ဇွန် – ၆ ၊၂၀၂၅၊နိုင်ပကောင်း/People’s Spring
ကရင်ပြည်နယ်မြို့တော် ဘားအံမှာ လိုင်စင်မဲ့ ကားတွေကို စစ်ကောင်စီက ဖမ်းဆီးနေပေမယ့် အပစ်ရပ်ထားကြတဲ့ လက်နက်ကိုင်အဖွဲ့တွေရဲ့ လိုင်စင်မဲ့ကားတွေကိုတော့ ဖမ်းဆီးတာမရှိဘူးလို့ မြို့ခံတွေဆီကသိရပါတယ်။
ဇွန်လ ၁ ရက်ကစတင်ပြီး ဘားအံမြို့ပေါ် ရပ်ကွက်တွေ ၊ မြို့အဝင် အထွက် နဲ့မြို့ပြင် မှာပါ စစ်ကောင်စီတပ်ဖွဲ့နဲ့ ကရင့်နယ်ခြားစောင့်တပ်(BGF) တို့က လိုင်စင်မဲ့ကားတွေကို လိုက်လံဖမ်းဆီးခဲ့တာပါ။
အဲဒီလို ဖမ်းဆီးမှုတွေကြောင့် ကျေးရွာတွေဘက်က ဒေသခံတွေဟာ ဘားအံ မြို့ဆီ ကုန်ပစ္စည်းလာရောက် ဝယ်ယူတာ ၊ ဆေးခန်းပြတာ ၊ ကျောင်းကြိုပို့ တာ ၊ လည်ပတ်တာတွေ မလုပ်ရဲကြတော့ဘူးလို့ မြို့ခံတွေက ဆိုပါတယ်။
Public Service Announcement
လိုင်စင်မဲ့ကား ဖမ်းတဲ့အဖွဲ့ဟာ ဘားအံမှာ ကျောင်းတက် ၊ကျောင်းဆင်းချိန်ကို ပစ်မှတ်ထားပြီး ဖမ်းတာလို့ မြို့ခံတွေရဲ့ ပြောပြချက်အရသိရပါတယ်။
အခုလို ဖမ်းဆီးမှုတွေကြောင့် ဘားအံမြို့မှာ အသွားအလာကျဲတာ ၊ အထင်ကရ လည်ပတ်စရာ နေရာတွေမှာ လာရောက်သူနည်းပါးသွားတာတွေကြုံနေရပါတယ်။
ဘားအံမြို့ က စျေးဟာ လည်း အနီးဝန်းကျင်ရွာတွေရဲ့ ဝယ်လိုအားကို အားပြုရောင်းချရတာကြောင့် ရောင်းအားသိသိသာသာကျသွားတယ်လို့ မြို့ခံ တစ်ဦးက ဆိုပါတယ်။
“အကုန်စီးပွားပျက်ကုန်ပြီလေ၊ မြို့ထဲမှာတော့ ရောင်းမကောင်းလို့ စျေးသယ်တွေ ငြီးနေကြတယ်” လို့ ကရင်သတင်းရင်းမြစ် က ပြောပြပါတယ်။
ဒေသခံ ပြည်သူတွေရဲ့ လိုင်စင်မဲ့ကားတွေကို ဖမ်းဆီးပေမယ့် ကရင်နယ်ခြားစောင့်တပ်(BGF)၊ ဒီမိုကရေစီအကျိုးပြုကရင်တပ်မ တော် (DKBA)၊ ကရင်ငြိမ်းချမ်းရေးကောင်စီ(KNU/KNLA PC)၊ ဗိုလ်ဘိဦးဆောင်တဲ့ DKBA တပ်ဖွဲ့တို့ ရဲ့ လိုင်စင်မဲ့ကား တွေကိုတော့ စစ်ကောင်စီ က ဖမ်းဆီးတာ မရှိပါဘူး။
BGF ဟာ စစ်ကောင်စီလက်အောက်ခံ တပ် ဖြစ်သလို DKBA နဲ့ KNU/KNLA PC တို့က တော့ အပစ်ရပ် NCA လက်မှတ်ထိုးထားတဲ့အဖွဲ့တွေဖြစ်ပါတယ်။
ထိုင်း – မြန််မာနယ်စပ် မြဝတီကနေ တဆင့် ဘားအံ ၊ လှိုင်းဘွဲ့မြို့ဘက်ဆီ BGF နဲ့ လက်နက်ကိုင်အဖွဲ့ အချို့ တာဝန်ယူ သယ်ဆောင်ပေးနေတဲ့ လိုင်စင်မဲ့ ကားတွေ ၊ သောင်ရင်းမြစ် ကမ်းကူး ဖောင်တွေ ၊ ဂိတ်တွေကိုတော့ စစ်ကောင်စီရဲ့ ကရင်ပြည်နယ်အစိုးရအဖွဲ့က မဖမ်းရဲဘူးလို့ လည်း ကရင်သတင်းရင်းမြစ်က ပြောပါတယ်။
လိုင်စင်မဲ့ ကားတွေ ၊ဆိုင်ကယ်တွေကို မြဝတီကနေ ဘားအံမြို့ မြောက်ဘက် ခြမ်း မှာ သံလွင်မြစ်ကို ဖောင်နဲ့ ဖြတ်ကူးသယ်ယူကာ သထုံ ၊ ဘီလင်း နဲ့ပဲခူးတိုင်းဘက်ဆီ ပို့ဆောင်နေတာလို့လည်းသိရပါတယ်။
အဲဒီလို သယ်ယူပို့ဆောင်ရာမှာ ဖြတ်သန်းရတဲ့ ဂိတ်တွေ ၊ ဖောင်တွေ ကို BGF နဲ့ ဗိုလ်ဘိဦးဆောင်တဲ့ DKBA တပ်ဖွဲ့တွေက အများစု ပိုင်ဆိုင်ပြီး အခွန်အခတွေ ကောက်ခံနေကြတယ်လို့သိရပါတယ်။
ကရင်ပြည်နယ်အတွင်းက ဒေသခံ ပြည်သူအများစု သာမက စစ်ကောင်စီရဲ့ စစ်ဘက် ၊နယ်ဘက် ဝန်ထမ်းတွေ လည်း သွားလာရေးအတွက် လိုင်စင်မဲ့ကားတွေကိုသာ အဓိကထားအသုံးပြုနေကြတာပါ။
