နိုဝင်ဘာ-၅၊၂၀၂၅။မိထက်/People’s Spring
ရှမ်းပြည်နယ်တောင်ပိုင်း၊ တောင်ကြီးမြို့မှာ တန်ဆောင်မုန်းလပြည့်ညကလူငယ်တွေစုပြီး ကာလသားဟင်းချက်စားဖို့ ကြက်ခိုးတဲ့အထဲက လူငယ်တစ်ဦးကို ပြည်သူ့ရှေ့ဆောင်ပါတီ(PPP) အမတ်လောင်း စိုင်းရွှေထီး နဲ့ သားဖြစ်သူက ရိုက်နှက်လို့ သေဆုံးသွားပါတယ်။
တောင်ကြီးမြို့၊ ရပ်ကွက်(၁)နယ်မြေ(၂)မှာ နိုဝင်ဘာ ၅ ရက် နံနက် ၂ နာရီ ၃၀ မိနစ်ခန့်က အဲ့ဒီဖြစ်စဉ် ဖြစ်ခဲ့တာပါ။ အဲ့ဒီရပ်ကွက်ထဲက PPP အမတ်လောင်းစိုင်းရွှေထီးရဲ့ ခြံဝင်းထဲက ကြက်ကို လူငယ်တစ်ဦးက ဝင်ဖမ်းစဉ်မှာ ရိုက်နှက်ခံရတာ ဖြစ်ပါတယ်။
“လူငယ်တွေက ထုံးစံအတိုင်းပဲပေါ့ဗျာ။ သူခိုးကြီးညမှာ ချက်စားဖို့ ကြက်ဝင်ခိုးတာ။ ဝင်ခိုးတဲ့ ကလေးကို စိုင်းရွှေထီး နဲ့ သူ့သားစိုင်းကျော်စိုးမိုးက ဖမ်းရိုက်ပစ်တာဗျာ။ တော်တော်လေး ဗရုတ်သုတ်ခနိုင်တယ်ပေါ့” လို့ ဒေသခံတစ်ဦးကပြောပါတယ်။
Public Service Announcement
သေဆုံးသူက လူလတ်ပိုင်းအမျိုးသားဖြစ်ပြီး စိုင်းရွှေထီးနဲ့ တစ်ရပ်ကွက်တည်းနေသူပါ။ စိုင်းရွှေထီးရဲ့ လုပ်ရပ်ကို အိမ်နီးနားချင်းတွေက ပြစ်တင်ဝေဖန်ချင်ပေမယ့် စစ်အုပ်စုရန်ကိုကြောက်လို့ နှုတ်ဆိတ်နေကြတယ်လို့ ဒေသခံအချို့ကပြောပါတယ်။
လက်ရှိမှာတော့ စိုင်းရွှေထီးနဲ့သားဖြစ်သူကို တောင်ကြီးမြို့မရဲစခန်းမှာ ဖမ်းဆိးထားပြီး လူသတ်မှုနဲ့ အမှုဖွင့်ထားတယ်လို့ သိရပါတယ်။စိုင်းရွှေထီးဟာ PPP ပါတီကို ကိုယ်စားပြုပြီး တောင်ကြီးမြို့ မဲဆန္ဒနယ် အမှတ်(၁) က နေ ဝင်ပြိုင်ဖို့ မှတ်ပုံတင်ထားသူဖြစ်ပါတယ်။
” စစ်တပ် ရွေးကောက်ပွဲဝင်မယ့်ဟာတွေက စစ်တပ်လိုပဲ လူထုအပေါ် ယုတ်မာပါတယ်။အခုလိုဖြစ်လို့ လူသိတာနဲ့ မသိတာပဲ ရှိသေးတာ” လို့တောင်ကြီးမြိုခံတစ်ဦးကပြောပါတယ်။
တန်ဆောင်မုန်းလပြည့်နေ့ည၊လပြည့်ကျော်တစ်ရက်ညတွေဟာ သူခိုးကြီးအဖြစ် လူငယ်တွေက ပျော်ပွဲရွှင်ပွဲလုပ်ပြီး ပျော်ပါးလေ့ရှိပါတယ်။
တောင်ကြီးမြို့လို စစ်ကောင်စီကအပြည့်အဝထိန်းချုပ်ထားတဲ့မြို့တွေမှာ အခုလို ပျော်ပွဲရွင်ပွဲတွေရှိပေမယ့် ဒေသအနှံ့ကမြို့အများအပြားမှာတော့ ယခင်ကလိုပျော်ပွဲ ရွှင်ပွဲတွေ မလုပ်ကြတော့ပါဘူး။
တော်လှန်ရေးအင်အားစုတွေထိန်းချုပ်ထားတဲ့ဒေသတွေမှာဆိုရင် စစ်ကောင်စီရဲ့လေကြောင်းရန်ကိုကာကွယ်ဖို့ သတိပေးထားတာတွေလည်းရှိပါတယ်။
ပြည်သူ့ရှေ့ဆောင်ပါတီ(PPP) ဥက္ကဌ ဟာ စစ်တပ်ထောက်ခံသူဖြစ်ပြီး ၂၀၂၀ ရွေးကောက်ပွဲမတိုင်ခင် ဗိုလ်ချုပ်မှူးကြီးမင်းအောင်လှိုင်ကို အာဏာသိမ်းဖို့ ပြောခဲ့တဲ့ပါတီတွေထဲမှာလည်းပါဝင်ပါတယ် ။ ဒေါ်သက်သက်ခိုင်ဟာစစ်တပ်အာဏာသိမ်းပြီးနောက် စစ်ကောင်စီမှာ လူကယ်ပြန်နဲ့ ဟိုတယ်ခရီး ဝန်ကြီးလုပ်ခဲ့ပေမယ့် စစ်အုပ်စုက သူတို့လုပ်မယ့်ရွေးကောက်ပွဲမှာ ဒေါ်သက်သက်ခိုင်ကို ဘဏ်အကြွေးတွေပြန်မဆပ်တဲ့အကြောင်းပြချက်နဲ့ ဝင်ပြိုင်ခွင့်ပိတ်ထားပါတယ် ။
