ဟန်နွေ/People’s Spring
ကချင်ပြည်နယ် ချီဖွေမြို့နယ် မြန်မာ – တရုတ် နယ်စပ် ဖီမော်ဒေသအခြေစိုက် စစ်ကောင်စီ လက်အောက်ခံ နယ်ခြားစောင့်တပ်ဖွဲ့(BGF) -၁၀၀၁ တပ်ရင်းကို ကချင်လွတ်လပ်ရေးတပ်မတော်(KIA)က တိုက်ခိုက်သိမ်းပိုက်နိုင်ရန် အပြင်းအထန် တိုက်ခိုက်နေကြောင်း ကချင်စစ်ရေးသတင်းရင်းမြစ်က ပြောသည်။
ကချင်အထူးဒေသ(၁)နယ်မြေရှိ စစ်ကောင်စီ လက်အောက်ခံပန်ဝါဒေသ လုပီကျေးရွာအနီး အခြေစိုက်သည့် BGF (၁၀၀၂)တပ်ရင်းဌာနချုပ်၊ ကန်ပိုက်တည်ဒေသ စင်ကြိုင်ရွာအနီး BGF (၁၀၀၃)တပ်ရင်းဌာနချုပ်ကို သိမ်းပိုက်ထားပြီးဖြစ်သည့် KIA ပူးပေါင်းတပ်သည် ယနေ့တွင် ဖီမော်ဒေသရှိ လက်ကျန် BGF တပ်ရင်းကို ဆက်လက်တိုက်ခိုက်နေခြင်းဖြစ်သည်ဟုဆိုသည်။
” ၁၀၀၁ကို တိုက်တယ်ဆိုတဲ့ဟာ ခုနက ဖုန်းဆက်လိုက်တဲ့အချိန် ဟုတ်တယ်တဲ့။ ပြီးခါနီးတောင် ရှိလာပြီလို့ အဲဒီလိုသတင်းရတယ်။ ဒါပေမဲ့ အပြီးသိမ်းတာ အဲဒီလိုတော့ မကြားရဘူး။ ပြီးခါနီးပြီလို့ အဲဒီလို ဒကြားရတယ်”ဟု ကချင်စစ်ရေးသတင်းရင်းမြစ်က ပြောသည်။
Public Service Announcement
တိုက်ပွဲအခြေအနေနှင့်ပတ်သက်ပြီး ဆက်လက်စုံစမ်းနေဆဲဖြစ်သည်။
BGF (၁၀၀၁)တပ်ရင်းနှင့် တိုက်ပွဲဖြစ်ပွားမှု အခြေအနေကို KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူအား မေးမြန်းရာ တိုက်ပွဲ အခြေအနေ အတည်ပြုချက် မရသေးဟု ဖြေကြားသည်။
KIAသည် စစ်ကောင်စီ လက်အောက်ခံ ဦးဇခုန်တိန့်ယိန်း ဦးဆောင်သည့် ကချင်အထူးဒေသ(၁) နယ်မြေအတွင်းရှိ တပ်စခန်းများကို ထိုးစစ်ဆင်တိုက်ခိုက်လျက်ရှိရာ ယခုနှစ် ဇွန်လတွင် ဆဒုံးဒေသ၊ စက်တင်ဘာလကုန်တွင် ချီဖွေမြို့၊ အောက်တိုဘာလဆန်းတွင် ဆော့လော်မြို့၊ အောက်တိုဘာလလယ်တွင် ပန်ဝါမြို့နှင့် အောက်တိုဘာ ၂၁ရက်တွင် ကန်ပိုက်တီဒေသရှိ BGF (၁၀၀၃)တပ်ရင်းဌာနချုပ်များကို တိုက်ခိုက်သိမ်းပိုက်ထားသည်။
အဆိုပါ စခန်းသိမ်း၊ မြို့သိမ်းတိုက်ပွဲများအတွင်း စစ်ကောင်စီ ဗျူဟာစခန်းများ၊ တပ်စခန်းများ၊ ပြည်သူ့စစ်နှင့် နယ်ခြားစောင့်စခန်းများ စုစုပေါင်း တပ်စခန်း ၅၀ကျော် သိမ်းပိုက်ရရှိထားပြီးဖြစ်ပြီး ချီဖွေ၊ ဆဒုံး၊ ဆော့လော်၊ ပန်ဝါမြို့များကို သိမ်းပိုက်ထိန်းချုပ်ထားသည်။ တိုက်ပွဲများအတွင်း လက်နက်ခဲယမ်းနှင့် စစ်သုံ့ပမ်းများ ဖမ်းဆီးရရှိသကဲ့သို့ KIAနှင့် ပူးပေါင်းလာသည့် ပြည်သူ့စစ်တပ်ဖွဲ့များလည်းရှိခဲ့သည်ဟု သတင်းရင်းမြစ်တို့က ပြောသည်။
KIO/KIA ခေါင်းဆောင် ဗိုလ်ချုပ်ကြီး အင်ဘန်လကလည်း ပြည်သူ့စစ်များ KIA ထံလက်နက်ချ ပူးပေါင်းရန် အောက်တိုဘာ ၂၅ရက် KIO တည်ထောင်ခြင်နှစ်ပတ်လည်နေ့ မိန့်ခွန်းတွင်ထည့်သွင်း ပြောကြားထားသည်။
