အောက်တိုဘာ-၁၆၊ ၂၀၂၅။မိုမို/People’s Spring
မကွေးတိုင်း၊ ပခုက္ကူမြို့နယ်မှာ စစ်ကောင်စီတပ်စစ်ကြောင်းတိုက်ခံရပြီး ၆ဦးသေကာ လက်နက် ၂လက် ရတယ်လို့ Southern Yeasgyo တပ်ပေါင်းစုက ဒီကနေ့ (အောက်တိုဘာ ၁၆ရက်)မှာ ထုတ်ပြန်ပါတယ်။
ပခုက္ကူမြို့နယ်၊ မြောက်လူးကန်ရွာ အထိုင်စခန်းက စစ်ကောင်စီတပ်သားတွေက ပခုက္ကူလေယာဉ်ကွင်းကနေ ရိက္ခာယူပြန်လာချိန် မနေ့က(အောက်တိုဘာ ၁၅ ရက်) နေ့လယ် ၁ နာရီခွဲခန့်မှာ တိုက်ခိုက်ခဲ့တာလို့ ဆိုပါတယ်။
“အင်အား ၂၀ ခန့်ကို Southern Yesagyo တပ်ပေါင်းစုမှ ကြားဖြတ်တိုက်ခိုက်ခဲ့တာ”လို့ ဖော်ပြပါတယ်။
Public Service Announcement
တိုက်ပွဲအတွင်း စစ်ကောင်စီတပ်သားတွေက လေယာဉ်ကွင်းဘက်ကို ပြန်ဆုတ်ခွာပြီး လေယာဉ်ကွင်း ကနေ လက်နက်ငယ်၊လက်နက်ကြီး၊ပွိုင့်ဖိုက်ထောက် ကူပစ်ပေးတာအပြင် မြောက်လူးကန်ရွာအထိုင်စခန်းကလည်း ပစ်ကူပေးခဲ့တယ်လို့ အသိပေးပါတယ်။
တိုက်ပွဲမှာ ၁၅ မိနစ်ကြာမြင့်ခဲ့ပြီး စစ်အုပ်စုဘက်က မျက်မြင် ၆ဦးသေဆုံးပြီး လက်နက် ၂ လက်သိမ်းဆည်းရရှိခဲ့တယ်လို့ သိရပါတယ်။
“အလောင်းများမြင်နေရသော်လည်း လက်နက်များထပ်မံကောက်ယူနိူင်ခြင်းမရှိခဲ့ပါ”လို့ Southern Yesagyo တပ်ပေါင်းစုက ပြောပါတယ်။
တပ်ပေါင်းစုဘက်က ရဲဘော်တစ်ဦး ဒဏ်ရာရရှိခဲ့တယ်လို့ ထုတ်ပြန်ချက်မှာ ဖော်ပြပါတယ်။
အခုနှစ် ဇူလိုင်လကလည်း ပခုက္ကူမြို့လေယာဉ် ကွင်းအနောက်ဘက်ခြမ်းကစစ်ကောင်စီတပ်စစ်ကြောင်းကိုကြားဖြတ်တိုက်ခိုက်ခဲ့ပြီးခလရ (၂၅၄) တပ်ရင်းက အရာရှိတစ်ဦးအပါအဝင် ခြောက်ဦးသေတယ်လို့ Southern Yesagyo PDF တာဝန်ခံကိုအောင်မောင်းက ပြောထားပါတယ်။
