မူဆယ်ကမီးရှူးမီးပန်းစက်ရုံ မီးလောင်၊ မီးသတ်ကားမ​လောက်လို့ တရုတ်ဘက်မှမီးသတ်ကား​တွေလာငြှိမ်း​ပေးရတယ်လို့​ဒေသခံ​ပြော

​အောက်တိုဘာ-၂၅၊၂၀၂၅။ဇော်ရမ်း/People’s Spring

တရုတ်နိုင်ငံနဲ့နယ်စပ်မြို့ဖြစ်တဲ့ မူဆယ်မြို့မှာ စစ်ကောင်စီလက်အောက်ခံပြည်သူ့စစ်တွေအမည်ခံထားတဲ့ တရုတ်နိုင်ငံသားပိုင် မီးရှူးမီးပန်းစက်ရုံ တစ်ရုံမီးလောင်ပျက်စီးသွားတယ်လို့ ဒေသခံတွေကပြောပါတယ်။

မူဆယ်မြို့ ၊စွမ်စော်ရပ်ကွက်က မီးရှူးမီးပန်းစက်ရုံဟာအောက်တိုဘာ၂၅ရက်နေ့ညနေပိုင်းမှာ ကြီးမားတဲ့ မီးလောင်​ပေါက်ကွဲမှု​တွေဖြစ်ခဲ့တာပါ။ စက်ရုံထဲမှာ ယမ်းတွေ၊ မီးရှူးမီးပန်းတွေချည်းပဲမို့ မီးမထိန်းနိုင်ခဲ့ဘူးလို့ မြို့ခံတစ်ဦးကပြောပါတယ်။

“စက်ရုံကို ပိုင်တာကတရုတ်တွေပိုင်တာ။ ပြည်သူ့စစ်ကအမည်ခံပေါ့။ ဒီကိစ္စ ရဲက အမှုဖွင့်ထားပေမယ့် ပြည်သူ့စစ်ကိုကျော်ပြီးမလုပ်ရဲဘူး”လို့ မြို့ခံတဦးကပြောပါတယ်။

Public Service Announcement

မီးလောင်ရတဲ့အကြောင်းအရင်းကိုမသိရသေးပါဘူး။ ​အောက်တိုဘာ ၂၅ ရက်ညနေ၅နာရီခန့်မှာ စလောင်ပြီး ၆နာရီကျော်မှ မီးငြှိမ်းသတ်နိုင်ခဲ့တယ်လို့ ဒေသခံတွေကပြောပါတယ်။ စစ်ကောင်စီလက်အောက်ခံမီးသတ်တပ်ဖွဲ့က သတင်းထုတ်ပြန်ထားပေမယ့် မီးရှူးမီးပန်းစက်ရုံဆိုတာကို ချပ်လှပ်ထားပါတယ်။

“တရုတ်နဲ့ပြည်သူ့စစ်ကပိုင်တာဆိုတော့ မီးသတ်တပ်ဖွဲ့လည်းကြောက်ရတယ်”လို့ မူဆယ်မြို့ခံကပြောပါတယ်။

အုပ်ချုပ်မှုယာဉ်(၁)စီး၊ ရေသယ်ယာဉ်(၁၀)စီး၊ မီးငြှိမ်းသတ်ယာဉ်(၅)စီးနဲ့အတူ မီးငြှိမ်းသတ်ခဲ့ရတယ်လို့ မီးသတ်တပ်ဖွဲ့ကဆိုထားပါတယ်။

ဒါ​ပေမယ့် မြန်မာဘက်က မီးသတ်ကားတွေနဲ့မလောက်လို့ နယ်စပ်ဂိတ်ကိုဖြတ်ကျော်ပြီး တရုတ်မီးသတ်ကားတွေလာရောက်ငြှိမ်းသတ်ခဲ့တယ်လို့ ဒေသခံတွေကပြောပါတယ်။ ဒါကို​တော့ မီးသတ်တပ်ဖွဲ့က မ​ဖော်ပြပါဘူး။

မီးရှူးမီးပန်းစက်ရုံ မီး​လောင်​နေစဥ်။ ရုပ်သံ-​ဒေသခံ