နိုဝင်ဘာ-၂၊၂၀၂၅။ဇေအောင်/People’s Spring
စစ်ကိုင်းတိုင်း၊ရွှေဘိုမြို့နယ်၊သီလုံးရွာကပျူစောထီးစခန်း နှစ်ရက်ဆက်တိုက် ဗုံးကြဲတိုက်ခိုက်ခံရပြီးပျူခေါင်းဆောင်သေဆုံးသွားကြောင်းရွှေဘိုခရိုင်အမှတ်(၄) တပ်ရင်းက သတင်းထုတ်ပြန်ပါတယ်။
ပြီးခဲ့တဲ့ အောက်တိုဘာ ၂၈ နဲ့ ၂၉ ရက်တွေက ရွှေဘိုမြို့နယ်အနောက်ခြမ်းရှိ သီလုံးပျူစောထီးရွာက ပျူစခန်းကို နှစ်ရက်ဆက်တိုက် ဒရုန်းနဲ့ ဗုံးသီး ၄၅ လုံး ကြဲချတိုက်ခိုက်ခဲ့ရာ ပျူခေါင်းဆောင် ဝင်းဇော်အောင် သေဆုံးပြီး ပျူ ၄ ဦး ထိခိုက်ဒဏ်ရာ ရခဲ့တယ်လို့ ရွှေဘိုခရိုင်အမှတ်(၄) တပ်ရင်းက ဖော်ပြပါတယ်။
“သေတဲ့ပျူခေါင်းဆောင် ဝင်းဇော်အောင်ရဲ့အသုဘကို မနေ့နေလယ်က လုပ်သွားတယ်”လို့ ကာကွယ်ရေးရဲဘော်တဦးက ပြောပါတယ်။
Public Service Announcement
ဇီးဖြူကုန်းပျူရွာကနေ တပ်ကူတွေရောက်လာပြီး လက်နက်ကြီးတွေနဲ့ပါ ပစ်ကူခဲ့ကြောင်း၊ ရဲဘော်တွေတော့ အထိအခိုက်မရှိကြောင်း ရွှေဘိုမြို့နယ်ပြည်သူ့လုံခြုံရေးတပ်ဖွဲ့က ဆိုပါတယ်။
အဲဒီစစ်ဆင်ရေးကို ရွှေဘိုခရိုင်အမှတ်(၄) တပ်ရင်း ဦးဆောင်ပြီး ရွှေဘိုမြို့နယ်ပြည်သူ့လုံခြုံရေးတပ်ဖွဲ့၊ Shwebo Crocodile ၊ ဒေါင်းမာန်ပြည်သူ့ကာကွယ်ရေးအဖွဲ့ ၊FIFတောင်သူ့လွတ်မြောင်ရေးအင်အားစု ၊ဒေါင်းစစ်သည်အဖွဲ့တို့ ပူးပေါင်းတိုက်ခိုက်ခဲ့ကြောင်း သိရပါတယ်။
ရွှေဘိုဝံအတွင်းမှာ စစ်တပ်လက်အောက်ခံ ပျူရွာ ၅ ရွာထက်မနည်းရှိပြီး တော်လှန်ရေး အဖွဲ့တွေက မကြာခဏ တိုက်ခိုက်နေပါတယ်။
