သြဂုတ်-၈၊၂၀၂၅။အာရုဏ်ဦး/People’s Spring
ပဲခူးမြို့၊ ရွှေမော်ဓောဘုရားလမ်းနဲ့ တောင်ငူလမ်းထောင့်မှာတည်ရှိတဲ့ ဗိုလ်ချုပ်အောင်ဆန်းမြင်းစီးရုပ်တုကို စစ်ကောင်စီကဖယ်ရှားရှင်းလင်းလိုက်ပြီလို့ ပဲခူးမြို့ခံတွေကပြောပါတယ်။
သြဂုတ် ၇ ရက်နေ့ညပိုင်းက ဗိုလ်ချုပ်ရုပ်တုတည်ရှိရာ ပဲခူးမြို့လယ်ရပ်ကို စစ်ကောင်စီတပ်ကလျှပ်စစ်မီးဖြတ်တောက် အမှောင်ချပြီး ဖြိုချဖျက်ဆီးလိုက်တာလို့ မြို့ခံတွေက ပြောပါတယ်။
“ဒီမနက်ဘုရားကြီး(ရွှေမော်ဓော)ဘက်သွားလို့ဝင်ကြည့်တော့ ရုပ်တုကမရှိတော့ဘူး။အောက်ခံခုံတုန်းပဲကျန်တော့တယ်။ အဲဒီခုံတုန်းကိုလည်း မိုးကာစအမည်းကြီးနဲ့အုပ်ပြီး ရုပ်တုရှိတဲ့လမ်းထောင့်ကို တိပ်အဝါတွေနဲ့ အတားအဆီးတွေလုပ်ထားတယ်”လို့ ပဲခူးမြို့ခံတစ်ဦးက People’s Spring ကို ပြောပါတယ်။
Public Service Announcement
ဒါ့အပြင် ဖျက်ဆီးဖယ်ရှားခံလိုက်ရတဲ့ဗိုလ်ချုပ်ရုပ်တုအနီးဝန်းကျင်လမ်းရဲ့တဖက်တချက်မှာလည်းစစ်ကောင်စီလက်အောက်ခံ ယာဥ်ထိန်းနဲ့ ရဲတပ်ဖွဲ့ဝင်တွေကို လက်နက်အပြည့်အစုံနဲ့ လုံခြုံရေးချထားတာလည်း တွေ့ရတယ်လို့ အဲဒီမြို့ခံက ဆက်ပြောပါတယ်။
ဗိုလ်ချုပ်မြင်းစီးရုပ်တည်ရှိတဲ့နေရာရဲ့လမ်းတစ်ဖက်ခြမ်း တောင်ငူလမ်းမှာတော့ စစ်ကောင် စီရဲ့ ပဲခူးတိုင်းအစိုးရအဖွဲ့ရုံးတည်ရှိတာကြောင့် ရုပ်တုအနီးတောင်ငူလမ်းပိုင်းကို စစ်အုပ်စုအာဏာသိမ်းပြီးနောက် ပိတ်ဆို့ထားခဲ့တယ်လို့ မြို့ခံတွေထံက စုံစမ်းသိရပါတယ်။
“သမိုင်းကိုဖျက်ချင်တာနေမှာ။ရုပ်တုပဲဖျက်လို့ရမယ် သမိုင်းတော့ ဖျက်လို့မရဘူး”လို့ ဗိုလ်ချုပ်ရုက်တုကို စစ်ကောင်စီဖယ်ရှားလိုက်တာနဲ့ပတ်သက်ပြီး ပဲခူးမြို့ခံအမျိုးသမီးတစ်ဦးက မှတ်ချက်ပေးပါတယ်။
စစ်ကောင်စီဖျက်ဆီးဖယ်ရှားလိုက်တဲ့ပဲခူးမြို့လယ်က ဗိုလ်ချုပ်မြင်းစီးရုပ်ကို လွတ်လပ်ရေးရယူပေးခဲ့တဲ့ဗိုလ်ချုပ်အောင်ဆန်းကိုဂုဏ်ပြုတဲ့အထိန်းအမှတ်တစ်ခုအနေနဲ့ စိုက်ထူထားရှိခဲ့တာနှစ်ပေါင်း ၃၀ ဝန်းကျင်ရှိပြီလို့ မြို့ခံတွေက ပြောပါတယ်။
အလားတူ စစ်ကောင်စီဟာပြီးခဲ့တဲ့ဇူလိုင်၂၈ ရက်ကလည်း နေပြည်တော်၊ ပုဗ္ဗသီရိမြို့နယ်၊ ပုဗ္ဗစျေးအနီး သံလွင်လမ်းနဲ့ ဇော်ဂျီလမ်းကြားမှာရှိတဲ့ ဗိုလ်ချုပ်ကြေးရုပ်ကို စက်ယန္တရားတွေအသုံးပြု ဖယ်ရှားခဲ့ပါသေးတယ်။
