ဇေအောင်/People’s Spring
စစ်ကိုင်းမြို့နယ်၊ မင်းကွန်းဒေသတွင် အရပ်ဝတ်ဖြင့် လက်ဖက်ရည်ဆိုင်ထိုင်နေသော ရဲများ ပစ်ခတ်ခံရပြီး ရဲသုံးဦး သေဆုံးကာ စစ်ကောင်စီတပ်က ပြန်ပစ်ခတ်၍ ပြည်သူအချို့ထိခိုက်မှုရှိကြောင်း ဒေသခံများက ပြောသည်။
ယနေ့(အောက်တိုဘာ ၁၆ရက်) နံနက်ပိုင်းက မင်းကွန်းတိုက််နယ်၊ ကားလမ်းဘေး မယ်တော်ကြီးဘုရားရှေ့ လက်ဖက်ရည်ဆိုင်တွင် ထိုင်နေသော မင်းကွန်းရဲစခန်းမှ ရဲများအား PDF ရဲဘော်များက ဝင်ရောက်ပစ်ခတ်ရာ ရဲ ၃ဦး သေဆုံးကြောင်း ဒေသခံများက ပြောသည်။
“ကိုယ့်ဘက်က ဝင်ပစ်တာ ၃ကောင်သေတယ်။ အဲဒီမှာ နှစ်ဘက်အပြန်အလှန်ပစ်တာ။ ပြည်သူ ၃ ယောက်မှန်တာ တစ်ယောက်သေသွားပြီပြောတယ်။”ဟု PDF များနှင့်နီးစပ်သူတစ်ဦးက ပြောသည်။
Public Service Announcement
အထိနာသွားသော စစ်ကောင်စီတပ်က ဝင်အပစ်ခံရသည့် လက်ဖက်ရည်ဆိုင်အပါအဝင် အနီးရှိနေအိမ်များအား မီးရှို့ဖျက်ဆီးခဲ့ကြောင်း ဒေသခံများက ပြောသည်။
“ဝင်အပစ်ခံရတဲ့ဆိုင် မီးရှို့ခံရတယ်။ မသင်္ကာတဲ့အိမ်တွေ မီးရှို့နေတယ်။ တော်တော်များများရှို့တယ်။ အိမ်အရေအတွက်မသိရသေးဘူး။”ဟု မင်းကွန်းဒေသခံတစ်ဦးက ပြောသည်။
အဆိုပါ ပစ်ခတ်တိုက်ခိုက်မှုအား မည်သည့်အဖွဲ့က ပြုလုပ်ခဲ့သည်ကိုမူ မသိရသေးပေ။
မင်းကွန်း PDFကမူ အဆိုပါစစ်ဆင်ရေးသည် နယ်မြေခံအဖွဲ့အစည်းများကို အသိမပေးဘဲ တိုက်ပွဲဖော်ဆောင်ခဲ့သောကြောင့် ပြည်သူများ ထိခိုက်မှုရှိခဲ့၍ တာဝန်ယူဖြေရှင်းပေးရန် တောင်းဆိုထားသည်။
သြဂုတ် တတိယပတ်အတွင်းကလည်း မင်းကွန်းမြသိန်းတန်ဘုရားရှိ စစ်ကောင်စီ ဂိတ် စခန်းတိုက်ခိုက်သိမ်းပိုက်ခံရပြီးနောက် စစ် ကောင်စီတပ်က စစ်ရှောင်ပြည်သူနှစ်ဦးအား PDF ဟုစွပ်စွဲ သတ်ဖြတ်ခဲ့သေးသည်။
ထို့အပြင်ဇူလိုင်အတွင်းကလည်း စစ်ကောင်စီတပ်က မင်းကွန်းတိုက်နယ်၊ ရှားရောင်းကျေးရွာရှိ နေအိမ် ၃၆လုံးအား မီးရှို့ခဲ့သည်။
