ဇွန်-၁၉၊၂၀၂၅။ပုသိမ်သူ/People’s Spring
ဇွန်လ ၁၈ရက်ညနက်ပိုင်း၌ ဟင်္သာတမြို့နယ်အနီးပတ်ဝန်းကျင်၌ စစ်ကောင်စီတပ်က လေကြောင်းတိုက်ခိုက်မှုများပြုလုပ်သွားပြီး ပြင်းထန်သည့်ပေါက်ကွဲမှုများကြောင့် မြို့ပေါ်ရပ်ကွက်ရှိအိမ်များ တုန်ခါမှုဖြစ်ခဲ့သည်ဟု ဒေသခံများကပြောသည်။
မည်သည့်နေရာသို့ လေကြောင်းတိုက်ခိုက်သည်ကိုမသိရသေးသော်လည်း ဟင်္သာတခရိုင်အတွင်းရှိ လေးမျက်နှာမြို့တွင် အာရက္ခတပ်တော်(AA) ပူးပေါင်းတပ်များ နှင့် စစ်ကောင်စီတပ်တို့ကြား တိုက်ပွဲဖြစ်ပွားမှုရှိနေသည်။
ပြင်းထန်သည့်ပေါက်ကွဲသံများကို ဟင်္သာတမြို့ပေါ်မှ ယခင်ရက်ကတည်းကကြားခဲ့ရသော်လည်း ယနေ့ညတွင် ပိုမိုပြင်းထန်သည်ဟုဒေသခံအချို့ကပြောသည်။
Public Service Announcement
လေးမျက်နှာမြို့သည် ဟင်္သာတမြို့နှင့် ၁၈မိုင်ခန့်ဝေးသည်။ ည၈နာရီခန့်မှစ၍ တိုက်လေယာဉ်ပျံသည့် အသံများကြားရပြီးနောက် ပြင်းထန်သည့်ပေါက်ကွဲသံများ ဆက်တိုက်ထွက်ပေါ်လာခြင်းဟု မြို့ခံများကပြောသည်။ ည၁၁နာရီ ၂၄မိနစ်က ဆယ်လုံးခန့်ဆက်တိုက်ပေါက်ကွဲသံကြားရပြီးနောက် ငြိမ်သက်နေကြောင်း မြို့ခံများကပြောသည်။
AAနှင့် ပူးပေါင်းတပ်များသည် ရေကြည်မြို့နယ်၌ စစ်ကောင်စီ အဓိကတပ်စွဲထားသည့်နေရာဖြစ်သော အမြောက်တပ်(၃၄၄)အနီး၌လည်း တိုက်ပွဲများပြင်းထန်စွာဖြစ်ပွားနေကြောင်းသတင်းများရှိသည်။လေးမျက်နှာမြို့သည်ပုသိမ်-မုံရွာကားလမ်းမဘေး၌ရှိပြီး ကျေးရွာအချို့AAနှင့် ပူးပေါင်းတပ်များက နယ်မြေစိုးမိုးမှုရယူထားသည်။
ဇွန်လ ၁၉ရက်ညသန်းခေါင်းအထိ တိုက်လေယာဉ်ပျံသန်းသွားသည့်အသံများ ကြားနေရသေးကြောင်းဒေသခံအချို့ကပြောသည်။
