ထားဝယ်မြို့မှတဆင့် မြစ်ကြောင်းအတိုင်းစုန်ဆင်းလာသော စစ်ကောင်စီတပ်သားများလိုက်ပါလာသည့် စက်လှေတစ်စင်းအား လက်နက်ကြီးဖြင့်ပစ်ခတ်ခဲ့ရာ မီးလောင်သွားကြောင်း ထားဝယ်တပ်ပေါင်းစုက ယနေ့(မတ်လ ၁၁ရက်) အသိပေး ထုတ်ပြန်သည်။
မတ်လ ၁၀ရက် ည ၁၁နာရီခန့်က ထား၀ယ်မြို့မှ သရက်ချောင်းမြို့နယ် ဆင်ဖြူပြင်ဆိပ်ကမ်းဘက်သို့ စုန်ဆင်းလာသည့် စစ်ကောင်စီ၏ စက်လှေတစ်စင်းအား RPG လက်နက်ကြီးအပါအဝင် လက်နက်ငယ်များဖြင့် တိုက်ခိုက်ချေမှုန်းခဲ့ခြင်းဟု ဖော်ပြသည်။
“ညက မြစ်ကြောင်းတိုင်း ဆင်းလာလို့ ဗျင်းထည့်လိုက်တာဗျ။ စကစ ၆၀ လောက်ကိုလိုက်ပါလာတာ။ ထား၀ယ်ကနေမြစ်ကြောင်းအတိုင်း မြိတ်ဖက်ကိုဦးတည်ပြီး ဆင်းလာတာပါ”ဟု ထားဝယ်တပ်ပေါင်းစုတွင်ပါဝင်သည့် လောင်းလုံးမြို့နယ်(ပကဖ)မှ ပြောခွင့်ရသူတစ်ဦးက လူထုနွေဦးသို့ ပြောသည်။
Public Service Announcement
တိုက်ခိုက်မှုမှာ ၁၀မိနစ်ခန့် အပြန်လှန်ပစ်ခတ်မှုဖြစ်ပွားခဲ့ပြီး စက်လှေ RPG ထိမှန်၍ မီးလောင်ကာ စက်လှေကိုယ်ထည် ပျက်စီးသွားသည့်အပြင် စစ်ကောင်စီတပ်သား ၂၀ခန့် သေဆုံးကာ ၃၀ခန့် ဒဏ်ရာရသွားကြောင်း ၎င်းက ဆက်ပြောသည်။
” တိုက်ခိုက်ပြီးနောက်ပိုင်းမှာ မီးလောင်လို့ စက်လှေကိုယ်ထည် ပျက်စီးသွားတယ်။ လှေကတော့ ရေစီးအတိုင်း မျောပါသွားတယ်ဗျ” ဟု လောင်းလုံးမြို့နယ်(ပကဖ)မှ ပြောခွင့်ရသူက ရှင်းပြသည်။
သို့သော် စစ်ကောင်စီတပ်၏ ထိခိုက်သေဆုံးမှုအပေါ် လူထုနွေဦးက အတည်မပြုနိုင်ပေ။
အလားတူ မတ်လ ၄ရက် ညနေ ၄နာရီခွဲခန့်ကလည်း ထား၀ယ်မြို့မှတဆင့် မြစ်ကြောင်းအတိုင်း စစ်မှုထမ်းသင်တန်းသားများ တင်ဆောင်၍ ကွန်တိန်နာသင်္ဘောဖြင့် စုန်ဆင်းလာသော စစ်ကောင်စီတပ်သားများအား လောင်းလုံး (ပကဖ)နှင့် ထားဝယ်ပြည်သူ့ကာကွယ်ရေးတပ်ဖွဲ့ (DDT)တို့ ပူးပေါင်း၍ ကြားဖြတ်တိုက်ခိုက်ခဲ့သေးသည်။
