နိုဝင်ဘာ၁၀၊၂၀၂၅၊ရှိန်း/ People’s Spring
စစ်ကိုင်းတိုင်း၊ဒီပဲယင်းမြို့နယ်က ကျေးရွာသုံးရွာ ကို စစ်တပ်က တိုက်လေယာဥ်သုံးစီးနဲ့ ဗုံးကြဲခဲ့တာကြောင့် ကနဦးသတင်းတွေအရ ပြည်သူ ၁၃ ဦးကထိခိုက်ဒဏ်ရာ ရတယ်လို့ ဒေသခံ တွေဆီက ပြောပါတယ်။
ဘုတ်ရွာ၊ ကျွန်းတောလေးရွာ၊ ဆပ်ပြာကျင်းရွာတွေကိုနိုဝင်ဘာလ၁၀ ရက်နေ့၊ညနေ ၃နာရီ ၂၀မိနစ်ကစတင်ပြီး တံတားဦး လေတပ်ကတက်လာတဲ့ စစ်တပ်ရဲ့ဂျက်ဖိုက်တာနဲ့ဗုံးကြဲခဲ့တာလို့ သိရပါတယ်။
အဲဒီ နောက် မိတ္ထီလာ လေတပ်ကတိုက်လေယာဥ် တစ်စီး၊တံတားဦး လေတပ်ကတပ်လာတဲ့တိုက်လေယာဥ်တစ်စီးနဲ့ လေကြောင်းတိုက်ခိုက်မှု သုံးကြိမ် ပြုလုပ်ခဲ့တာလို့ ဒေသခံအချို့ကပြောပါတယ်။
Public Service Announcement
စစ်တပ်ရဲ့ လေကြောင်းတိုက်ခိုက်မှုကြောင့် အနည်းဆုံးပြည်သူ ၁၃ ဦး ထိခိုက်ဒဏ်ရာရတယ်လို့ ကနဦး စုံစမ်းသိရပါတယ်။ အသေးစိတ်ကို သက်ဆိုင်ရာ မြို့နယ်ပကဖက ထုတ်ပြန်သွားမယ်လို့ ဒေသခံ ကာကွယ်ရေးတပ်တာဝန်ရှိသူတဦး ကပြောပါတယ်။ဒဏ်ရာရသူတွေထဲမှာ အမျိုးသမီးကြီး တစ်ဦး ဗိုက်ပွင့်ဒဏ်ရာရပြီးပြင်းထန်တယ်လို့ သိရပါတယ်။
“ လေယာဉ်က ဆက်တိုက်လာကြဲတာဗျ။တိုက်ပွဲမရှိ၊စစ်ကြောင်း တွေလည်းမရှိပါဘူး။အသေးစိတ်ကတော့ ပကဖက ထုတ်ပြန်ပါလိမ့်မယ်။အခုတော့ ဒဏ်ရာရတွေ ဆေးကုဖို့လုပ် နေကြပါတယ်” လို့ ဒေသခံ ကာကွယ်ရေးတပ်ဖွဲ့တာဝန်ရှိသူက ပြောပါတယ်။
ပြီးခဲ့တဲ့ ဩဂုတ်လ၁၈ ရက်နေ့ကလည်း ဒီပဲယင်းမြို့နယ်၊ မူးကမ်းကြီးကျေးရွာ ဘုန်းကြီးကျောင်းကို စစ်တပ်က လေကြောင်းကနေ ဗုံးကြဲခဲ့တာကြောင့် သံဃာတော် ၂ ပါးအပါအဝင် ၁၂ဦး သေဆုံးခဲ့ပါ သေးတယ်။
