မိုင်းလုံနယ် စစ်ကောင်စီ လေကြောင်းတိုက်ခိုက်မှု ဘုန်းကြီးကျောင်းနဲ့ နေအိမ် ၂၀ပျက်စီး

စက်တင်ဘာ-၂၇၊ ၂၀၂၅။ ထားမြတ်/People’s Spring

ရှမ်းပြည်နယ်မြောက်ပိုင်း၊ ကျောက်မဲမြို့နယ် မိုင်းလုံမြို့နယ်ခွဲ ပန်သပြေရွာကို အာဏာသိမ်းစစ်တပ်က လေကြောင်းကနေ ဗုံးကြဲတိုက်ခိုက်ခဲ့ရာ ဘုန်းကြီးကျောင်းနဲ့ နေအိမ် ၂၀ပျက်စီးခဲ့တယ်လို့ တအာင်းတပ်မတော်(TNLA)က ထုတ်ပြန်ပါတယ်။

စက်တင်ဘာ ၂၇ရက် ညနေပိုင်းမှာ အာဏာသိမ်းစစ်တပ်က တိုက်ပွဲဖြစ်ပွားမှုမရှိတဲ့ ပန်သပြေရွာရှိ ပြည်သူလူထုတွေကို ရည်ရွယ်ချက်ရှိရှိ ဖျက်အားပြင်း ပေါင် ၅၀၀ ဗုံး ၂လုံး ကြဲချတိုက်ခိုက်ခဲ့တယ်လို့ ဆိုပါတယ်။

လေကြောင်းတိုက်ခိုက်မှုကြောင့် ပြည်သူထိခိုက်မှုရှိမရှိ အခြေအနေကိုတော့ ဖော်ပြမထားပါဘူး။

Public Service Announcement

အာဏာသိမ်းစစ်တပ်ဟာ ကျောက်မဲမြို့နယ် ပါပုတ်ရွာကိုလည်း စက်တင်ဘာ ၂၆ရက်က ဒရုန်းနဲ့ ဗုံးကြဲခဲ့လို့ အသက် ၆၀ကျော်အရွယ် အမျိုးသားတဦး သေဆုံးခဲ့သလို နေအိမ်ပျက်စီးခဲ့ပါတယ်။

ပါပုတ်ရွာမှာတိုက်ပွဲမရှိဘဲ စစ်ကောင်စီတပ်က ဒရုန်းနဲ့ တိုက်ခိုက်လာတာလို့ ဆိုပါတယ်။

အာဏာသိမ်းစစ်တပ်ဟာ TNLA သိမ်းပိုက်ထားတဲ့ ကျောက်မဲ၊ သီပေါနဲ့ မိုးကုတ်မြိုနယ်တွေကို အခု စက်တင်ဘာလအတွင်း လေကြောင်း၊ လက်နက်ကြီး၊ အသေခံဒရုန်းတွေ အသုံးပြု တိုက်ခိုက်ခဲ့လို့ အမျိုးသား (၂)ဦးသေဆုံးခဲ့ပြီး အမျိုးသား (၁)ဦး၊ အမျိုးသမီး (၄)ဦး ထိခိုက်ဒဏ်ရာရရှိခဲ့တယ်လို့ TNLAက အသိပေးထားပါတယ်။

ဒါအပြင် နေအိမ်၊ စာသင်ကျောင်း၊ ဘုန်းကြီးကျောင်းအပါအဝင် ပြည်သူလူထုပိုင်ပစ္စည်းတွေ ထိခိုက်ပျက်စီးခဲ့ပါတယ်။

စစ်ကောင်စီရဲ့ တိုက်ခိုက်မှုတွေကို ရှောင်ရှားနိုင်ဖို့ စစ်ရေးသတိအမြဲရှိဖို့ TNLAက ထပ်မံ နှိုးဆော်ထားပြီး လေကြောင်းရန်ကာကွယ်ရေးဆိုင်ရာနည်းလမ်း များ လိုက်နာဆောင်ရွက်ဖို့ သတိပေးထားပါတယ်။

ကျောက်မဲမြို့နယ်မှာ TNLAနဲ့ အာဏာသိမ်းစစ်တပ်တို့ တိုက်ပွဲဖြစ်ပွားနေပေမယ့် အခု လေကြောင်း တိုက်ခိုက်ခဲ့တဲ့နေရာတွေဟာ တိုက်ပွဲဖြစ်ပွားမှု မရှိသေးတဲ့နေရာတွေဖြစ်ပါတယ်။

အာဏာသိမ်းစစ်တပ်က ကျောက်မဲမြို့ကို အင်အား ၅၀၀လောက်နဲ့ စစ်ကြောင်းထိုးနေလို့ ကျောက်မဲမြို့နယ် နားခမ်းနဲ့ စခန်းသာရွာတွေမှာ တိုက်ပွဲပြင်းထန်နေတယ်လို့ TNLA ပြောရေးဆိုခွင့်ရှိသူ လွေးယေဦးက ပြောထားပါတယ်။