အောက်တိုဘာ-၂၃၊ ၂၀၂၅။ ထားမြတ်/People’s Spring
ဓနုလက်နက်ကိုင်တပ်ဖွဲ့ဖြစ်တဲ့ဓနုပြည်သူ့လွတ်မြောက်ရေးတပ်ဦး( DPLF/DPLA)က စစ်ကောင်စီကြိုးပမ်းနေတဲ့ ရွေးကောက်ပွဲနဲ့ပတ်သက်တဲ့ ကြေညာချက်ကို ဒီနေ့ (အောက်တိုဘာ ၂၃ရက်)ထုတ်ပြန်ခဲ့ရာ ဓနုလူထုတွေအနေနဲ့ အကြမ်းဖက် စစ်တပ်ရဲ့ ရွေးကောက်ပွဲကို အားပေးထောက်ခံတာ ပူးပေါင်းဆောင်ရွက်တာ မလုပ်ဖို့ မေတ္တာရပ်ခံထားပါတယ်။
ဓနုပြည်သူ့ လွတ်မြောက်ရေးတပ်ဦး/ ဓနုပြည်သူ့ လွတ်မြောက်ရေးတပ်တော်(DPLF/DPLA)အနေနဲ့ အာဏာသိမ်း စစ်အုပ်စုက ပြုလုပ်မယ့်ရွေးကောက်ပွဲကို အသိမှတ်ပြု လက်ခံသွားမှာ မဟုတ်ဘူးလို့ အသိပေးပါတယ်။
” စစ်ကော်မရှင်ရဲ့ ရွေးကောက်ပွဲဟာ အတုအယောင် သပ်သပ်ဖြစ်တယ်ဆိုတာလူထု တရပ်လုံး အသိဖြစ်ပါတယ်။ဒါကြောင့် ပြည်သူတွေကို အသိ ပေးတောင်းဆိုချင်တာကတော့ ဒီရွေးကောက်ပွဲမှာ မဲတခုချင်းစီအလိုက် အရေးကြီးပါတယ်။ ကိုယ့်ရဲ့မဲတခုကြောင့် ဖြစ်လာမယ့် အကျိုးဆက်ကိုလည်း ကြိုတင် တွေးထားဖို့ လိုပါတယ်”လို့ DPLF သတင်းပြန်ကြားရေး တာဝန်ရှိသူ တဦးက ပြောပါတယ်။
Public Service Announcement
စစ်အုပ်စု အကျိုးစီးပွားနဲ့ စစ်အုပ်စုအာဏာ တည်မြဲရေးကို အဆိပ်ပင် ရေလောင်းခြင်း မပြုဖို့ လေးစားစွာ အသိပေးကြောင်းလည်း DPLFက ထုတ်ပြန်ပါတယ်။
DPLF အနေနဲ့လည်း ပြည်သူလူထုတွေနဲ့ အတူပူးပေါင်းဆောင်ရွက်ရေးကို အရှိန်မြင့် လုပ်ဆောင်သွားမယ်လို့ ဖော်ပြပါတယ်။
ဓနုလူမျိုးတွေအနေနဲ့ ဖက်ဒရယ်ပြည်ထောင်စုတည်ဆောက်ရေးမှာ အားတက်သရော ပူးပေါင်းဆောင်ရွက်ခဲ့ကြောင်း အသိပေးပါတယ်။
အနာဂတ်ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးရဲ့(Bottom up federalism approach) ပြည်နယ် အားကောင်းရေးမှ ပြည်ထောင်စုအားကောင်းရေးတည်ဆောက်သွားရာမှာလည်း DPLFအနေနဲ့နိုင်ငံရေး၊ စစ်ရေးကို အရှိန်မြှင့် ပူးပေါင်းလုပ်ဆောင်သွားမှာ ဖြစ်သလို နိုင်ငံရေး ကိုယ်စားပြုမှုတွေကိုလည်း စနစ်တကျ ပူးပေါင်းလုပ်ဆောင်သွားမယ်လို့ ထုတ်ပြန်ပါတယ်။
ဖက်ဒရယ်ဒီမိုကရေစီ ပြည်ထောင်စု တည်ဆောက်ရာမှာ ဓနုလူမျိုးများ ကိုယ်စားပြုအနေနဲ့ ပြည်တွင်း၊ ပြည်ပ နိုင်ငံတကာအင်အားစုတွေနဲ့ ပူးပေါင်းဆောင်ရွက်သွားမယ်လို့ ကြေညာပါတယ်။
DPLF/DPLAဟာ တအာင်းတပ်မတော်(TNLA) အပါအဝင် မဟာမိတ်တွေနဲ့ လက်တွဲစစ်ရေးဖော်ဆောင်နေပြီး ဓနုဒေသနဲ့ ဆက်စပ်ဒေသတွေမှာ စစ်ကောင်စီတပ်ကို တိုက်ခိုက်ခဲ့တဲ့ အဖွဲ့အစည်းဖြစ်ပါတယ်။
“လက်ရှိ ကျွန်တော်တို့DPLA နဲ့ရှမ်းမြောက်၊ရှမ်းတောင်နဲ့မိုးကုတ်ဘက်တွေမှာစစ်ရေးဖော်ဆောင်နေတာတွေရှိပါတယ်ဗျ ပြည်သူများအနေနဲ့လဲလေကြောင်းရန်အထူးဂရုစိုက်ရန်ပြောကြားလိုပါတယ်ဗျ”လို့ DPLF သတင်းပြန်ကြားရေး တာဝန်ရှိသူက ပြောပါတယ်။
