ဇူလိုင်-၂၀၊ ၂၀၂၅။ရဲခေါင်၊ဇော်ရမ်း/People’s Spring
ရန်ကုန်-မန္တလေးအမြန်လမ်း၌ စစ်ကောင်စီ၏ ရဲကားတစ်စီးအား တိုက်ခိုက်ရာ ရဲနှစ်ဦး သေဆုံးပြီး ကားအား မီးရှို့ဖျက်ဆီးခဲ့ကြောင်း မြင်းခြံခရိုင်အမှတ် (၄)တပ်ရင်း၊ မြင်းခြံခရိုင်အမှတ် (၁၀)တပ်ရင်းဦးဆောင်သူ ကိုစိုးအောင်က လူထုနွေဦးသို့ ပြောသည်။
ယနေ့(ဇူလိုင် ၂၀ရက်) နံနက် ၇နာရီခွဲခန့်တွင် ရန်ကုန်-မန္တလေးအမြန်လမ်း မိုင်တိုင် (၃၁၈)သို့ မောင်းလာသည့် စစ်ကောင်စီ၏ လက်အောက်ခံ ရဲကားကို ပြောက်ကျားနည်းဖြင့် ပစ်ခတ်တိုက်ခိုက်ခဲ့ခြင်းဟု ဆိုသည်။
“ကားက ရဲကားနဲ့လာတာပါဗျ။ကားပေါ်မှာလည်း ရဲနှစ်ဦး ပါပါတယ်။ပါလာတဲ့နှစ်ယောက်စလုံးကို ပစ်ခတ်ရှင်းလင်းနိုင်ခဲ့တယ်။ကားကိုလည်း သိမ်းဆည်းရရှိတယ်။သူတို့ပါလာတဲ့ လက်နက်ခဲယမ်းတွေရတယ်”ဟု ကိုစိုးအောင်က တိုက်ခိုက်မှုဖြစ်စဥ်အပေါ် ပြောသည်။
Public Service Announcement
၄၅ မိနစ်ကြာတိုက်ခိုက်မှုအတွင်း BA-94 နှစ်လက်၊ ကျည်ဘောက် ငါးခုနှင့် ကျည်များ သိမ်းဆည်းရမိကြောင်း အဆိုပါတပ်ရင်းက အသိပေးသည်။
ကားအား မောင်းနှင့်ယူဆောင်ရန်ကြိုးပမ်းခဲ့သေးပြီး မောင်းမရ၍ မီးရှို့ဖျက်ဆီးခဲ့ခြင်းဖြစ်သည်။
ရဲဘော်များ အထိအခိုက်မရှိဆုတ်ခွာခဲ့ကြောင်းလည်းဖော်ပြထားသည်။
တိုက်ပွဲသတင်းအား ယနေ့နံနက်ပိုင်းက ထွက်ပေါ်ခဲ့ရာတွင် အမြန်လမ်း မိုင်တိုင်အမှတ် ၃၁၈- ၃၁၉ အနီးမှ ပြင်စည်အမြန်လမ်းရဲကင်းစခန်းကို တိုက်ခိုက်ခြင်းဟု ဒေသတွင်းကာကွယ်ရေးရဲဘော်အချို့က ပြောခဲ့သည်။ ယခုညပိုင်းမှသာ နွားထိုးကြီး (Natogyi PDF)က သတင်းထုတ်ပြန်ခြင်းဖြစ်သည်။
အရေးအကြောင်းပေါ်မူတည်ပြီး ခရီးသွားပြည်သူများအနေဖြင့် အမြန်လမ်းအသုံးပြုရာတွင် ဒေသခံ ပြည်သူကာကွယ်ရေးတပ်များ၏ အချိန်နှင့်တပြေးညီ အသိပေးမှုများကို သတိပြုရန်လည်း မြင်းခြံခရိုင်အမှတ် (၄)တပ်ရင်း၊ မြင်းခြံခရိုင်အမှတ် (၁၀)တပ်ရင်းက သတိပေးထားသည်။
စစ်ကောင်စီသည် အရပ်သားကားများကို အသုံးပြု၍ အမြန်လမ်း၌ စစ်ရေးလှုပ်ရှားမှုများရှိနေကြောင်းလည်း အသိပေးသည်။
(အမြန်လမ်း၌ ရဲကားအား တိုက်ခိုက်မှုအပြီး တွေ့ရစဉ်။ ရုပ်သံ – NPDF)
