အီယိုရီ/People’s Spring
စစ်ကောင်စီထံ လေယာဥ်ဆီအပါအဝင် စစ်လက်နက်ပစ္စည်းများ စီးဆင်းမှုကို တားမြစ်ရန် ကမ္ဘာ့နိုင်ငံအားလုံးကို အမေရိကန်၊ အိန္ဒိယ၊ ဂျပန်၊ သြစတြေးလျ ၄နိုင်ငံ ခေါင်းဆောင်များက တိုက်တွန်းလိုက်သည်။
အထက်ပါ ၄ နိုင်ငံခေါင်းဆောင်များက Quad ထိပ်သီးခေါင်းဆောင်များ စတုတ္ထကြိမ်မြောက်ညီလာခံအဖြစ် စက်တင်ဘာ ၂၁ ရက်တွင် တွေ့ဆုံခဲ့ပြီး ဝယ်လင်တန်ကြေညာချက်ကို ပူးတွဲထုတ်ပြန်ခဲ့ရာ ရခိုင်ပြည်နယ်အခြေအနေအပါအဝင် မြန်မာနိုင်ငံတွင် ပိုမိုဆိုးရွားလာနေသော နိုင်ငံရေး၊ လုံခြုံရေးနှင့် လူသားချင်းစာနာမှုအခြေအနေများအပေါ် အလွန်အမင်းစိုးရိမ်နေဆဲဖြစ်ကြောင်း ဖော်ပြသည်။
Public Service Announcement
အကြမ်းဖက်မှုများချက်ခြင်းရပ်တန့်ရေး၊ မတရားသဖြင့် တရားလက်လွတ်ဖမ်းဆီးထိန်းသိမ်းခံရသူအားလုံးကို ပြန်လွှတ်ရေး၊ လူသားချင်းစာနာမှုအကူအညီကို အဟန့်အတားမရှိ ဘေးကင်းစွာဖြင့် ခွင့်ပြုပေးရေး၊ အစုအဖွဲ့အားလုံးအကြား အားလုံးပါဝင်ပြီး အပြုသဘောဆောာင် တွေ့ဆုံဆွေးနွေးမှုမှတဆင့် ပဋိပက္ခကို အဖြေရှာရေးနှင့် အားလုံးပါဝင်သော ဒီမိုကရေစီလမ်းကြောင်းပေါ် ပြန်သွားရေး အချက်များကိုလည်း Quad အဖွဲ့ဝင် နိုင်ငံ့ခေါင်းဆောင်များက တောင်းဆိုထားသည်။
ထို့အပြင် မြန်မာ့အရေးဖြေရှင်းရေးနှင့်ပတ်သက်၍ အာဆီယံအလှည့်ကျဥက္ကဌနှင့် အာဆီယံအထူးကိုယ်စားလှယ်များ၏ ဆောင်ရွက်မှုများအပါအဝင် အာဆီယံဦးဆောင်သည့်ကြိုးပမ်းမှုများကို ခိုင်မာစွာအားပေးထောက်ခံကြောင်း Quad ခေါင်းဆောင်များက ထပ်လောင်းအတည်ပြုသည်။
စစ်ကောင်စီအနေဖြင့် အာဆီယံတူညီဆန္ဒ ၅ရပ်အောက်မှ ကတိကဝတ်အားလုံးကို အပြည့်အဝအကောင်အထည်ဖော်ဆောင်ရွက်ရန်လည်း တောင်းဆိုထားသည်။
Quad ခေါင်းဆောင်များသည် မြန်မာပြည်သူများအတွက် ၎င်းတို့၏ အားပေးထောက်ခံမှု ခိုင်မာစွာဆက်ရှိမည်ဟု အသိပေးခဲ့ပြီး ဒီမိုကရေစီလမ်းကြောင်းပေါ် ပြန်လည်ရောက်ရေးနှင့် မြန်မာပြည်သူများဦးဆောင်သော လုပ်ငန်းစဥ်တွင် ပဋိပက္ခကို ရေရှည်တည်တံ့သည့်ဖြေရှင်းမှုတစ်ခု ရှာဖွေရန်၊ လက်တွေ့ကျပြီး အပြုသဘောဆောင်နည်းလမ်းများဖြင့် အစုအဖွဲ့အားလုံးနှင့် အလုပ်လုပ်ရန်တို့ကို ဆက်လက်လုပ်ဆောင်မည်ဟု ကတိပြုသည်။
ထိုအပြင် စစ်ကောင်စီထံ လေယာဥ်ဆီအပါအဝင် စစ်လက်နက်ပစ္စည်းများ စီးဆင်းမှုကို တားမြစ်ရန် ကမ္ဘာ့နိုင်ငံအားလုံးကို ခေါင်းဆောင် ၄ ဦး၏ ပူးတွဲထုတ်ပြန်ချက်တွင်တိုက်တွန်းထားခြင်းဖြစ်သည်။
