ပင်လောင်းမြို့နယ်တွင် စစ်ကောင်စီက စစ်ရှောင်ထော်လာဂျီတစ်စီး ဒရုန်းဖြင့်တိုက်ခိုက်ရာ ကလေးငယ်အပါအဝင် နှစ်ဦးသေဆုံး၊ ၉ဦးဒဏ်ရာရ

ရဲခေါင်/People’s Spring

ရှမ်းပြည်နယ်တောင်ပိုင်း၊ ပင်လောင်းမြို့နယ်တွင် စစ်ကောင်စီတပ်က စစ်ရှောင်ထော်လာဂျီတစ်စီးအား ဒရုန်းဖြင့်တိုက်ခိုက်ရာ (၁၀)နှစ်အရွယ်ကလေးငယ်နှင့် အမျိုးသမီးတစ်ဦးသေဆုံးပြီး ၉ ဦးဒဏ်ရာရခဲ့သည်။

ယမန်နေ့(အောက်တိုဘာ ၃၁ရက်) နံနက် ၉နာရီခန့်က စစ်ကောင်စီက တိုက်ခိုက်ခဲ့ခြင်းဖြစ် ကြောင်း မြေပြင်ကူညီကယ်ဆယ်ရေးဆောင်ရွက် နေသူအချို့က လူထုနွေဦးသို့ အသိပေးသည်။

“ဗန်းမောက်ရွာအနီးမှာ မနေ့က နှစ်ဖက်တင်းမာမှု ဖြစ်တော့ အဲဒီရွာမှာ စစ်ရှောင်ဖို့ကျန်နေသေးတဲ့ ပြည်သူတွေကို တော်လှန်ရေးအဖွဲ့တွေက ကယ်ထုတ်တယ်။အမြန်ရွှေ့ကြရတာပေါ့။ရွာကအထွက်မှာ ထော်လာဂျီကို ဒရုန်းနဲ့ ပစ်ချခံရတယ်။စစ်ရှောင်တဲ့ ပြည်သူ ၁၁ဦးမှာ နှစ်ဦးသေဆုံးပြီး ၉ဦးဒဏ်ရာရခဲ့တယ်”ဟု ဖယ်ခုံမြို့ မြေပြင်ကူညီဆောင်ရွက်နေသူတစ်ဦးက ပြော သည်။

Public Service Announcement

အဆိုပါ လုပ်ရပ်သည် စစ်ကောင်စီ၏ လူသားမဆန်မှုကို ပြသပြီး ပြည်သူများကို စစ်ရှောင်ခွင့်် မ‌‌ပေးတော့သည့် အကြမ်းဖက်စစ်ကောင်စီဟု Karenni Hope တာဝန်ရှိသူက ပြောသည်။

“တယောက်က ပွဲခြင်းပြီးသေဆုံးပြီးကလေးငယ်တယောက်ကတော့ ကျွန်တာ်လက်‌ပေါ်မှာတင်‌တကိုယ်လုံး အေးစက်နေခဲ့ပါပြီ။ဆေးအဖွဲ့ဆီလွဲခဲ့ပြီး အပြန်လမ်းမှာတော့ ဘယ်လိုစိတ်နဲ့များပြည်သူတွေကိုလုပ်ရက်တာလဲလို့စဉ်းစားလို့တောင်မရပါဘူးဗျာ”ဟု ၎င်းက ပြောသည်။

ကရင်နီတော်လှန်ရေးအင်အားစုများက ထိန်းချုပ်ထားသည့် ဖယ်ခုံနှင့် ပင်လောင်းဒေသအချို့ကို စစ်ကောင်စီတပ်နှင့် ပအိုဝ်းပြည်သူ့စစ် က စက်တင်ဘာ ဒုတိယပတ်ကစ၍ တန်ပြန်ထိုးစစ်ဆင်နေခြင်းဖြစ်သည်။

ထို့ကြောင့် ဒေသခံပြည်သူ ငါးထောင်ခန့်မှာ အရေးပေါ် ရိက္ခာလိုအပ်ချက်များဖြင့် စစ်ရှောင် နေကြရသည်ဟု ကူညီကယ်ဆယ်ရေးဆောင်ရွက်နေသူများက အသိပေးသည်။

“ဆန်လေးနဲ့ အရေးပေါ်နေစရာလေးပဲ သူတို့က တောင်းဆိုကြပါတယ်။အဲဒါလေးရရင် လတ်တလောစိတ်ချမ်းသာရပါတယ်။ဖယ်ခုံဘက်ကို ကြည့်ပေးကြပါဦး”ဟု မြေပြင်ကူညီနေသူတစ်ဦးက ပြောသည်။

ပင်လောင်း – ဖယ်ခုံမြို့နယ်ကြားတိုက်ပွဲတွင် စစ်ကောင်စီက နေ့စဥ်လေကြောင်းပစ်ကူရယူနေပြီး နှစ်ဖက်ထိခိုက် သေဆုံးမှုရှိသော်လည်း သက်ဆိုင်ရာတပ်ဖွဲ့များက သတင်းထုတ်ပြန်ခြင်းမရှိသေးပေ။