စစ်တပ်လက်​အောက်ခံ SNAမှ တပ်ဖွဲ့ဝင် ၁၇ဦးအလင်းဝင်

ဇူလိုင်-၇၊၂၀၂၅။ဇော်ရမ်း/People’s Spring

ဟုမ္မလင်းမြို့နယ်တွင် စစ်ကောင်စီလက်အောက်ခံ ရှမ်းနီတပ်(SNA)မှ တပ်ဖွဲ့ဝင်၁၇ဦးသည် တပ်ဖွဲ့တွင် ဖိနှိပ်မှုများကိုမခံနိုင်၍ပြည်သူ့ကာကွယ်ရေးအဖွဲ့များထံလက်နက်ချအလင်းဝင်ရောက်လာသည်။

အမျိုးသားညီညွှတ်ရေးအစိုးရ(NUG)၊ကာကွယ်ရေးဝန်ကြီးဌာန၊အမှတ် (၁)စစ်ဒေသမှ ခန္တီးခရိုင် အမှတ် ( ၁) ၊ အမှတ် (၂) ၊ အမှတ် (၃) ၊ အမှတ် (၄) တပ်ရင်းနှင့်ဟုမ္မလင်းမြို့နယ်ပြည်သူ့ကာကွယ်ရေးအဖွဲ့ (ပကဖ)၊တိုက်နယ် (၃)ပကဖ၊ တိုက်နယ် (၅)ပကဖထံသို့ လက်နက်ခဲယမ်းများနှင့်အတူအလင်းဝင်ရောက်လာခဲ့ခြင်းဟု ဟုမ္မလင်းမြို့နယ်ပြည်သူ့ကာကွယ်ရေးအဖွဲ့(ပကဖ)က သတင်းထုတ်ပြန်သည်။

“ ဟုမ္မလင်းနယ်ထဲမှာ ဒေသခံတွေကို အတင်းအကြပ်စုဆောင်းပြီး ရှေ့တန်းကိုပို့နေတာမျိုးတွေများတယ်။ အခု အလင်းဝင်လာတာက SNA တပ်ရင်း ၇၅၃က များတယ်။ တပ်ထဲမှာ ခွဲခြားဆက်ဆံတာတွေ၊ ဖိနှပ်တာတွေ မခံနိုင်လို့ထွက်ပြေးလာကြတာလို့ သိရတယ်။ အသက်ကြီးကြီးတွေရော၊ အသက်ငယ်ငယ်တွေရောပါတယ်” ဟုခန္တီးခရိုင်မှ ကာကွယ်ရေးရဲဘော်တစ်ဦးကပြောသည်။

Public Service Announcement

အလင်းဝင်လာသူများအားဂုဏ်ပြုပြီး ဆုကြေးငွေများပေးအပ်ခြင်းနှင့် ယူဆောင်လာသောလက်နက်များအပ်နှံခြင်းအခမ်းအနားကိုဇူလိုင်လ ၅ ရက်နေ့က ဟုမ္မလင်းမြို့နယ်ပြည်သူ့အုပ်ချုပ်ရေးအဖွဲ့ (ပအဖ) ၏ ပင်လုံခန်းမတွင်ကျင်းပခဲ့သည်ဟု သတင်းထုတ်ပြန်ထားသည်။

စစ်အာဏာရှင်စနစ်ဆိုးကို အမြစ်ဖြတ်နိုင်ရေးအတွက် ကျန်နေသေးသော စစ်သားများ၊ SNA ပြည်သူ့စစ်ရဲဘော်များအနေဖြင့်နီးစပ်ရာတပ်ရင်းတပ်ဖွဲ့များထံ ဆက်သွယ်အလင်းဝင်ရောက်နိုင်ပြီး ကြိုဆိုနေမည်ဖြစ်ကြောင်းလည်းဟုမ္မလင်းမြို့နယ်ပြည်သူ့ကာကွယ်ရေးအဖွဲ့(ပကဖ)က သတင်းထုတ်ပြန်သည်။

စစ်ကောင်စီသည် ရှမ်းနီတိုင်းရင်းသားများ အခြေချနေထိုင်သည့် စစ်ကိုင်းတိုင်းနှင့်ကချင်ပြည်နယ်မှ မြို့နယ်များတွင် SNA တပ်ဖွဲ့မှတစ်ဆင့် စစ်သားစုဆောင်းပြီး လက်နက်တပ်ဆင်ပေးကာ တော်လှန်ရေးအင်အားစုများ၏တိုက်ခိုက်မှုများကို ခုခံနေသည်။ စစ်သားစုဆောင်းခံရသူများသည် ပြည်သူ့ကာကွယ်ရေးတပ်ဖွဲ့များထံ အလင်းဝင်မှုများရှိနေသည်။

ပြီးခဲ့သည့်ဖေဖော်ဝါရီလကလည်း SNAတပ်ဖွဲ့ဝင် ကိုးဦးသည် လက်နက်များဖြင့် ဟုမ္မလင်းမြို့နယ်ပြည်သူ့ကာကွယ်ရေးအဖွဲ့ (ပကဖ)ထံအလင်းဝင်ခဲ့ဖူးသည်။ ဇွန်လ၁၅ရက်ကလည်း SNA တပ်မဟာ(၆၁၄) မှ ရဲဘော်တစ်ဦးသည် M 23 သေနတ်တစ်လက်နှင့်ခဲယမ်းများယူဆောင်ကာ ကသာခရိုင်အမှတ်(၄)တပ်ရင်းထံ အလင်းဝင်ခဲ့သည်။