အောက်တိုဘာ-၂၆၊၂၀၂၅။မိုမို/People’s Spring
မကွေးတိုင်း၊ မင်းတုန်းမြို့မှာ ဆပ်ကြေးကောက်ဖို့ လာတဲ့ စစ်ကောင်စီလက်အောက်ခံ ရဲ နှစ်ဦးတိုက်ခိုက်ရာ သေဆုံးပြီး လက်နက်နှစ်လက် သိမ်းရတယ်လို့ သရက်ခရိုင်အမှတ်-၄ တပ်ရင်းတာဝန်ရှိသူက ပြောပါတယ်။
ဒီကနေ့ (အောက်တိုဘာ ၂၆ ရက်) မနက် ၆ နာရီ ခွဲမှာ မင်းတုန်းမြို့၊အင်းလည်ကုန်းကျေးရွာအနီး ၊ မင်းတုန်းမြို့ဝင် လမ်းပိုင်းပေါ်မှာ တိုက်ခိုက်ခဲ့တာလို့ ဆိုပါတယ်။
“ကားတွေကို ဆပ်ကြေးကောက်နေတာ။တစ်စီးကို သိန်း ၄၀ ၊၅၀ နှုန်းနဲ့ ကောက်နေတဲ့သတင်းကို ကြိုတင်ရရှိလို့ ၂၅ ရက်နေ့ကတည်းက ကြိုတင်ကင်းပုန်းဝပ်ပြီးတော့ ၂၆ ရက်နေ့မနက်မှာဆပ်ကြေး ကောက်ဖို့ထွက်လာတဲ့ ရဲနှစ်ယောက်ကိုတိုက်ခိုက်ခဲ့တာ”လို့ အထက်ပါတာဝန်ရှိသူက တိုက်ခိုက်ခဲ့မှုကို ရှင်းပြပါတယ်။
Public Service Announcement
မင်းတုန်းမြို့ က ရဲနှစ်ဦးဖြစ်တဲ့ နေမင်းထက်နဲ့ သန်းထိုက်စိုးတို့ဟာ ခရီးသွားကားတွေကို လက် နက်နဲ့ ခြိမ်းခြောက် ဆပ်ကြေးကောက်ဖို့ ထွက်လာခဲ့တာလို့ အသိပေးပါတယ်။
“အင်းလည်ကုန်းနဲ့ မင်းတုန်းမြို့က အလွန်ဆုံး ၄ မိုင် ၅ မိုင်လောက်ပဲ ဝေးတာ။မြို့အဝင်နားက ရွာပဲ”လို့ မင်းတုန်းမြို့နယ်ဒေသခံတစ်ဦးက ပြောပါတယ်။
သရက်ခရိုင်အမှတ် – ၄ တပ်ရင်း၊ တပ်ခွဲ (၂) ၊ တပ်စိပ်(၅)ရဲ့ စောင့်ကြိုတိုက်ခိုက်မှုမှာ G3 နှစ်လက် ၊ G3ကျည်ဘောက် နှစိခု ၊ G3ကျည် ၂၉တောင့် ၊ လက်ပစ်သီး တစ် လုံး ၊ လက်ထိပ် တစ်ခု ၊ ဖုန်း တစ်လုံး နှင့် ငွေသား ကျပ် ၆၅,၀၀၀ သိမ်းရတယ်လို့ သိရပါတယ်။
သရက်ခရိုင်အနေနဲ့ စစ်ရေးအရ ပြင်းထန်မှုမရှိသေးသော်လည်း စစ်ကောင်စီရွေးကောက်ပွဲကိုဆန့်ကျင်ပြီး စစ်ရေးလှုပ်ရှားတဲ့နယ်မြေတွေမှာ တိုက်ခိုက်မှုအရှိန်မြှင့်တင်မယ်လို့ သရက်ခရိုင်အမှတ်-၄ တပ်ရင်းက အသိပေးပါတယ်။
