People’s Spring
ရခိုင်ပြည်နယ်ထဲက စစ်ရေးအခြေအနေ အလှည့်အပြောင်းတွေကြောင့် ရိုဟင်ဂျာ ဒုက္ခသည်တွေကို နေရပ်ပြန်ပို့ရေးကိစ္စ အထမြောက်အောင် စီစဉ်ဖို့မဖြစ်နိုင်သေးကြောင်း ဘင်္ဂလားဒေ့ရှ် အာဏာပိုင်တွေက ပြောပါတယ်။
အာရက္ခတပ်တော် (AA)ဟာ မြန်မာ-ဘင်္ဂလားဒေ့ရှ် နယ်စပ်တစ်ကြောလုံးကို ထိန်းချုပ်ထားလိုက်ပြီ ဖြစ်တဲ့နောက် ရိုဟင်ဂျာတွေကို နေရပ်ပြန်ပို့ရေး ကိစ္စကို အကောင်အထည်ဖော်ဖို့ လက်တွေ့ မကျတော့ကြောင်း ဘင်္ဂလားဒေ့ရှ် အစိုးရရဲ့ နိုင်ငံခြားရေး အကြံပေး တူဟစ်ဒ် ဟိုစိန်က ဒီဇင်ဘာ ၂၂ ရက်နေ့၊ ဒါကာမြို့တော်မှာ ကျင်းပတဲ့ ဆွေးနွေးပွဲ တစ်ခုမှာ မှတ်ချက် ပေးသွားခဲ့ပါတယ်။
မူလက အာဏာသိမ်း စစ်ကောင်စီနဲ့ ဘင်္ဂလားဒေ့ရှ်တို့အကြား ရိုဟင်ဂျာတွေ နေရပ်ပြန်နိုင်ရေးကိစ္စ ဆွေးနွေးညှိနှိုင်းမှုတွေ ရှိထားခဲ့ပေမယ့်လည်း မြန်မာနိုင်ငံရဲ့ ပြည်တွင်းစစ်နဲ့ ပတ်သက်တဲ့ ရှုပ်ထွေးမှုတွေက အရမ်း နက်ရှိုင်းလာနေကြောင်း ဟိုစိန်ကဆိုပါတယ်။ အခုအခါ ဘင်္ဂလားဒေ့ရှ်မှာ ခိုလှုံနေတဲ့ ရိုဟင်ဂျာ ဒုက္ခသည် ၁.၂ သန်းလောက်ရှိပြီး အများအပြားဟာ ၂၀၁၇ ကတည်းက နေရပ်စွန့်ခွာ ထွက်ပြေးခဲ့သူတွေ ဖြစ်ပါတယ်။
Public Service Announcement
ဟိုစိန်ဟာ မကြာသေးခင်က ထိုင်းအစိုးရရဲ့ ဖိတ်ကြားမှုကြောင့် ထိုင်းနိုင်ငံ၊ ဘန်ကောက်မြို့တော်မှာ ကျင်းပခဲ့တဲ့ မြန်မာ့အရေး ဆွေးနွေးပွဲ တစ်ခုကိုလည်း တက်ရောက်ခဲ့ပါသေးတယ်။ အဲဒီ ဆွေးနွေးပွဲကို စစ်ကောင်စီခန့် နိုင်ငံခြားရေး ဝန်ကြီးအပြင် လာအိုနဲ့ အိန္ဒိယ နိုင်ငံခြားရေး ဝန်ကြီးတွေ၊ တရုတ်ရဲ့ ဒုတိယ နိုင်ငံခြားရေး ဝန်ကြီးတို့လည်း တက်ရောက်ခဲ့တယ်လို့ သိရပါတယ်။
ဟိုစိန်က အဲဒီ အစည်းအဝေးမှာလည်း ရိုဟင်ဂျာတွေ ဘေးကင်းကင်းနဲ့ နေရပ်ပြန်ဖို့ ကိစ္စဟာ မြန်မာနိုင်ငံမှာ ငြိမ်းချမ်းရေးနဲ့ တရားဥပဒေ စိုးမိုးမှု အာမခံချက် မပေးနိုင်သေးသ၍ ဖြစ်နိုင်ခြေ မရှိသေးဘူး ဆိုတာကို သူက တင်ပြဆွေးနွေးခဲ့ကြောင်း ပြောကြားသွားပါတယ်။
ကိုးကား: Times of India
