ဟန်နွေ/People’s Spring
တိုက်ပွဲများဖြစ်ပေါ်နေသည့် ဒေသများတွင် ရေကြီး၊ရေလျှံမှုများဖြစ်ပွားပြီးနောက် သတိပြုလိုက်နာရမည့် ဘေးအန္တရာယ်ကင်းရှင်းရေး ဆောင်ရွက်ရန်အချက်များကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန ပြည်သူ့ကာကွယ်ရေးတပ်မတော်(PDF) တောင်ပိုင်းစစ်ဒေသက စက်တင်ဘာ ၁၉ရက်တွင် ထုတ်ပြန်သည်။
ရေကြီး၊ရေလျှံမှုကြောင့် တောင်ပြိုခြင်း၊ မြေပြိုခြင်းများဖြစ်ပေါ်ကာ မြေမြှုပ်မိုင်းနှင့် ပေါက်ကွဲစေတတ်သော အန္တရာယ်ရှိပစ္စည်းများ နေရာရွေ့သွားပြီး ပေါက်ကွဲစေနိုင်သဖြင့် ယခုကဲ့သို့ သတိပြုရန် အချက်များကို ဖော်ပြခဲ့ခြင်းဖြစ်သည်။
Public Service Announcement
သတိပြုရန် အချက်၈ချက်ကို အလေးပေးဖော်ပြခဲ့ရာ ရေအောက်သို့ သေချာရှင်းလင်းစွာ မမြင်ရပါက မလိုအပ်ဘဲ လမ်းလျှောက်ခြင်းမပြုရန်၊ လေးလံသော ပစ္စည်းများကို မြေကြီးပေါ်သို့ချသည့်အခါ မြေပြင်ကို ဘေးကင်းကြောင်း သေချာစစ်ဆေးပြီးမှ ချထားရန်၊ မိမိ မသွားရောက်ဖူးသောနယ်မြေများကို နယ်မြေကျွမ်းကျင်သူမပါဘဲ သွားခြင်းမှ ရှောင်ကျဉ်ရန် ဖော်ပြသည်။
ထို့ပြင် အမျိုးအမည်မသိသော သံသယဖြစ်ဖွယ်ပစ္စည်းများကို တွေ့ရှိခဲ့ပါက ကိုင်တွယ်ကြည့်ရှုခြင်းမှ ရှောင်ကျဉ်ပြီး အကယ်၍ စစ်ဘက်ဆိုင်ရာပစ္စည်းများ တွေ့ရှိခဲ့ပါက တာဝန်ရှိသူများကို ချက်ချင်းအကြောင်းကြားရန် သတိပေးထားသည်။
ကလေးသူငယ်များကို အန္တရာယ်ရှိသည့်နေရာနှင့် ဝေးရာတွင်ထားရန်၊ အန္တရာယ်ရှိကြောင်း အခြားသူများကို သတိပေးရန်နှင့် အကယ်၍ မိမိရှေ့တွင် မတော်တဆ ထိခိုက်မှုများ ဖြစ်ပေါ်လာပါက အရေးပေါ်ကူညီကယ်တင်ပေးနိုင်ရေး ရှေးဦးသူနာပြုစုနည်းများအား လေ့လာထားရန် တောင်ပိုင်းစစ်ဒေသက ထုတ်ပြန်သည်။
စက်တင်ဘာ ဒုတိယပတ်အတွင်းက နိုင်ငံတဝန်း မိုးများပြီး ရေဘေးအန္တရာယ် ကျရောက်ခဲ့ရာ တောင်ပိုင်းစစ်ဒေသအတွင်းရှိ ပဲခူးတိုင်းဒေသ နေရာအတော်များများ၌ ရေကြီး၊ရေလျှံမှုများ ဖြစ်ခဲ့သည်။
အချို့နေရာများ၌ ရေစီးဖြင့် လူမျောပါပျောက်ဆုံးသေဆုံးမှု ရှိခဲ့ပြီး ရေတာရှည်မြို့နယ်တွင် ရေဘေးကယ်ဆယ်ရေး ဆောင်ရွက်နေသည့် PDF ရဲဘော်တစ်ဦး ကျဆုံးခဲ့ရသည်။
ထို့ပြင် စစ်ကောင်စီ၏ ပိတ်ဆို့မှုများကြောင့် ကူညီကယ်ဆယ်ရေးများ အလွယ်တကူ မရောက်နိုင်သည့် နေရာများ၌ PDF ရဲဘော်များ စုပေါင်း၍ ကယ်ဆယ်ရေး၊ စားနပ်ရိက္ခာထောက်ပံ့ရေး လုပ်ငန်းများဆောင်ရွက်ခဲ့ကြောင်း ဒေသခံ PDF ရဲဘော်အချို့က ပြောပြသည်။
ရေတာရှည်မြို့နယ် အရှေ့ခြမ်းရှိ ပြည်သူများသည် စစ်ဘေးအပြင် ရေဘေးဒဏ်ရင်ဆိုင်နေကြရဟု ဒေသခံ PDF တပ်ရင်း (၃၅၀၁) တပ်ခွဲ(၄)မှ ရဲဘော် ကိုအီဗယ်က ပြောသည်။
PDF ထိန်းချုပ်စိုးမိုးထားသည့် အဆိုပါဒေသသို့ ပြင်ပမှ ကူညီကယ်ဆယ်ရေးများ လာရောက်ခြင်းမရှိ၍ PDF ရဲဘော်များက ကယ်ဆယ်ရေး၊ ပြန်လည်နေရာချထားရေး လုပ်ဆောင်ခဲ့သည်ဟု ဆိုသည်။
“စကစရဲ့ အဖက်ဖက်က ပိတ်ဆို့ထားတဲ့ အခြေနေတွေကြောင့် ဘာကယ်ဆယ်ရေးမှ မရောက် လာနိုင်တဲ့ အခြေနေမှာ အစစအရာရာ အရမ်းခက်ခဲနေတဲ့အတွက် ပြည်သူများအနေနဲ့လည်း ရေတာရှည်မြို့နယ် စစ်တောင်းမြစ်အရှေ့ဘက်ကမ်းဒေသကို အာရုံစိုက်ပေးကြဖို့ တောင်းဆိုလိုပါတယ်”ဟု ကိုအီဗယ်က ပြောသည်။
