မန္တလေးမြို့ပေါ် စစ်ကောင်စီတပ်ဘေးရှိ ကမ္ဘောဇဘဏ်(KBZ Bank)ကို ဒုတိယအကြိမ် ဓားပြတိုက်ခံရပြီး ကျပ်သိန်း ၁,၅၀၀ ပါသွားတယ်လို့ မြို့ခံတွေက ပြောပါတယ်။
မန္တလေးမြို့၊ မဟာအောင်မြေမြို့နယ် မန္တလေးတက္ကသိုလ်အနီး ၇၃လမ်း လမ်း၄၀နဲ့၄၁လမ်းကြားက ကမ္ဘောဇဘဏ်ကို ဒီနေ့ ဖေဖော်ဝါရီ ၂၁ရက် နေ့လည် ၂နာရီလောက်မှာ အမျိုးသားတစ်ဦးတည်း လာရောက်ဓားပြတိုက်သွားတာလို့ ဆိုပါတယ်။
“လာတာက ဆိုင်ကယ်ကလည်း စူပါကပ်နဲ့လို့ ပြောတယ်။ လက်လုပ်သေနတ်အတိုနဲ့ လာတိုက်သွားတာလို့ကြားတယ်။ အခုတော့ ရဲရော၊ စစ်တပ်ရောရောက်ပြီး ဘဏ်ပိတ်ထားပြီ”လို့ မြို့ခံတစ်ဦးကပြောပါတယ်။
Public Service Announcement
ပြီးခဲ့တဲ့ ဇန်နဝါရီ ၁၁ရက်ကလည်း အဲဒီဘဏ်ဓားပြတိုက်ခံရပြီး ဘဏ်ဝန်ထမ်းတွေက ဖမ်းဆီးခဲ့တာကြောင့် ဓားပြတိုက်သူကို ဖမ်းမိကာ ဝန်ထမ်းတစ်ဦးဒဏ်ရာရခဲ့ပါသေးတယ်။
အဲဒီဘဏ်ဟာ တက္ကသိုလ်အရံလေ့ကျင့်ရေးတပ်၊ စစ်တပ်ဘန်ကာတွေနဲ့ မျက်နှာချင်းဆိုင်မှာရှိတာလို့ သိရပါတယ်။ တက္ကသိုလ်အရံလေ့ကျင့်ရေးတပ်ရဲ့ ဝင်ပေါက်ကလည်း ၇၃လမ်း ၄၀နဲ့၄၁လမ်းကြားမှာရှိပြီး လုံခြုံရေးဘန်ကာတွေလည်းချထားပါတယ်။
ဒါ့အပြင် အခုဓားပြတိုက်ခံရတဲ့ နေရာဟာ မိန်းထဲလို့ခေါ်ပြီး မန္တလေးမြို့မှာ လူအစည်ကားဆုံးနေရာဖြစ်ပါတယ်။
