ပြင်ပလူနာများ အတင်းအကြပ်ရွှေ့ပြောင်းခံရ
ပြင်ပလူနာများ အတင်းအကြပ်ရွှေ့ပြောင်းခံရအိမ်သွင်/People’s Spring
ရခိုင်ပြည်နယ်၊ ဂွမြို့နယ်တိုက်ပွဲအတွင်း ဒဏ်ရာရသည့် ရာချီသော စစ်သားများကို ငါးသိုင်းချောင်းဆေးရုံသို့ စစ်ကောင်စီကပို့ဆောင်ပြီး ပြင်ပလူနာများအား ရေကြည်ဆေးရုံသို့ ရွှေ့ပြောင်းထားသည်။
ဒဏ်ရာရစစ်ကောင်စီတပ်ဖွဲ့ဝင် အများအပြားကိုဧရာဝတီတိုင်း၊ ငါးသိုင်းချောင်းမြို့ဆေးရုံသို့ ယခုရက်ပိုင်းအတွင်း အရပ်သားကားများဖြင့် လာရောက်ပို့ဆောင်ခြင်းဟု အဆိုပါမြို့ခံတစ်ဦးက ပြောသည်။
” စစ်ကားတွေနဲ့လာတာ မဟုတ်ဘူး။ အရပ်သားကားတွေကို ချောဆွဲပြီးခေါ်လာတာ။ ဆေးရုံထဲကိုဝင်တာတောင် ခိုးကြောင်၊ ခိုးဝှက်ဝင်တာ”ဟု ငါးသိုင်းချောင်းမြို့ခံတစ်ဦးက ပြောသည်။
Public Service Announcement
ဆေးရုံ၌ နေရာနှင့် ကုတင်မလုံလောက်၍ ကြမ်းပြင်၌ချကာ ဆေးကုပေးနေကြောင်းလည်း သတင်းရရှ်ိသည်။ လာရောက်ကုသသူ အရေအတွက်မှာ ၁၀၀ကျော်ပြီး ဒေသခံလူနာများသည် ရေကြည်မြို့ဆေးရုံသို့ ပြောင်းရွှေ့လိုက်ရကြောင်း လူနာရှင်တစ်ဦးက ပြောသည်။
အာရက္ခတပ်တော်(AA)သည် ဂွမြို့သိမ်းတိုက်ပွဲဆင်နွှဲနေပြီး တိုက်ပွဲအလွန်ပြင်းထန်နေသည်။
တိုက်ပွဲအတွင်း စစ်ကောင်စီတပ်ဖွဲ့ဝင်များအပြားသေဆုံးသလို ငါးသိုင်းချောင်း-ဂွလမ်းပိုင်းမှတဆင့် စစ်ကူပို့သည့် စစ်ကောင်စီစစ်ကြောင်းကိုလည်း AAက ပိတ်ဆို့တိုက်ခိုက်ရာ ထိခိုက်သေဆုံးမှုများပြားနေသည်။
ဟင်္သာတမြိုအခြေစိုက် ခလရ (၁၈) တပ်ရင်း၊အိမ်မဲမြို့အခြေစိုက် ခလရ (၆၃)၊ ခလရ (၅၁) နှင့် ရန်ကုန်မြို့ လှိုင်သာယာအခြေစိုက် ခမရ (၅၃၂)မှ စစ်ကောင်စီတပ်အင်အား ၂၀၀နီးပါးကို ဂွမြို့သို့ နိုဝင်ဘာတတိယလပတ်တွင် ကားများဖြင့် ပို့ဆောင်ခဲ့ရာ AA၏ ကြားဖြတ်တိုက်ခိုက်မှုကို ခံလိုက်ရသေးသည်။
အဆိုပါ စစ်ကြောင်းကို ဂွမြို့နယ်၊သံခဲချိုင်ကျေးရွာကမ်းခြေအနီး နှင့်ကင်းပုံကျေးရွာအနီးတွင် နိုဝင်ဘာ၂၄ရက်ကစ၍ တိုက်ခိုက်ခဲ့ရာ စစ်ကောင်စီတပ်မှ ၁၂၀ကျော် သေဆုံးပြီး စစ်သုံ့ပန်းအချို့ ဖမ်းဆီးရမိသည်ဟု AAက သတင်းထုတ်ပြန်ထားသည်။
ရခိုင်ပြည်နယ်နှင့် ဧရာဝတီတိုင်းသည် နယ်မြေထိစပ်နေပြီး ယခုရက်ပိုင်းအတွင်း စစ်ကောင်စီက ဧရာဝတီတိုင်းအတွင်း တင်းတင်းကြပ်ကြပ်စစ်ဆေးနေသည်။ AAသည် ဂွမြို့ကို သိမ်းပိုက်ပြီးပါက ဧရာဝတီတိုင်းအတွင်းသို့ မဟာမိတ်များနှင့်အတူ စစ်ဆင်ရေးစတင်နိုင်ကြောင်း သုံးသပ်မှုများလည်း ရှိနေသည်။
AAသည် ယခုရက်ပိုင်းအတွင်း အမ်းမြို့မှ နောက်ဆုံးလက်ကျန် အနောက်ပိုင်းတိုင်းစစ်ဌာနချုပ်(နပခ)ကို တိုက်ခိုက်နေပြီး တစ်ချိန်တည်းတွင် ဂွမြို့နယ်ကိုလည်း ထိုးစစ်ဆင်တိုက်ခိုက်နေသည်။
အနောက်ပိုင်းတိုင်းစစ်ဌာနချုပ်၏ ယမန်နေ့ညက နောက်ဆုံးအခြေအနေကို AAက ထုတ်ပြန်ထားရာ စစ်ကောင်စီတပ်ဖွဲ့ဝင်များအပြား အလံဖြူထောင်လက်နက်ချသည်ကို တွေ့ရသည်။
“စောစော အလံဖြူထောင်လျှင် စောစော အသက်ရှင်ကျန်ရစ်စေမယ်။ မိသားစု၊ ဆွေမျိုးတို့ နှင့် စောစောတွေ့ဆုံရလိမ့်မယ်”ဟု AAက စစ်ကောင်စီတပ်ဖွဲ့ဝင်များကို သတိပေးထားသည်။
