ဇူလိုင်-၁၄၊ ၂၀၂၅။ မေရီ/People’s Spring
စစ်ကောင်စီက ရန်ကုန်၊ မန္တလေးနဲ့ ဧရာဝတီတိုင်းက Non-CDM ဝန်ထမ်းတွေကို ရွေးကောက်ပွဲသင်တန်း တက်ခိုင်းနေပြီး သင်တန်းမတက်ချင်လို့ ဝန်ထမ်းတွေကြား သဘောထားကွဲလွဲတာတွေ ဖြစ်ပွားနေကြောင်း သတင်းရရှိပါတယ်။
ဇူလိုင်လ ပထမပတ်ကစပြီး စစ်ကောင်စီက ရန်ကုန်၊ မန္တလေးနဲ့ ဧရာဝတီတိုင်းက Non-CDM ဝန်ထမ်းတွေကို ရွေးကောက်ပွဲအတွက် သင်တန်းတွေ ပေးနေပါတယ်။
အဲဒီသင်တန်းကို ဝန်ထမ်းတွေထဲ မတက်ချင်သူတွေများနေတာကြောင့် မဲနှိုက်နေရပြီး ရာထူးအဆင့်အလိုက် အောက်က လူကို အစားထိုးတာ၊မနူးမနပ်အသစ်ဝင်လာသူ၊ အသစ်ပြောင်းလာသူကို အစားထိုးထည့်တာတွေပါ ပြုလုပ်နေကြောင်း စစ်ကောင်စီဌာနဆိုင်ရာဝန်ထမ်းတွေနဲ့ နီးစပ်သူတွေက ပြောပါတယ်။
Public Service Announcement
“ကြည့်မြင်တိုင်မှာဆို ဌာနတခု ၂သီးစား ဦးစီးအရာရှိ ဘောမ ဒေါ်စိန်အေးကျောင်းဆင်း တယောက်ဆို ထွေ/အုပ်ကဖုန်းခေါ်ရင်မကိုင်တာ၊ နံပါတ်တလွဲပေးတာ၊စက်ပိတ်ထားတာ၊သု့ရုံးက တယောက်ယောက်ကခေါ်ပေးရင် ပြဿနာရှာ၊ရန်ရှာတာတွေလုပ်ပါတယ်။ အရာရှိဖြစ်ပြီးကျင့်ဝတ်သိက္ခာ ကင်းမဲ့တာကိုပြပါတယ်။”လို့ ဝန်ထမ်းလောကနဲ့ နီးစပ်သူတဦးက ပြောပါတယ်။
သင်တန်းတက်နေရတဲ့ ဌာနတွေရဲ့အမည်စာရင်းကိုတော့ လူထုနွေဦးက မသိရသေးပါဘူး။
“ဆမရထားတဲ့( ကျန်းမာရေးဝန်ထမ်း)တွေရောမဲနှိုက်ပြီး တက်ခိုင်းနေတာ”လို့ ဝန်ထမ်းတွေနဲ့ နီးစပ်သူတဦးက ပြောပါတယ်။
ဧရာဝတီတိုင်း၊ မြန်အောင်ခရိုင်၊ အင်္ဂပူမြို့မှာတော့ ရွေးကောက်ပွဲသင်တန်းအတွက် အခြေခံပညာကျောင်းတွေက ဆရာဆရာမတွေအပါအဝင် Non-CDM ဝန်ထမ်း(၈၀၀)ဦးအထိ တောင်းထားပြီး တစ်နေ့ လူတစ်ရာနှုန်းနဲ့ သင်တန်း ၈ ရက် ပြုလုပ်သွားမယ်လို့ သိရပါတယ်။
ပြည်သူတွေအနေနဲ့ စစ်ကောင်စီရဲ့ ရွေးကောက်ပွဲကို အထောက်အကူပေးနေတဲ့ Non-CDM ဝန်ထမ်းတွေကို သတင်းပေးကြဖို့ မန္တလေးတိုင်း၊ ဝမ်းတွင်းမြို့နယ်အခြေစိုက် တော်လှန်ရေးအဖွဲ့ဖြစ်တဲ့ Wundwin Township Revolution Force အဖွဲ့က အသိပေးထားပါတယ်။
စစ်ကောင်စီပြုလုပ်မယ့် ရွေးကောက်ပွဲကို မပူးပေါင်းကြဖို့ တော်လှန်ရေးအဖွဲ့အစည်းတွေက သတိပေးထားပြီး ဇူလိုင် ၁၁ ရက် ညကလည်း ရွေးကောက်ပွဲအတွက်ပြင်နေတဲ့ မြောက်ဥက္ကာလာပ ပြည်ခိုင်ဖြိုးရုံးကိုတော်လှန်ရေးနှစ်ဖွဲ့က ပစ်ခတ်တိုက်ခိုက်ခဲ့ပါသေးတယ်။
