိုင်းမှာ ရေကြီးတာ ၊တောင်ပြိုတာ ၊ မြေပြိုတာတွေ ရုတ်တရက်ဖြစ်ပျက်ခဲ့တာပါ။
အဲဒီသဘာဝဘေးကြောင့် ဒေသခံ ပြည်သူတွေရဲ့ နေအိမ်တွေ ပျက်စီးတာ အပြင် လူအသေအပျောက်များခဲ့ပြီး အင်တာနက်လိုင်းနဲ့ ဖုန်းလိုင်း ဖြတ်တောက်ခံရမှုတွေကြောင့်လည်း အရေးပေါ် အကူအညီတွေ ၊ ကယ်ဆယ်ရေး မရတာတွေ ရှိနေတယ်လို့ ပအိုဝ်းလူငယ်အစည်းအရုံး(PYO) က ဆိုပါတယ်။
လက်ရှိမှာ စစ်ရှောင်တွေအပါအဝင် ရေဘေးသင့်ပြည်သူ အနည်းဆုံး တစ်သိန်းကျော်ရှိနေပြီး စားနပ်ရိက္ခာ၊ဆေးဝါး၊နေရာထိုင်ခင်းတွေ အရေးပေါ်လိုအပ်နေတယ်လို့ လည်း အသိပေးပါတယ်။
စစ်ကောင်စီရဲ့ စာရင်းမှာတော့ ရေဘေးကြောင့် တစ်နိုင်ငံလုံးအတိုင်းအတာနဲ့ လူ ၂၂၆ ဦးသေဆုံးပြီး ၇၇ ဦးပျောက်ဆုံးနေတယ်လို့ ဖော်ပြထားပါတယ်။
