ကဖေး/People’s Spring
ရွှေသောင်ယံမြို့ ၊ တပင်မှော်ရွာတွင်ဇန်နဝါရီလ ၂၈ရက်နေ့က တပ်စွဲထားသည့် စစ်ကောင်စီတပ်ဖွဲ့ဝင်ချင်း ခိုက်ရန်ဖြစ်ပွားပြီး အချင်းချင်းသေနတ်ဖြင့်ပစ်ခတ်မှုဖြစ်ခဲ့ရာဗိုလ်အဆင့်ရှိသူတစ်ဦးသေဆုံးသွားသည်။
တပင်မှော်ရွာသည် ရွှေသောင်ယံဒေသအတွင်း စစ်ကောင်စီတပ်အဓိကတပ်စွဲထားသည့်နေရာများအနက် တစ်ခုဖြစ်သည်။
“အရက်မူးပြီး ရန်ဖြစ်တာ။ ဗိုလ်တစ်ကောင်သေတယ်။ အခု တပင်မှော်ရွာမှာက တခြားကရောက်လာတဲ့ စစ်သားတွေ အများကြီးပဲ” ဟု ဒေသခံတဦးကပြောသည်။
Public Service Announcement
အာရက္ခတပ်တော်(AA)က ရွှေသောင်ယံမြို့နှင့်ထိစပ်နေသော ဂွမြို့ကို ၂၀၂၄ ဒီဇင်ဘာလကုန်တွင် သိမ်းယူပြီးနောက် ရွှေ သောင်ယံမြို့၊ မကျီးစင်ရွာတွင် ဇန်နဝါရီလ ၈ရက်မှစတင်၍ တိုက်ပွဲဖြစ်ခဲ့သည်။ မကျီးစင်ရွာမှ စစ်ကောင်စီတပ် ဆုတ်ခွာထွက်ပြေးခဲ့ရပြီး ဘောမိကျေးရွာတွင် ထပ်မံတပ်စွဲခဲ့သည်။ ဘောမိရွာမှ စစ်ကောင်စီတပ်ကို ဇန်န ဝါရီလ၁၆ရက်နေ့တွင် AAနှင့် ပူးပေါင်းတပ်ကတိုက်ခိုက်ခဲ့ရာ တိုက်ပွဲအပြင်းအထန်ဖြစ်ပွားခဲ့ပြီး စစ်ကောင်စီတပ်သေဆုံးဒဏ်ရာရသူများစွာဖြင့်ထပ်မံဆုတ်ထွက်ပြေးခဲ့ရပြန်သည်။
ဘောမိရွာတိုက်ပွဲတွင် AA က စစ်တပ်ထံမှ သံချပ်ကာယာဥ်အချို့ကို သိမ်းဆည်းနိုင်ခဲ့သည်။AA က ဧရာဝတီတိုင်းအတွင်း ပွိင့်( ၂၆၃) နှင့် ပွိုင့် (၃၆၉)စခန်း နှစ်ခုကိုသိမ်းပိုက်ထားကြောင်းထုတ်ပြန်ထားသည်။
ထိုတိုက်ပွဲများ၌ထွက်ပြေးလာသည်စစ်ကောင်စီတပ်ဖွဲ့ဝင်များသည် နယ်မြေခံတပ်ရင်းထံသွားရောက်မပူပေါင်းဘဲ ထွက်ပြေးရန်ကြိုးစားခဲ့သည်။ သို့ သော်စစ်ကောင်စီကလိုက်လံဖမ်းဆီးခဲ့သည်။
“စစ်ကောင်စီတပ်သားတွေ တော်တော်လေးစိတ်ဓာတ်ကျနေတာ မြင်ရတယ်။ အခုဖြစ်တာလည်း စိတ်ဓာတ်ကျနေကြပြီး အရက်သောက်ကြရင်း ဖြစ်တာ”ဟု ဒေသခံတစ်ဦးကပြောသည်။
စစ်ကောင်စီသည် ရွှေသောင်ယံမြို့ပေါ်နှင့် မလှမ်းမကမ်းမှ တပင်မှော်၊သဘော့ကန်၊ ဂျိတ်လတ်ရွာတို့တွင်ထပ်မံခံစစ်ပြင်ထားသည်။
ဇန်နဝါရီလ၃၀ရက်တွင် အင်အား ၃၀ခန့်စီပါသည့် စစ်ကောင်စီစစ်ကြောင်းနှစ် ကြောင်းသည်ရွှေသောင်ယံမြို့ပေါ်သို့ ရောက်ရှိလာပြီး ရခိုင်-ဧရာဝတီကမ်းခြေပတ်လမ်းဘေး ရပ်ကွက်နှင့်ကျေးရွာအချို့ကို စစ်ဆေးခဲ့သည်။
“PDF သတင်းကြားလို့ဆိုပြီးလာတာ။အသက်ကြီးကြီးတွေလည်းပါတယ်” ဟု ဒေသခံတစ်ဦးကပြောသည်။
ရွှေသောင်ယံ ဒေသတွင် ဇန်နဝါရီလ၂၈ ရက်ခန့်မှစ၍ တိုက်ပွဲခေတ္တငြိမ်သက်နေသည်။သို့သော်ရွှေသောင်ယံမြို့နှင့်ဆက်စပ်နေသော သာပေါင်းမြို့နယ်အတွင်း တိုက်ပွဲဆက်ဖြစ်နေပြီး ဇန်နဝါရီလ ၂၈ရက်နေ့ကတိုက်ပွဲ၌ သာပေါင်းရဲစခန်းမှူးဒုရဲမှူးဝင်းနိုင်ဦးကို AAက စနိုက်ဘာဖြင့် ပစ်ခတ်ခဲ့၍သေဆုံးခဲ့သည်။
