နိုဝင်ဘာ-၁၊၂၀၂၅။မိုမို/People’s Spring
စစ်ကိုင်းတိုင်း၊ ဝက်လက်မြို့နယ်၊ရွာသာကြီးကျေးရွာကို စစ်ကောင်စီတပ်က လေကြောင်းကနေဗုံးကြဲပြီးနောက် စစ်သားတွေ ဝင်ရောက်စီးနင်းနေတယ်လို့ ဒေသခံသတင်းရင်းမြစ်အချို့က ပြောပါတယ်။
ဒီကနေ့(နိုဝင်ဘာ ၁ရက်) မနက် ၉ နာရီခွဲဝန်းကျင်မှာ တပ်မ(၃၃)ကနေလာတဲ့ Mi17 ယာဥ်နှစ်စီးနဲ့ ရွာသာကြီးကျေးရွာထဲကို စစ်ကောင်စီတပ်သားတွေ ပေးပို့ခဲ့တာလို့ ဆိုပါတယ်။
ဒါ့အပြင် တပြိုင်တည်းမှာပဲ စက်တပ်လေထီးနှစ်စီးနဲ့ ခြောက်ကြိမ်ထက်မနည်း ဗုံးကြဲခဲ့တယ်လို့လည်း ဝက်လက်မြို့နယ်စစ်ရေးသတင်းရင်းမြစ်က ပြောပါတယ်။
Public Service Announcement
“ရွာသာကြီး ပတ်ချာလည် နယ်မြေရှင်းလင်းရေး လုပ်ချင်တာနဲ့တူတယ်။ဗုံးတွေကတော့ ရွာသာကြီး ကျေးရွာထဲကိုပဲ ကြဲတာ”လို့ ၎င်းက ပြောပါတယ်။
ရွာသာကြီးကျေးရွာဗုံးကြဲခံရမှုနဲ့ပတ်သက်ပြီး ထိခိုက်ပျက်စီးမှု အသေးစိတ်မသိရသေးဘဲ စုံစမ်းဆဲလို့ ၎င်းက ဆိုပါတယ်။
ရွာသာကြီးကျေးရွာဟာ ဝက်လက်မြို့နယ်အနောက်ဘက်ခြမ်းကနေ အရာတော်မြို့နယ်ဘက်ကို ချိတ်ဆက်ထားတဲ့ ကားလမ်းပိုင်းပေါ်မှာတည်ရှိပါတယ်။
ပြီးခဲ့တဲ့ အောက်တိုဘာတတိယပတ်က အရာတော်မြို့နယ် သလဲဘာပျူစောထီးကျေးရွာကနေ ဝက်လက်မြို့နယ် ကျောက်ကုန်းကျေးရွာဘက်ကို စစ်ကောင်စီတပ်က စစ်ကြောင်းထိုးခဲ့ပါသေးတယ်။
အဲဒီစစ်ကြောင်းကို အောက်တိုဘာ ၂၁ရက်ကနေ ၂၆ ရက်အထိ တိုက်ခိုက်ခဲ့ရာမှာ စစ်ကောင်စီတပ်သားအလောင်းတချို့နဲ့ လက်နက်တစ်လက်သိမ်းရခဲ့တယ်လို့ ကာကွယ်ရေးတပ်တွေက ထုတ်ပြန်ထားပါတယ်။
