ရဲခေါင်/People’s Spring
မကွေးတိုင်း၊ စလင်းမြို့နယ် စည်ဆွဲကျေးရွာအနီးကို စစ်ကောင်စီက လေကြောင်းတိုက်ခိုက်ခဲ့ပြီး မြေပြင်မှလည်း စစ်ကြောင်းထိိုးနေကြောင်း ဒေသခံသတင်းရင်းမြစ်အချို့က ပြောသည်။
ယနေ့(ဖေဖော်ဝါရီ ၂၆ရက်) နံနက် ၉ နာရီခန့်တွင် စလင်းမြို့နယ်၏ အရှေ့ဘက်ခြမ်းရှိ စည်ဆွဲကျေးရွာဝန်းကျင်ကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ခြင်းဟု ဆိုသည်။ လေကြောင်းတိုက်ခိုက်မှုကြောင့် ထိခိုက်မှုအခြေအနေကို မသိရသေးပေ။
“ဖုန်းလိုင်းတွေဖြတ်ထားတယ်။သတင်းက အသေးစိတ်မသိရသေးဘူး”ဟု စလင်းမြို့နယ်ပြည်သူ့အုပ်ချုပ်ရေးအဖွဲ့(ပအဖ)တာဝန်ရှိသူက လူထုနွေဦးသို့ ပြောသည်။
Public Service Announcement
စစ်ကောင်စီတပ်သည် ယမန်နေ့ကလည်း စစ်ကားလေးစီးဖြင့် မကျီးစင်ကျေးရွာဘုန်းကြီးကျောင်းဝင်း၌ တပ်စွဲရောက်ရှိနေခြင်းဟု Salin Supporting Teamက အသိပေးသည်။
အနီးဝန်းကျင်ရွာများဖြစ်သည့် စည်ဆွဲ၊ ကံဆွယ်၊ထူးကြီး၊ စမ်းကလေး၊သန်းကုန်း၊ကိုးလံနှင့် ဇီးဖြူပင်ကျေးရွာများမှ ဒေသခံပြည်သူများအနေဖြင့် ကြိုတင်ရှောင်တိမ်ကြရန်လည်း သတိပေးထားသည်။
စစ်ကောင်စီ၏ လေကြောင်း ၊ မြေပြင်ထိုးစစ်နှင့် ပတ်သက်၍ တိုက်ပွဲဖြစ်ပွားမှု ရှိ၊မရှိ စလင်းမြို့နယ် ပကဖ(ပြည်သူ့ကာကွယ်ရေးတပ်ဖွဲ့)တာဝန်ရှိသူ ကိုအောင်ဆန်းထံ လူထုနွေဦးက ဆက်သွယ်မေးမြန်းဆဲ ဖြစ်သည်။
စလင်းမြို့နယ်တွင်းသို့ စစ်ကောင်စီသည် အင်အား ၂၀၀ကျော်အသုံးပြု၍ စစ်ရေးအရ အရေးပါသည့် ဆင်ဖြူကျွန်းမြို့ နှင့် တညောင်မြို့ ကားလမ်းဘေးရှိ ကျေးရွာများကို ဇန်နဝါရီတတိယပတ်ကစ၍ စစ်ကြောင်းထိုးနေခြင်း ဖြစ်သည်။
ဖေဖော်ဝါရီ ၉ ရက်က စလင်းမြို့နယ်ရှိ အုန်းတောရွာနှင့် မြောင်းကြားကျေးရွာရှိ အိမ်ခြေ ၁၀၀ကျော်အား စစ်ကောင်စီတပ်က မီးရှို့ဖျက်ဆီးခဲ့သည့်အပြင် ပြောင်းခင်း တောင်ရွာနှင့် မြောက်ရွာရှိ နေအိမ်များ(စိစစ်ဆဲ)ကို ဖေဖော်ဝါရီ ၁၇ ရက်က မီးရှို့ဖျက်ဆီးခဲ့သည်။
စလင်းမြို့နယ်တွင် စစ်ကောင်စီ၏ ခြေလျင်တပ်ရင်း (ခလရ -၂၅၃၊၂၅၄ နှင့် ၂၅၅)တပ်ရင်းတို့ အခြေစိုက်ထားသည်။ ထို့အပြင် စစ်ကောင်စီ၏ ကာကွယ်ရေးပစ္စည်းစက်ရုံများရှိသည့် ပွင့်ဖြူ ၊ စေတုတ္တရာမြို့နယ်၊ ဆိပ်ဖြူမြို့နယ်တို့နှင့်လည်း နယ်မြေထိစပ်နေသည်။
