ကချင်ပြည်နယ်က ရဲတစ်ဦး မုံရွာပကဖထံ အလင်းဝင်

ဇူလိုင်-၂၁၊ ၂၀၂၅။ ဇေအောင်/People’s Spring

ကချင်ပြည်နယ်၊ ဝိုင်းမော်မြို့မရဲစခန်းက ရဲဒုတပ်ကြပ်တစ်ဦး မုံရွာမြို့နယ်ပြည်သူ့ကာကွယ်ရေးအဖွဲ့ထံ ဆက်သွယ်ပြီး အလင်းဝင်လာခဲ့ပါတယ်။

ကချင်ပြည်နယ် ဝိုင်းမော်မြို့၊ မြို့မရဲစခန်းမှာ တာဝန်ကျနေတဲ့ ရဲဒုတပ်ကြပ် တစ်ဦးဟာ ဒီကနေ့ ဇူလိုင် ၂၁ ရက်မှာ မုံရွာမြို့နယ် ပြည်သူ့ကာကွယ်ရေးအဖွဲ့ ၊ တိုက်နယ် (၃) ပကဖ ထံသို့ လက်နက်မပါဘဲ အလင်းဝင်ရောက်လာခဲ့တယ်လို့ အဲဒီအဖွဲ့က ထုတ်ပြန်ပါတယ်။

“သူအလင်းဝင်တာက မြေပြင်ချိတ်ဆက်မှုလို့ပဲ လောလောဆယ်ပြောလို့ရပါတယ်။ နယ်ကျော်အလင်းဝင်တာက အရင်ကလည်းရှိတယ်။ သတင်းမထုတ်ပြန်ခဲ့တာဗျ။”လို့ မုံရွာမြို့နယ်ပြည်သူ့ကာကွယ်ရေးအဖွဲ့ တာဝန်ရှိသူက ပြောပါတယ်။

Public Service Announcement

အလားတူ မုံရွာ-မန္တလေးလမ်းပေါ်၊ ချောင်းဦးမြို့နယ်၊ ငါးယှန်ဂိတ်က အဓမ္မ စစ်မှုထမ်းခံရတဲ့ တပ်သားသစ်တစ်ဦးလည်း သေနတ် ၃ လက်နဲ့အတူ အလင်းဝင်လာကြောင်း Golden Target Force (GTF)အဖွဲ့ တာဝန်ရှိသူက ပြောပါတယ်။

“ဂန်းတွေက သူက မနိုင်လို့ ဖွတ်ထားခဲ့တာ။ ကျနော်တို့ အဲ့ငါးယှန်ဂိတ်နဲ့ဆို တစ်မိုင်ဝန်းကျင်လောက်ပဲ ဝေးတော့မယ်။ အဲ့ထိ ပိုက်စိပ်တိုက် လိုက်ရှာရတာပေါ့။ ညတုန်းက ဖွတ်ထားခဲ့တာဆိုတော့ သိပ်မမှတ်မိတော့ ရှာတာတော့ နည်းနည်းအချိန်ပေးလိုက်ရတယ်။”လို့ အထက်ပါတာဝန်ရှိသူက ပြောပါတယ်။

အလင်းဝင်တပ်သားဟာ MA-1 ၃လက်၊ ကျည်ဘောက်(၂)ဘောက်၊ 5.56 ကျည်(၂၀)ကို ယူဆောင်လာလို့ ဂုဏ်ပြုဆုငွေ ပေးနိုင်ဖို့ စီစဥ်နေကြောင်း သိရပါတယ်။

ဇူလိုင် ပထမလဝက်အတွင်းကလည်း မုံရွာမြို့ အနောက်မြောက်တိုင်းစစ်ဌာနချုပ်(နမခ)ကနေ အဓမ္မစစ်မှုထမ်းခံရတဲ့ တပ်သားသစ် (၇)ဦးဟာ ဒေသကာကွယ်ရေးအဖွဲ့တွေဆီ အလင်းဝင်ရောက်ခဲ့ပါသေးတယ်။

ပြည်သူ့ရင်ခွင်ခိုလှုံလိုသူတွေကို အကူအညီပေးနေတဲ့ ပြည်သူ့ပန်းတိုင်အဖွဲ့က ကောက်ယူထားတဲ့ မှတ်တမ်းတွေအရ ၂၀၂၅ ခုနှစ် ဇွန်လအတွင်း အလင်းဝင်လာတဲ့ စစ်သား ၁၀၀ ဦး၊ ရဲ ၅ ဦး၊ ပြည်သူ့စစ် ၆ ဦး စုစုပေါင်း ၁၁၁ ဦးရှိကြောင်း၊ အလင်းဝင် စစ်သားတွေအနက် ၅၂ ဦးမှာ စစ်မှုထမ်းတပ်သားသစ်များ ဖြစ်ကြောင်း ပြည်သူ့ပန်းတိုင်က အသိပေးထားပါတယ်။