သြဂုတ် – ၃၀ ၊၂၀၂၅ ၊ ဆိုင်းမင်း/People’s Spring
မန္တလေးမြို့ကနေ လက်နက်ကိုင်တော်လှန်မှုအားကောင်းရာ စစ်ကိုင်း၊ကချင်နဲ့ ရှမ်းပြည်နယ်မြောက်ပိုင်း ဒေသတွေဆီ စက်သုံးဆီ ပို့ဆောင်တယ်ဆိုပြီး လူ ၂၀၀နီးပါးကို စစ်ကောင်စီ က အခုရက်ပိုင်းအတွင်း ထောင်ဒဏ်တွေချလိုက်တယ်လို့ သိရပါတယ်။
“မန္တလေးက တရားရုံးတွေမှာ အမှုစွဲတင်ပြီး ချထားတာပေါ့၊ သူတို့စပြီး ဖမ်းတယ်ဆိုတဲ့အချိန်ကနေ ဒီရက်ပိုင်းထိပေါ့”လို့ မန္တလေး ရဲတပ်ဖွဲ့အသိုင်းအဝိုင်းနဲ့နီးစပ်သူတစ်ဦးကပြောပါတယ်။
မန္တလေးမြို့ပေါ်က အောင်မြေသာစံ၊ ချမ်းအေးသာစံ၊ မဟာအောင်မြေ၊ ချမ်းမြသာစည်၊ အမရပူရနဲ့ပုသိမ်ကြီးမြို့နယ်အတွင်းက တရားရုံးတွေက ထောင်ဒဏ်ချမှတ်ခဲ့တာလို့ သိရပါတယ်။
Public Service Announcement
တရားရုံးအများစုကတော့ ထောင်ဒဏ်တစ်နှစ်စီချလိုက်တာပါ။
မန္တလေးကနေ လက်နက်ကိုင်တော်လှန်မှု အားကောင်းရာဒေသတွေ စက်သုံးဆီ ကိုခွင့်ပြုချက်မရဘဲ ပို့ဆောင်တယ််ဆိုပြီး ဖမ်းဆီးမှု တွေကို အခုနှစ်ဆန်းပိုင်းကစတင်ပြီး စစ်ကောင်စီတပ်က လုပ်ဆောင်ခဲ့တာပါ။
အဲဒီနောက်ဖမ်းဆီးခံရသူတွေကို အရေးကြီးကုန်စည်နဲ့ဝန်ဆောင်မှုဥပဒေ ပုဒ်မ ၅ နဲ့အမှုဖွင့် တရားစွဲပါတယ်။
အဲဒီပုဒ်မဟာဆိုရင်ထောင်ဒဏ်၆လကနေ ၃ နှစ်အထိချနိုင်သလို ငွေဒဏ်ကျပ် ၅ သိန်းချနိုင်တဲ့ပုဒ်မလည်း ဖြစ်ပါတယ်။
“ တစ်မြို့နယ်ကို အနည်းဆုံး လူ၅၀အထက်ရှိတယ် ထောင်ချပစ်တာ”လို့ တရားရုံးအသိုင်းအဝိုင်းနဲ့ နီးစပ်သူတစ်ဦးကလည်း ပြောပါတယ်။
စစ်တပ်ဝါဒဖြန့်တယ်လီဂရမ်ချန်နယ်တွေကလည်းတော်လှန်ရေအားကောင်းရာဒေသတွေဆီစက်သုံးဆီ စီးဆင်းတာကိုဖြတ်တောက်ဖို့နဲ့ ပို့ဆောင်နေသူတွေကို အရေးယူဖို့ လှုံ့ဆော်တာတွေရှိခဲ့ပါတယ်။
